புதினா சாகுபடி

புதினாவின் விவசாயப்பணி என்பது மிக எளிமையான சிறந்த தொழிலாகும். நிலவளம் உள்ள ஏழை நிலச் சுவான்தார்கள்கூட இந்தத் தொழிலின் மூலம் பெரும்பணம் திரட்டலாம் (நிறுவனம் சம்பந்தப்பட்ட தினமலர் செய்திகளில் இந்த மாதிரி superlativeகளைப் பயன்படுத்துகிறார்கள் – வே.அ). வளமான ஈரப்பதம் உள்ள மண் புதினா விவசாயத்திற்கு மிகவும் அவசியமாகும்.

படர்ந்து விரிந்த தென்னந்தோப்புகளில் நன்றாக நிலத்தை உழுதபின் மக்கிய கோழிக் கழிவுகளை ஏக்கருக்கு 5 டன் வீதம் முதலில் இடவேண்டும். இதன்பிறகு ஒரு மூடை டி.ஏ.பி.யும் ஒரு மூடை மூரேட் ஆப் பொட்டாசியமும் அடித்தள உரமாக இடவேண்டும். தென்னை மரங்களிலிருந்து நான்கடி தூரத்தில் 8 x 6 அடி பாத்திகளை வாய்க்கால் வசதிகளுடன் சீராக அமைக்க வேண்டும். ஒன்றரை அடி ஆழத்திற்கு பாத்திகளைத் தோண்டி, கிளறிவிட்டு, நீர் பாய்ச்சி, நடுவதற்கு தயார் செய்ய வேண்டும்.

நடுவதற்காக 20 செ.மீ. முதல் 25 செ.மீ. வரை நீளம் உள்ள புதினா தண்டுகளையும், கிளை விழுதுகளையும் பயன்படுத்தலாம். தண்டுகளைச் செங்குத்தாக நடவேண்டும். சுமார் ஐந்து செ.மீ. பதிந்து இருக்கும்படியும் அதில் ஒன்று அல்லது இரண்டு கணுக்கள் இருக்குமாறும் வேர் விடுவதற்கு ஏதுவாகப் பார்த்துக்கொள்ள வேண்டும்.

செடிக்குச் செடி, வரிசைக்கு வரிசை, 20 முதல் 25 செ.மீ. இடைவெளி இருக்க வேண்டும். நடுவதற்கு ஏற்ற காலம் ஜூலை மாதம் முதல் ஜனவரி மாதம் வரை உள்ளதாகும்.

நிலத்தின் ஈரத்தன்மையைப் பொறுத்து வாரத்திற்கு இருமுறை நீர் பாய்ச்ச வேண்டும். நட்ட 60 நாட்களில் கூரான கத்திகளால் புதினாவை அறுவடை செய்யலாம். வேரிலிருந்து 3 செ.மீ. விட்டு, 25-30 செ.மீ. நீளம் உள்ள தழைகளை அறுவடை செய்யலாம். அதைத் தொடர்ந்து அறுவடைகளை 55-60 நாட்கள் இடைவெளியில் மேற்கொள்ளலாம். அறுவடையைக் காலை 6 மணி முதல் 10 மணி வரையிலும் மாலையில் 4 மணி முதல் 6 மணி வரையிலும் செய்யலாம்.

அறுவடை செய்த தழைகளை அதே நாளில் விற்பனைக்கு கொண்டுசெல்ல வேண்டும். மேலும் அறுவடை செய்தவுடன் நிழல் உள்ள அறைகளில் போட்டு தென்னஞ் சோகைகளைக் கொண்டு மூடி, புதினாவின் புதுத்தன்மை மாறாமல் பார்த்துக்கொள்ள வேண்டும்.

