பயறு வகைப் பயிர்களில் கூடுதல் மகசூல் பெற டிஏபி

பயறு வகைப் பயிர்களில் கூடுதல் மகசூல் பெற இரு முறை 2 சதம் டிஏபி கரைசலை கைத் தெளிப்பான் கொண்டு தெளிப்பது அவசியம் என்று வேளாண்மைத் துறை அறிவுறுத்தியுள்ளது.

பயறு வகைப் பயிர்கள்: கொண்டைக் கடலை, உளுந்து, தட்டைப் பயிறு, அவரை, பாசிப் பயறு, கொள்ளு, துவரை, சோயா மொச்சை ஆகிய பயறு வகைப் பயிர்களுக்கு டிஏபி கரைசல் பெரிதும் அவசியமானது.

டிஏபி கரைசல் தயாரிப்பு: டிஏபி கரைசலைப் பயிர்களுக்கு தெளிப்பதைவிட அந்தக் கரைசலைத் தயாரிப்பதில் கூடுதல் கவனம் செலுத்த வேண்டும். சிறிது அளவு மாறினாலும் கரைசல் தெளித்தும் எந்தவிதப் பயனும் கிடைக்காது. அளவு கூடினால் பயிர்கள் காய்ந்து விடும் அபாயமும் உள்ளது. எனவே, கரைசல் தயாரிப்பில் சரியான வழிமுறைகளைப் பின்பற்ற வேண்டியது அவசியம்.

ஓர் ஏக்கருக்கு 4 கிலோ டிஏபி உரம் போதுமானது. 4 கிலோ டிஏபி உரத்தை 10 லிட்டர் தண்ணீரில் இரவில் கரைத்து வைக்க வேண்டும். இரவு நேரத்தில் 4 முறை இந்தக் கரைசலை நன்கு கலக்க வேண்டும். காலையில் இந்தக் கரைசலை கலக்காமல் இருக்க வேண்டும். மேல் புறத்தில் தெளிந்திருக்கும் கரைசலைத் துணியால் வடிகட்டி எடுத்துக் கொள்ள வேண்டும். இந்தக் கரைசலுடன் 190 லிட்டர் தண்ணீரை கலந்து ஒரு ஏக்கர் செடிக்கு தெளிக்கலாம்.

கைத் தெளிப்பான்: டிஏபி கரைசலைத் தெளிக்கும்போது விசைத் தெளிப்பான் பயன்படுத்தக் கூடாது. விசைத் தெளிப்பானில் கரைசல் முழுமையாக வெளியேறாது. நுரையே அதிகமாக வரும். எனவே, கைத் தெளிப்பான் பயன்படுத்தியே தெளிக்க வேண்டும். காலை அல்லது மாலை நேரத்தில் மட்டும் செடி முழுவதும் நனையும் வகையில் தெளிக்க வேண்டும். வெயில் இருக்கும் தருணத்தில் தெளித்தால் எந்தவிதப் பயனும் தராது.

எப்போது தெளிப்பது?: பயறு வகைப் பயிர்களை நடவு செய்த 30-வது நாளில் ஒரு முறையும், 45-வது நாளில் ஒரு முறையும் தெளிக்க வேண்டும். இல்லையெனில் பூக்கும் தருணத்தில் ஒரு முறையும், 15 நாள் இடைவெளிவிட்டு மறுமுறையும் தெளிக்கலாம்.

பயன்கள் என்ன?: பொக்கு காய்கள் வராது. பூக்கள் கொட்டாது. காய்கள் நன்கு திரட்சியாக வளரும். கூடுதல் மகசூல் பெறலாம். சாதாரணமாக ஒரு ஹெக்டேரில் 620 கிலோ பயறு வகைகள் கிடைத்தால் 2 சதம் டிஏபி தெளிப்பதன் மூலம் கூடுதலாக 20 சதம் வரை மகசூல் கிடைக்கும்.

