குருணை வடிவ யூரியாவை பயிர்களுக்கு இடும்போது, பயிர் பச்சை பிடிப்பது, சிறிது காலதாமதம் ஆவதால் குருணை வடிவ யூரியாவை விட சாதாரண யூரியாவையே அதிக அளவில் விவசாயிகள் விரும்புகின்றனர். ஆனால் குருணை வடிவ யூரியாவில்தான் அதிக பலன் உள்ளது.
நன்மைகள்
- இரண்டு வகையான யூரியாவிலும் 46 சதம்தான் தழைச்சத்து உள்ளது. குருணை வடிவ யூரியாவில் உள்ள தழைச்சத்து மிகவும் மெதுவாகவும், சீராகவும் நீண்ட நாள்கள் பயிர்களுக்கு கிடைக்கிறது. இதனால் பயிர் நீண்ட நாள்களுக்கு பசுமை மாறாமல் இருக்கும். இதனால் தழைச்சத்து பயன்படுத்தும் அளவும் குறைகிறது.
- சாதாரண யூரியாவை மண்ணில் இடும்போது உடனே கரைவதால் தழைச்சத்து நீரின் மூலமாகவும் ஆவியாதல் மூலமாகவும் வீணாகிறது. குருணை வடிவ யூரியாவை பயிர்களுக்கு இடும்போது தழைச்சத்து வீணாகாமல் பயிர்களுக்கு கிடைக்கிறது.
- யூரியா குருணை வடிவில் இருப்பதால் பயிர்களுக்கு தெளிப்பது மிகவும் எளிதானது. குருணை வடிவ யூரியாவில் ஈரப்பதம் குறைவாக இருப்பதால் கட்டியாவது இல்லை. திறந்து வைத்திருக்கும் நிலையில் காற்றில் உள்ள ஈரப்பதத்தை உறிஞ்சி தண்ணீராக மாறுவதும் இல்லை.
- குருணை வடிவ யூரியாவை சேமிப்பதற்கும் உபயோகிப்பதற்கும் எந்தவித சிரமமும் இல்லை. குருணை யூரியா சாதாரண யூரியாவை விட எடை அதிகமாக இருப்பதால் பயிர்களுக்கு இடும்போது காற்று மற்றும் நீரால் அடித்துச் செல்லப்படுவதில்லை. ஆனால் சாதாரண யூரியா துகள்களாக இருப்பதால் இலையின் மேற்படிப்பில் படிந்து பயிர்களுக்கு சேதம் உண்டாக்குகிறது.
எனவே அதிக பயன் உள்ள குருணை வடிவ யூரியாவை பயன்படுத்தி கூடுதல் மகசூல் பெற்று விவசாயிகள் பயன் அடையவேண்டும். மேலும் டிஏபி மற்றும் 20:20:0:13 காம்பளக்ஸ் உரங்களை விவசாயிகள் வாங்கும் போது, குறிப்பிட்ட உர நிறுவனத்தை மட்டுமே கேட்கின்றனர். அனைத்து நிறுவன உரங்களின் தரமும், சத்துக்களின் அளவும் ஓரே அளவிலேயே உள்ளது.
எனவே விவசாயிகள் பயிருக்கு தேவையான உரங்களை மண் பரிசோதனை பரிந்துரையின்படி தேவையான உரங்களை மட்டுமே இட்டு உற்பத்தியை பெருக்கலாம்.
தினமணி தகவல் – திரு கோமதிநாயகம், வேளாண்மை இணை இயக்குநர், திருவண்ணாமலை
இதே தகவல் திண்டுக்கல் மாவட்ட வேளாண் இணை இயக்குநர் திரு மு.தெய்வேந்திரன் மூலமாகவும் வந்துள்ளது.
வேளாண் அரங்கம் 
Pingback: செய்தித் தொகுப்பு « வேளாண் செய்திகள்