ஒவ்வொரு அறுவடை முடிந்தபின், பதினைந்து நாட்களுக்குப் பிறகு மேலுரம் இடவேண்டும். இதற்காக ஏக்கருக்கு 20கிலோ டி.ஏ.பி., 20 கிலோ பொட்டாஷ், 10 கிலோ பாக்டம்பாஸ் ஆகியவற்றை 36 லிட்டர் தண்ணீரில் கரைத்து, பின் அதில் 400 லிட்டர் தண்ணீர் சேர்த்து, பாசன நீருடன் கலக்கும் விதத்திலான அமைப்பைச் செய்ய வேண்டும். இவ்விதம் ஒரு ஆண்டில் ஆறுமுறை செய்ய வேண்டிவரும். உரம் இடுவதற்கு முன்பே பதினைந்து நாட்களுக்கு ஒரு முறை களை எடுக்க வேண்டும். இவ்விதமான புதினா விவசாயம் மிக நல்ல பலனைக் கொடுக்கும்; பணப்பயிராக விளங்கும்.

(தினமலர் தகவல்: ஸ்பைசஸ் இந்தியா, கொச்சி. மூலம்: எம்.எஸ்.ராமலிங்கம், கோவை)
-எஸ்.நாகரத்தினம், விருதுநகர்

 

வேளாண் அரங்கம் மார்க்கெட்டில்

மானாவாரி தொழில்நுட்பத்தில் இயற்கை விவசாயி

தூத்துக்குடி மாவட்டம் எட்டயபுரம் அருகே சின்னமலைக்குன்று என்ற ஊரைச் சேர்ந்த முன்னோடி பண்ணையாளர் சென்னகேசவன் (98423 48915). இவர் 30 ஆண்டுகளுக்கும் மேலாக வேளாண்மையில் ஈடுபட்டு வருபவர். பல புதிய எளிய முறைகளை அறிமுகம் செய்பவர். ஆடு வளர்ப்பிலும், பண்ணைக்குடில் அமைப்பதிலும் அனுபவம் உள்ளவர்.
மானாவாரி விவசாயம்தான் மற்ற எல்லா வகை விவசாயத்தை விடவும் லாபகரமானது. வரவுசெலவு கணக்குப் பார்த்தால் நஞ்சையிலோ, தோட்டக்கால் விவசாயத்திலோ நாம் செலவழித்ததுகூட வருவதில்லை. ஆனால் மானாவாரி வேளாண்மையில் செலவுகள் மிகவும் குறைவு. வரவும் நன்றாகவே உள்ளது. ஆனால் இதை முறையாகச் செய்ய வேண்டும். முறை தவறிச் செய்தால் நமக்கு வருமானம் கிடைக்காது.

மானாவாரி தொழில் நுட்பத்தின் முதல் அடிப்படை நமது பகுதியின் மழை அளவு. எவ்வளவு மழை எப்போதெல்லாம் பெய்கிறது என்ற தகவல் திரட்டு நம்மிடம் இருக்க வேண்டும். நான் கடந்த 35 ஆண்டுகளுக் குரிய எங்களது பகுதிக்கான மழை அளவுப் பட்டியலை வைத்துள்ளேன். ரெயின்பால் எனப்படும் மழைப்பொழிவு இடத்திற்கு இடம் மாறுபடுகிறது. இதேபோல காலமும் மாறு படுகிறது. ஆனால் ஒரு இடத்தில் பெய்யும் மழையின் முறையானது கிட்டத்தட்ட தவறாமல் ஆண்டுதோறும் இருக்கிறது.
நீண்டநாள் பயிர்களையும் தேர்வு செய்யலாம். குறுகிய காலப் பயிர்களையும் தேர்வு செய்யலாம். நமது மண்ணின் நீர்பிடிப்புத் தன்மை, மழை அளவு ஆகியவற்றை வைத்து நாம் பயிர்களைத் தேர்வு செய்ய வேண்டும். நீண்டகாலப் பயிர்களான பருத்தி, மிளகாய் போன்றவற்றை நாம் தேர்வு செய்யும்போது மிக எச்சரிக்கையாக இருக்க வேண்டும். குறுகிய காலப்பயிர்களான பாசி, உளுந்து போன்றவற்றை தேர்வுசெய்து சாகுபடிசெய்வதால் சிக்கல் வருவது இல்லை.