அரசு மானியம்: டிஏபி தெளிப்புக்கு தேசிய வேளாண்மை வளர்ச்சித் திடத்தின் மூலம், அரசு மானியமும் வழங்கப்படுகிறது. டிஏபி கரைசல் தயாரிப்புக்கு மானியமாக ரூ.500 வழங்கப்படுகிறது. விவசாயி கூடுதலாக ரூ.200 மட்டும் செலவு செய்தால் போதுமானது. இதேபோல், டிஏபி தெளிக்கும் பணிக்கும் ரூ.300 மானியம் வழங்கப்படுகிறது. இந்தப் பணிக்கு 2 ஆள்களைப் பயன்படுத்தினால் கூலியாக ரூ.600 வழங்க வேண்டியிருக்கும். அதில், 50 சதத்தை அரசே மானியமாக வழங்குகிறது.

தருமபுரி மாவட்டத்தில்…: தருமபுரி மாவட்டத்தில் நிகழாண்டு 26,157 ஹெக்டேரில் பயறு வகைப் பயிர்கள் சாகுபடி செய்யப்பட்டுள்ளன. இதில், 860 ஹெக்டேர் பயிருக்கு அரசு மானியம் வழங்க இலக்கு நிர்ணயிக்கப்பட்டுள்ளது. மானியத் தொகையை விவசாயிகளின் வங்கிக் கணக்கிலேயே வரவு வைக்கவும் வேளாண்மை அலுவலர்களுக்கு உத்தரவிடப்பட்டுள்ளது.

தொழில்நுட்பப் பயிற்சி: டிஏபி கரைசல் தயாரிப்பு மற்றும் தெளிக்கும் முறைகள் குறித்து வேளாண்மைத் துறை சார்பில் விவசாயிகளுக்கு இலவசமாக தொழில்நுட்பப் பயிற்சிகளும் அளிக்கப்படுகின்றன. நல்லம்பள்ளி ஒன்றியத்துக்குள்பட்ட மாதேமங்கலம் குட்டூர் பகுதி விவசாயிகளுக்கு வேளாண்மைத் துறை சார்பில் புதன்கிழமை பயிற்சி வகுப்பு நடத்தப்பட்டது. கந்தசாமி என்பவரது விளைநிலத்தில் சுற்றுப் பகுதியைச் சேர்ந்த 50 விவசாயிகளை அழைத்து டிஏபி கரைசல் தெளிப்பது குறித்து நேரடி செயல் விளக்கம் அளிக்கப்பட்டது.

வேளாண்மைத் துறை துணை இயக்குநர் பி. வேணுகோபால், வேளாண்மை அலுவலர் எம். மணிராஜன், உதவி அலுவலர்கள் பி. மாதேஷ், ஜி. செல்வம், ஆர். சதாசிவம் ஆகியோர் பயிற்சி அளித்தனர்.

நல்லம்பள்ளி ஒன்றியத்தில் மட்டும் 108 ஹெக்டேரில் பயறு வகைப் பயிர்களுக்கு விவசாயிகளுக்கு மானியம் வழங்கப்படவுள்ளது. எனவே, பயறு வகைப் பயிர்களை சாகுபடி செய்யும் விவசாயிகள் அனைவரும் தவறாமல் 2 சதம் டிஏபி கரைசல் தெளிக்க வேண்டும் என்று வேளாண்மைத் துறை வலியுறுத்தியுள்ளது.

Advertisements

காய்கறி சாகுபடி விவசாயிகளுக்கு துல்லிய பண்ணையத் திட்டம்

சிவகங்கை மாவட்டத்தில், ஆண்டுதோறும் சராசரியாக 600 ஹெக்டேர் பரப்பில் வெண்டை, கத்தரி, தக்காளி, கொடி வகை காய்கறிகள் பயிரிடப்படுகின்றன.

இதைத் தவிர 5 ஆயிரம் ஹெக்டர் பரப்பில் மிளகாய் சாகுபடி செய்யப்படுகிறது.

இப் பயிர்களில் பாசனநீர், உரங்கள் மற்றும் பயிர் பாதுகாப்பு மருந்துகள் ஆகியவை சாதாரண முறையில் அளிக்கும்போது, செடிகளின் வேர்பகுதிகள் மட்டுமல்லாது சுற்றியுள்ள இடங்களிலும் அளிக்கப்பட்டு வீணாகிறது.

இதனைத் தவிர்த்து, நீர்ப்பாசனம் மற்றும் இடுபொருள்களை துல்லியமாக பயிர்களுக்கு கிடைக்கச் செய்து, குறைந்த செலவில் அதிக விளைச்சல் மற்றும் வருமானம் தரும் திட்டமே துல்லிய பண்ணைத் திட்டமாகும்.

இத் திட்டத்தின் கீழ் 2012-2013 ஆம் ஆண்டு விவசாயிகளின் நிலங்களில் 200 ஏக்கர் பரப்பில் சொட்டுநீர் பாசனம் (உரம் கரைத்து இடும் டேங்க்) உள்பட அமைக்கப்பட்டு காய்கறி பயிர்கள் சாகுபடி செய்யப்படவுள்ளன.

வெண்டை, கத்தரி, தக்காளி மற்றும் மிளகாய் ஆகிய பயிர்களை சாகுபடி செய்யும் விவசாயிகள், இதற்கென தேர்வு செய்யப்பட்டு தற்போது சொட்டுநீர் பாசனக் கருவிகள் அமைக்கப்பட உள்ளன. இதற்கென நுண்ணீர்ப் பாசனத் திட்டத்தின் கீழ் சிறு, குறு விவசாயிகளுக்கு ரூ. 43,816 மானியமும் இதர விவசாயிகளுக்கு 75 சதவீதம் மானியமும் அளிக்கப்படுகிறது.
பயிர் சாகுபடிக்கென வீரிய ஒட்டுரக விதை மற்றும் நீரில் கரையும் உரங்கள் ஒரு ஹெக்டேருக்கு ரூ. 20 ஆயிரம் மானியத்தில் வழங்கப்பட உள்ளது. மேலும், தேர்வு செய்யப்பட்ட விவசாயிகளுக்கு துல்லியப் பண்ணையம் அமைப்பது குறித்து தமிழ்நாடு வேளாண்மை பல்கலைக்கழகம் மூலம் பயிற்சி அளிக்கப்பட உள்ளது.

எனவே காய்கறி பயிர்களில் துல்லிய பண்ணையம் அமைத்து, அதிக வருமானம் பெற விரும்பும் விவசாயிகள் தங்களது பகுதி வட்டார தோட்டக்கலைத் துறை அலுவலர்களை தொடர்புகொண்டு பயன்பெறலாம் என மாவட்ட தோட்டக்கலைத் துறை துணை இயக்குநர் இருளப்பன் தெரிவித்துள்ளார்.

தினமணி செய்தி – தோட்டக்கலை துணை இயக்குநர் எஸ். இருளப்பன்

வேளாண் பல்கலை இணைய தளத்தில் துள்ளிய பண்ணைத்திட்டம்

 

வேளாண் அரங்கம் மார்க்கெட்டில்

தமிழ்நாடு வேளாண் பல்கலை

வேளாண் அறிவியல் மையம் – குன்றக்குடி

தரிசு, களர், உவர் நிலங்களை மானிய உதவியுடன் சீரமைக்கலாம்

வேலூர் மற்றும் திருவண்ணாமலை மாவட்டங்களில், ஒருசில கிராமங்களில், சாகுபடி செய்யும் நிலங்களில் களர் மற்றும் உவர் நிலப் பிரச்னைகள் காணப்படுகின்றன.

அதனால் பயிர் எண்ணிக்கை பராமரிக்க முடியாமலும், இடப்படும் எரு, உரங்கள் மற்றும் நீர் வேரினால் உறிஞ்ச முடியாத தன்மையாலும் பயிர் வளர்ச்சி குன்றியும், நுண்ணூட்டச் சத்து பற்றாக்குறையால் பெரும் மகசூல் இழப்பும் ஏற்படுகிறது.