நேரடி விதைப்பைத் தவிர்ப்பது நல்லது. மாட்டை வைத்து கொறுக்கலப்பை கொண்டு விதைகளை நேருக்கு நேராகப் போடவேண்டும். டிராக்டர் கொண்டு போடும்போது விதை மேலாக விழுந்துவிடும் அல்லது முளைக்க முடியாத ஆழத்தில் சென்றுவிடும். இதனால் முளைப்புத்திறன் குறைந்துவிடுகிறது. விதைநேர்த்தி கட்டாயம் செய்யவேண்டும். ஆவூட்டத்தில் ஊறவைத்து விதைநேர்த்தி செய்யும்போது மிகவும் பயன் கிட்டுகிறது. விரைவில் முளைக்கிறது.

கடைபிடிக்க வேண்டிய மண்வள நுட்பங்கள் – பெய்யும் மழை நீர், நிலத்தை விட்டு வெளியேறாமலும் அதே சமயம் வரப்புகள் உடையாமல் இருக்கும்படியாகவும் சம மட்ட வரப்புகள் அமைக்க வேண்டும். இதனால் சத்தான மண் அடித்துச் செல்லாமல் பாதுகாக்கப் படுகிறது. இதற்கடுத்ததாக வடிகால்களும் வாய்க்கால்களும் சீராக அமைக்க வேண்டும். அதாவது வரத்து நீருக்கும், போக்கு நீருக்கும் இடம் கொடுக்க வேண்டும். அடுத்ததாக சரிவுக்குக் குறுக்காக உழவேண்டும். சித்திரை மாதம் பெய்யும் மழையை விட்டுவிடாமல் உழுதுவைக்க வேண்டும். வரப்புகளை ஆண்டுதோறும் பலப் படுத்தி வரவேண்டும். பயிர் பாதுகாப்பு நடவடிக்கைகளுக்கு மூலிகைப் பூச்சிவிரட்டிகள் பயன்படுத்த வேண்டும்.
தினமலர் செய்தி -கே.சத்தியபிரபா, உடுமலை.

வேளாண் அரங்கம் – மார்க்கெட்

தன்னார்வலர்கள்

வேளாண் பொருட்கள்

 

வெள்ளைப்பொன்னி – வெள்ளை அரிசிக்கும் மென்னை வைக்கோலுக்கும்

இன்று பச்சரிசிக்குப் பெயர் பெற்ற பல நெல் ரகங்கள் இருந்தாலும் விவசாயிகள் ஆவணி, புரட்டாசியில் வெள்ளைப் பொன்னியைத்தான் சாகுபடி செய்கிறார்கள். இதன் தரமான விதைகள் விவசாய இலாகாவில் கிடைக்கின்றது. சாகுபடி செய்பவர்களில் பலர் தங்களிடம் கறவை மாடுகள் வைத்திருப்பார்கள். காரணம் வெள்ளைப் பொன்னியின் வைக்கோல் பஞ்சு போல் இருப்பதாகும். கறவை மாடுகளுக்கு பசும்புல் போட்டாலும் வைக்கோலும் போடப்படுகிறது. வெள்ளைப் பொன்னி ரகம் இக்காரணத்தால் சாகுபடி செய்யப்படுகின்றது. மேலும் வெள்ளைப்பொன்னி அரிசி சிறந்த பச்சரிசியாகவும் உள்ளது. அரவையில் குருணை விழுந்தாலும் வெள்ளைப் பொன்னி தொடர்ந்து சாகுபடியில் உள்ளது. சமைத்தவுடன் அரிசி பால் வெண்மை நிறம் கொண்ட சோறாகின்றது. இதனால் விவசாயிகள் இந்த ரகத்தை முல்லை அரும்பாக மலரும் வெள்ளைப்பொன்னி என்று அழைக்கின்றனர்.

இந்த ரகம் எல்லா மண் வகைகளிலும் சாகுபடி செய்வதற்கு ஏற்றது. விவசாயிகள் களர் நிலத்திலும் இதை சாகுபடி செய்து பலன் அடைந்துள்ளனர். நாற்றின் வேர்கள் களர் தன்மையைத் தாங்கி நாற்று பச்சைகட்டி விடுகின்றது.