என்ன செய்ய வேண்டும்?

களர் மற்றும் உவர் நிலச் சீர்திருத்தம் செய்ய நிலம் 25 முதல் 30 சென்ட்  பரப்புக்குட்பட்டதாக இருக்க வேண்டும்.

பெரிய நிலமாக இருந்தால் நடுவில் வாய்க்கால் அமைக்கலாம். நிலத்தின் சரிவுக்கு ஏற்ப வடிகால்கள் அமைக்க வேண்டும்.

வயலின் பரப்பிற்கேற்ப ஜிப்சத்தை கணக்கிட்டு பரவலாக இட்ட பிறகு சுமார் 10 செ.மீ. நீர் தேக்கி நன்கு உழவு செய்ய வேண்டும்.

நிலத்தில் தேக்கிய நீர் தானாகவே மண்ணில் ஊறி வடிகாலில் சேரும்படி செய்ய வேண்டும். இதற்கு ஓரிரு நாள்களாகலாம். மீண்டும் குறைந்தபட்சம் இதை 4 முறையாவது செய்ய வேண்டும்.

பிறகு மண்ணில் ஈரம் காய்வதற்கு முன் சணப்பு அல்லது தக்கை பூண்டை விதைத்து பூக்கும் சமயத்தில் மடக்கி உழ வேண்டும். பின்னர் வழக்கம்போல் விவசாயிகள் விரும்பும் பயிரை சாகுபடி செய்யலாம்.

மானியம்

தமிழக அரசு களர், உவர் நிலச் சீர்திருத்த திட்டத்தின் மூலம் களர், உவர் நிலங்களால் பாதிக்கப்பட்ட வயல்களில் மண் மாதிரி எடுத்து அதன் பரிந்துரை அடிப்படையில் ஜிப்சம் மற்றும் ஜிங் சல்பேட் உரங்கள் 50 சதவீத மானியத்தில் வழங்குகிறது.

மேலும் வடிகால் அமைக்க ஊக்கத் தொகையாக ஒரு ஏக்கருக்கு ரூ.1,000 மானியம் வழங்கப்படுகிறது.

வேலூர்

தற்போது 2010-11-ம் ஆண்டில் இத்திட்டம் வேலூர் மாவட்டத்தில் காவேரிப்பாக்கம் ஒன்றியத்தில் புதுப்பட்டு, வேடல், அன்வர்திகான்பேட்டை, கைலாசபுரம் சாலை, மின்னல், வையலாம்பாடி, சேரி ஐயம்பேட்டை, தச்சம்பட்டறை மற்றும் பெருவளையம் கிராமங்களில் செயல்படுத்தப்பட்டு வருகிறது.

திருவண்ணாமலை

திருவண்ணாமலை மாவட்டத்தில் கலசப்பாக்கம், ஒன்றியத்தில் லாடாவரம், சிறுவள்ளூர், வீரளூர், கிடாம்பாளையம், காம்பட்டு, படாகம் மற்றும் அனையாலை, சேத்துப்பட்டு ஒன்றியத்தில் பிலாசூர், கொரல்பாக்கம், கரைப்பூண்டி, மட்டப்பிறையூர் மற்றும் ராந்தம் ஆகிய கிராமங்களில் செயல்படுத்தப்பட்டு வருகிறது என சிவகுமார் சிங் தெரிவித்துள்ளார்.

தினமணி தகவல் – திரு சிவகுமார் சிங், வேளாண்மை உதவி இயக்குநர், வேலூர்

மறைக்கப்படும் மானியத் திட்டங்கள்!

தோட்டக்கலைத்துறை மூலம் வழங்கப்படும் மானியத் திட்டங்கள் குறித்த விவரங்கள், பயன்கள், குறு மற்றும் சிறு விவசாயிகளுக்கு தெரியாமல் மறைக்கப்படுகிறது.