வெள்ளைப்பொன்னி

வெள்ளைப்பொன்னி

விதைப்பு

வெள்ளைப் பொன்னியை சாகுபடி செய்ய 30 கிலோ விதை பயன்படுத்த வேண்டும். 8 சென்ட் பரப்பில் நாற்றங்கால் தயார் செய்து 20 கூடை மக்கிய தொழு உரம் இடவேண்டும். மேலும் 16 கிலோ டி.ஏ.பி. உரம் இடவேண்டும். நாற்று செழிப்பாக வரும். நடவு வயலுக்கு அதிக அளவு நன்கு மக்கிய இயற்கை உரம் இடவேண்டும். இதற்கு நான்கு ட்ரெய்லர் லோடு இயற்கை உரம் இடவேண்டும்.

நடவு – களை
விவசாயிகள் மரங்களின் தழைகளையும் சேற்றில் போட்டு மிதித்துவிடலாம். வெள்ளைப் பொன்னிக்கு இயற்கை உரங்கள் அதிகம் இட்டு ரசாயன உரத்தைக் குறைத்தால் பயிர் கீழே சாயாது. மேலும் பயிர் பாதுகாப்பு செலவும் குறையும். வயலில் டிஏபி அரை மூடை மற்றும் பொட்டாஷ் அரை மூடை, யூரியா 5 கிலோ இவைகளை இடலாம். நடவு வயலில் சரியாக அண்டை வெட்டி சீராக சமன் செய்ய வேண்டும். சமன் செய்த நிலத்தில் ஏக்கரில் 12 கிலோ ஜிங்க் சல்பேட்டினை தேவையான ஆற்று மணலுடன் கலந்து வயலில் சீராகத் தூவ வேண்டும். உடனே நாற்றினை வயலில் வரிசை நடவு போடவேண்டும்.

வரிசைக்கு வரிசை 9 அங்குலமும் வரிசையில் குத்துக்கு குத்து 9 அங்குலமும் இடைவெளி விட்டு 30 நாட்கள் வயதுடைய நாற்றினை குத்துக்கு இரண்டு நாற்றுக்கள் வீதம் நடவேண்டும். இவ்வாறு செய்தால் சாயும் தன்மை கொண்ட பயிரை வயலில் சாயாமல் நிற்க செய்யலாம். இதனால் கதிர்கள் வாளிப்பாக வரும். மகசூலும் அதிகம் கிடைக்கும். நட்ட பயிருக்கு இரண்டு முறை களையெடுக்க வேண்டும். நடவு நட்ட 25 நாட்களுக்கு பிறகு மேலுரமாக யூரியா 15 கிலோ, பொட்டாஷ் 15 கிலோ, வேப்பம் புண்ணாக்கு 3 கிலோ இடவேண்டும். சாகுபடி சமயம் பயிரை கண்காணித்து பூச்சி, வியாதிகள் வராமல் தடுக்க வேண்டும்.

இம்மாதிரியாக சாகுபடிசெய்தால் ஏக்கரில் 25 மூடைகள் (மூடை 75 கிலோ) மகசூலாகக் கிடைக்கும். மூடைக்கு விலை ரூ.675 வரை கிடைக்கும். நியாயமான விலை ரூ.750 இருந்தாலும் வியாபாரிகள் இந்த விலையைக் கொடுக்க மாட்டார்கள். விவசாயிகள் வைக்கோல் விற்பனையிலும் ரூ.1,125 வரை பெறமுடியும். வெள்ளைப் பொன்னி சாகுபடியில் செலவு போக நிகர லாபமாக ரூ.8000 வரை பெறமுடியும்.

வெள்ளைப்பொன்னியை காஞ்சிபுரம், செங்கல்பட்டு பகுதி விவசாயிகள் புரட்டாசியிலும் நாற்று விட்டு நடலாம். இப் பட்டத்தில் சாகுபடி செய்பவர்களது இளம்பயிர் ஐப்பசி – கார்த்திகை பட்டத்தில் பெய்யும் மழையில் மாட்டிக் கொள்ளும். இருப்பினும் தீங்கு எதுவும் ஏற்படுவது இல்லை. இளம் பயிர்களது மகசூல் திறன் அதிகரிக் கின்றது. இதனால் நல்ல மகசூல் கிடைக்கின்றது.