வேளாண்மை அமைச்சகத்தின் கட்டுப்பாட்டில் தனித்துறையாக தோட்டக்கலைத்துறை செயல்பட்டு வருகிறது. விவசாயத்தில் பணப்பயிர் சாகுபடியை ஊக்குவிப்பதற்காக வேளாண்மைத் துறையில் இருந்து பிரித்து தோட்டக்கலைத்துறை ஏற்படுத்தப்பட்டது.

மா, பலா, கொய்யா, சப்போட்டா உள்ளிட்ட பழ சாகுபடி, ரோஜா, மல்லிகை, சம்பங்கி உள்ளிட்ட மலர் சாகுபடி, முருங்கை, தக்காளி, புளி உள்ளிட்ட காய்கறி சாகுபடி செய்யும் விவசாயிகளை ஊக்குவிக்கும் வகையில் தோட்டக்கலைத்துறை மூலம் அதிகபட்சமாக 50 சதம் வரை மானியம் வழங்கப்படுகிறது.

பழ வகை மரங்கள் சாகுபடியில் பெரு விவசாயிகள் மட்டுமே ஈடுபடுகின்றனர்.

இதனால் தோட்டக்கலைத் துறையின் மூலம் உள்ள மானியத் திட்டங்கள் குறித்து நன்கு அறிந்துகொண்டுள்ளனர். குறு மற்றும் சிறு விவசாயிகளில் பலர் மல்லிகை, சம்பங்கி உள்ளிட்ட மலர் சாகுபடியில் ஈடுபட்டுள்ளனர். ஆனால் இவ் விவசாயிகளுக்கு இந்த மானியத் திட்டங்கள் குறித்த விவரங்கள் தெரிவதில்லை.

இதனால் ஒவ்வொரு ஆண்டும் தோட்டக்கலைத்துறைக்கு ஒதுக்கப்படும் நிதியில் 80 சத தொகை பெரு விவசாயிகளையே சென்றடைகிறது.

அமைச்சர்கள், எம்எல்ஏக்கள், மருத்துவர்கள், தொழிலதிபர்கள் ஆகியோரின் பண்ணை வீட்டுத் தோட்டங்களில் ஒவ்வொரு ஆண்டும் பழ மர சாகுபடி நிலப்பரப்பை அதிகரித்துக்கொள்ளவே இத் திட்டம் உதவுகிறது.

மாவட்டத்தில் எப்போதாவது ஒரு முறை, எங்காவது சில ஒரு இடங்களில் மட்டுமே நடைபெறும் சிறப்பு மனுநீதி நாள் முகாம்களில் 4 மணி நேரம் அரங்கு அமைத்து திட்டங்கள் குறித்து அங்குவரும் சில விவசாயிகளிடம் மட்டும் தெரிவிப்பதனால் மானியத் திட்டங்கள் குறித்த விவரங்களை அனைத்து விவசாயிகளும் அறிந்துகொள்ள முடியாது.

மல்லிகை, சம்பங்கி போன்ற மலர் சாகுபடியில் குறு மற்றும் சிறு விவசாயிகள் பெருமளவில் ஈடுபட்டுள்ளனர். பொருளாதார நெருக்கடியில் சிக்கிப் பரிதவித்துவரும் சிறு, குறு விவசாயிகள் உணவுக்கு ரேசன் அரிசி வாங்கிகொண்டு, தங்களது நிலங்களில் பணப் பயிர்களை சாகுபடி செய்துவருகின்றனர்.

இப்பயிர் சாகுபடிக்கு அரசு மானியம் வழங்குகிறது என்ற விவரம் பெரும்பாலான விவசாயிகளுக்குத் தெரிவதில்லை.

அரசின் மானியத் திட்டங்கள் சென்றடைவதன் மூலம் இவ்விவசாயிகளின் பொருளாதார நிலை சிறிதளவேனும் மேம்படும்.

இதற்கு வேளாண் விரிவாக்க மையங்கள் போன்று ஒவ்வொரு ஊராட்சி ஒன்றியத்திலும் தோட்டக்கலைத் துறைக்கும் தனி அலுவலகத்தை ஏற்படுத்த வேண்டும்.

இது இப்போதைக்கு சாத்தியமில்லை எனில் ஒவ்வொரு ஊராட்சி ஒன்றியத்திலும் தோட்டக்கலைத் துறையின் சேவை மையங்களை ஏற்படுத்த வேண்டும்.

தமிழக அரசு பொறுப்பேற்றவுடன் அறிவித்த விவசாய கடன் தள்ளுபடி திட்டத்தால் குறு மற்றும் சிறு விவசாயிகளுக்கு பயனில்லை என்ற விவாதம் கடந்த 4 ஆண்டுகளாக தொடர்ந்துகொண்டிருக்கிறது.

இதேபோல் பெருமளவில் மானியத் திட்டங்களை கொண்டுள்ள தோட்டக்கலைத் துறையின் திட்டங்களும் குறு மற்றும் சிறு விவசாயிகளுக்கு எந்த பயனையும் அளிக்கவில்லை என்ற விவாதமும் விவசாயிகளால் முன்வைக்கப்படும் நிலை உருவாகியுள்ளது.

தினமணி தகவல் – கே.விஜயபாஸ்கர்

முந்திரி சாகுபடியில் புதிய தொழில்நுட்பம்: அரசு மானியம்

தரிசு நிலத்தின் தங்கம் எனப்படும் முந்திரி பண்ருட்டிக்கு அதிக அளவில் அந்நிய செலவாணியை ஈட்டிக்கொடுத்து, கிராமப்புற பொருளாதாரத்தை மேம்படுத்தியுள்ளது. தற்போது முந்திரி சராசரி மகசூல் ஹெக்டருக்கு 700 கிலோ என்ற அளவில் உள்ளது. இது தேசிய சராசரியை ஒப்பிடும் போது மிகவும் குறைவு. முந்திரியில் ஹெக்டருக்கு 2000 கிலோ மகசூல் எடுக்க கீழ்க்கண்ட புதிய தொழில்நுட்பங்களை பின்பற்ற வேண்டும்.

ஒட்டு முந்திரி கன்றுகளை (வி.ஆர்.ஐ.3), 5மீ ல 4மீ இடைவெளியில் ஹெக்டருக்கு 500 கன்றுகள் வீதம், ஜூலை, ஆகஸ்ட் மாதத்தில் நடவு செய்ய வேண்டும். நடவு குழியில் மேல் மண்ணுடன் 10 கிலோ மக்கிய தொழு உரம், 1 கிலோ வேப்பம் பிண்ணாக்கு கலந்து குழியை நிரப்ப வேண்டும். 3 முதல் 6 மாதம் வயதுள்ள கன்றுகளை மட்டும் நடவு செய்ய வேண்டும். நடவின் போது ஒட்டு கட்டியப் பகுதி தரைமட்டத்தில் இருந்து 5 செமீ மேலேயும், அப்பகுதி உடையாமலும், நேராகவும் வளர திடமான ஊன்று குச்சிகளை நட்டு கயிற்றால் கட்ட வேண்டும்.

பண்ருட்டி வட்டாரத்தில் புதிய பரப்பில் ஒட்டு முந்திரி பயிர் செய்தால் ஹெக்டருக்கு முதல் வருடம் ரூ.19,710-க்கு தோட்டக்கலை பண்ணையில் இருந்து முந்திரி செடிகளும், தமிழ்நாடு அரசு டான்கோப் மூலம் இடுபொருள்கள், நடவு மற்றும் பராமரிப்பு செலவும் வழங்கப்படும்.

மேற்கண்ட முறையில் முந்திரி நடவு செய்ய விருப்பம் உள்ள விவசாயிகள் தங்கள் பகுதி உதவி தோட்டக்கலை அலுவலர்களை தொடர்பு கொள்ளலாம். மேலும் பண்ருட்டி எல்.என்.புரத்தில் உள்ள வேளாண்மைத் துறை வளாகத்தில் உள்ள தோட்டக்கலை உதவி இயக்குநர் அலுவலகத்தில் விவசாயிகள் தேவை பதிவேடு பராமரிக்கப்படுகிறது. இதில் முன்பதிவு செய்து பயனடையும்படி வி.ராமலிங்கம் தெரிவித்துள்ளார்.