மேலும் நல்ல அனுபவம் பெற்ற இப்பகுதி விவசாயிகள் பயிர் தொண்டைக்கதிர் பருவம் வரும்போது ஒரு கிராம் பவிஸ்டின் மருந்தினை ஒருலிட்டர் நீரில் கலந்து தெளித்து பூஞ்சாள நோய் வராமல் தடுத்துவிடுகின்றனர். இந்த சிகிச்சைக்குப்பின் நெல்மணிகள் சவரன் நிறத்தை அடைகின்றது. இந்த விவசாயிகள் இயற்கை உரங்களோடு உயிர் உரங்களையும் (அசோஸ் பைரில்லம், பாஸ்போ பேக்டீரியா) உபயோகப் படுத்துகின்றனர்.

விவசாயிகள் கவனிக்க:

வெள்ளைப்பொன்னி சிறந்த பச்சரிசி ரகம். அரிசி பச்சரிசியாக இருந்தாலும் புழுங்கல் அரிசியாக இருந்தாலும் கலர் மங்கலாக இருக்காமல் வெண்மையாக இருப்பது குறிப்பிடத்தக்கது. சாகுபடியில் வெற்றியடைவது விவசாயிகளது திறமையைப் பொருத்து இருப்பதால் விவசாயிகள் திறமையாக செயல்பட வேண்டும்.

தினமலர் செய்தி -எஸ்.எஸ்.நாகராஜன்

பலன் தரும் பழப் பண்ணை

பழத் தோட்டம் என்பது நெடுங்கால முதலீட்டுத் திட்டமாகும். இதற்கு சீரிய முறையில் திட்டமிடுதல் அவசியமானது. அதிகபட்ச உற்பத்தியைப் பெறுவதற்குத் தகுந்த இடம், நிலப் பரப்பு, நடவு முறை, நடவு தூரம், ரகங்கள், நாற்றுகள் ஆகியவற்றைக் கவனத்துடன் தேர்தெடுக்க வேண்டும்.

நிலப் பரப்பு:

பழத் தோட்டம் அமைப்பதற்கான இடத்தை முறையாகத் தேர்வு செய்ய வேண்டும். ஏற்கெனவே பழங்கள் சாகுபடி செய்யப்படும் இடத்தில் அமைப்பதன் மூலம் பிற சாகுபடியாளர்களின் அனுபவத்தைப் பெறலாம். இதன் மூலம், பிற சாகுபடியாளர்களுடன் இணைந்து கூட்டுறவு முறையில் உற்பத்தி, விற்பனைக்கான வாய்ப்புக் கிடைக்கும்.

சாகுபடி செய்யப்படும் இடத்துக்கு அருகில் சந்தை இருக்க வேண்டும். தேர்வு செய்யப்படும் பழங்களை சாகுபடி செய்வதற்கான கால நிலையை உறுதி செய்ய வேண்டும். ஆண்டு முழுவதும் போதுமான நீர்ப் பாசன வசதி செய்து தர வேண்டும்.

தோட்டம் அமைப்பதற்கு முன் செய்ய வேண்டியவை:

மண்ணின் பொருந்து திறன், வளம், அடி மண்ணின் இயல்பு, மண்ணின் ஆழம் ஆகியவற்றை மதிப்பிட வேண்டும். மண்ணில் முறையான வடிகால் வசதி மற்றும் மழைக் காலங்களில் நீர் தேக்கமற்றதாகவும் இருக்க வேண்டும். சிறந்த தரமான பாசன நீர் அவசியம். தரை வழியாகவோ, இருப்புப் பாதை வழியாகவோ பொருள்களை எடுத்துச் செல்லும் வசதி இருக்க வேண்டும்.

சாகுபடி செய்யப்படும் பழங்களுக்கு சந்தையில் நிலையான தேவை உள்ளதா என்பதை ஆராய்ந்து சாகுபடி செய்ய வேண்டும்.