தினமணி தகவல் : திரு வி.ராமலிங்கம், தோட்டக்கலை உதவி இயக்குநர், பண்ருட்டி

மானிய விலையில் நெல் விதை

2010-11-ம் ஆண்டுக்கு விவசாயிகளுக்குச் சான்று பெற்ற விதைநெல், கிலோவுக்கு ரூ.5 மானியம் வழங்கப்படும். 10 ஹெக்டேரில் செம்மை நெல் சாகுபடியைக் குழுக்களாகச் செய்யும் விவசாயிகளுக்கு ரூ.30 ஆயிரம் மானியம் வழங்கப்படும்.

நெல்லில் ஒருங்கிணைந்த பயிர்பாதுகாப்பு பணிகள் மேற்கொள்ள, உழவர் வயல்வெளிப் பயிற்சிப் பள்ளிகள் நடத்தி ஒரு உழவருக்கு மானியம் ரூ.17 ஆயிரம் வழங்கப்படும். 30 விவசாயிகளுக்கு வயல்வெளிகளில் பூச்சிநோய் கண்காணிப்பு முறைகள் மேற்கொள்ளவும், பூச்சி மற்றும் நோய்த் தன்மை அறிந்து இயற்கை எதிரிகளை வயல்வெளிகளில் அழிக்காமல் பயிர் பாதுகாப்பு நடவடிக்கை மேற்கொள்ளவும் வகுப்புகள் நடத்தப்படுகிறது.

இத்திட்டத்தின் மூலம் சிக்கனமான செம்மைநெல் சாகுபடி முறைகளை விவசாயிகள் கையாண்டு, அதிக மகசூல் பெறுவதே நோக்கம் ஆகும்.

விவசாயிகள் அருகில் உள்ள வேளாண் அலுவலர்களை அணுகி அரசு வழங்கும் மானியங்களையும் பயிற்சிகளையும் பெற்றுப் பயனடையுமாறு கேட்டுக் கொள்ளப்படுகிறார்கள் என்றும் செய்திக் குறிப்பு தெரிவிக்கிறது.

தினமணி தகவல் : திரு. ச.இளங்கோவன், வேளாண் இணை இயக்குநர், கடலூர்

அதிக லாபம் தரும் சப்போட்டா

வறட்சியைத் தாங்கி வளரக்கூடிய பழ மரமாக சப்போட்டா விளங்குகிறது. ஆண்டுக்கு 2 முறை அறுவடை செய்யக்கூடிய இந்தப் பழ மரத்தின் பராமரிப்பு செலவு மிகக் குறைவாகும். சாகுபடி காலங்களில் அதிகக் கூலியாள்களும் தேவையில்லை. முக்கியமாக, தண்ணீர் அதிகம் தேவைப்படாது.

இதன் சாகுபடிக்கு சொட்டு நீர்பாசன முறை சிறப்பானது என வேளாண் அலுவலர்கள் பரிந்துரைக்கின்றனர். உரத் தேவையும் மிகக் குறைவு.  நட்ட 3 ஆண்டுகளில் காய்ப்புக்கு வரும்.  ஏக்கருக்கு 65 செடிகள் வரை நடலாம். சராசரியாக ஆண்டுக்கு 50 முதல் 100 கிலோ வரை மகசூல் கிடைக்கும். இந்தப் பழங்கள் கிலோ ரூ. 10-க்குக் குறையாமல் விலைபோகின்றன.

மார்ச் – ஏப்ரலில் பூத்து, 90 நாள்களில் காய்ப்புக்கு வரும். அடுத்து அக்டோபர்- நவம்பரில் பூத்துக் காய்க்கும். இதன் சாகுபடிக்கு அரசு வேளாண் துறையில் இருந்து சொட்டு நீர் பாசனம் அமைக்க 65 சத மானியம் அளித்து வருகின்றனர்.