முதல் கட்ட செயல்கள்:

சாகுபடிக்கேற்ற இடம், நிலப் பரப்பு ஆகியவற்றைத் தேர்வு செய்த பின்னர் நிலத்தில் உள்ள மரங்களை வேர்களுடன் அகற்ற வேண்டும். புதர்கள், களைகளையும் அகற்ற வேண்டும். நிலத்தை நன்கு உழுது சமன் செய்து எரு இட வேண்டும். நீர்ச் சிக்கனத்துக்கும், மண் அரிப்பைத் தடுக்கவும் நிலத்தை சமன் செய்ய வேண்டியது அவசியமானது. மலைப் பகுதிகளில் நிலத்தை அடுக்கு நிலங்களாகப் பிரித்து சமன் செய்ய வேண்டும். வளம் குன்றிய மண்ணாக இருந்தால் நடவு செய்வதற்கு முன் பசுந்தாள் எருப்பயிரை வளர்த்து நிலத்துடன் சேர்த்து உழுது மண்ணின் தரத்தை உயர்த்தலாம்.

பழத் தோட்டத்தை திட்டமிடுதல்:

ஓர் அலகு நிலத்தில் அதிக எண்ணிக்கை மரங்களை நடுவதற்கான போதுமான இடைவெளி அமைக்க வேண்டும். சேமிப்பு அறை மற்றும் அலுவலகக் கட்டடத்தை பழத் தோட்டத்தின் மத்தியில் அமைத்து முறையாகக் கண்காணிக்க வேண்டும். நான்கு ஹெக்டேர்களுக்கு இரண்டு என்ற விகிதத்தில் கிணறுகள் தேவையான ரகங்களில் அமைக்க வேண்டும்.

ஒவ்வொரு பழ வகையையும் தனித் தனி பகுதிகளில் நடவு செய்ய வேண்டும். ஒரே காலத்தில் கனியும் பழங்களை ஒரு குழுவாக இணைக்க வேண்டும். இலையுதிர் வகை பழ மரங்களுக்கு இடையே சில மகரந்தத்தைத் தருவிக்கும் மரங்களை நட வேண்டும். இந்த மரங்களை ஒவ்வொரு மூன்று வரிசையிலும் மூன்றாவது மரமாக நட வேண்டும்.

சாய்வு முறையில் பாசன வாய்க்கால்களை அமைப்பதால் நீரைச் சேமிக்கலாம். ஒவ்வொரு 30 மீட்டர் நீள வாய்க்காலுக்கும் 7.5 செ.மீ. சரிவு ஏற்படுத்த வேண்டும்.

போக்குவரத்துப் பாதைகள் குறைந்தபட்ச இடத்தையே ஆக்கிரமித்திருக்க வேண்டும். முதல் வரிசை மரங்களுக்கும் காற்றுத் தடுப்பு வேலிக்கும் இடையே உள்ள இடத்தைப் பாதையாகப் பயன்படுத்தலாம்.

முன்பக்கத்தில் குறுகிய வளர்ச்சியுடைய மரங்களையும், பின்பக்கத்தில் உயரமாக வளரும் மரங்களையும் வளர்ப்பதால் எளிதாகக் கண்காணிக்கப்படுவதோடு பார்வைக்கும் உகந்ததாக இருக்கும்.

பசுமை மாறா மரங்களை முன் பகுதியில் இடம் பெறச் செய்ய வேண்டும். பறவைகள் மற்றும் விலங்குகளை ஈர்க்கும் மர வகைகள் காவலாளியின் கொட்டகைக்கு அருகிலேயே இடம் பெற வேண்டும்.

ஒரு நல்ல வேலி அவசியம். உயிர் வேலியே சிறந்த பயன்தரும். வறட்சி எதிர்ப்புத் திறன் விதையின் மூலம் சுலபமான பயிர் பெருக்கம், விரைவான வளர்ச்சி, அடர்த்தியான இலைகள், கடும் கவாத்துக்கு தாங்கும் திறன் உடைய செடிகளை உயிர் வேலிக்கு தேர்வு செய்யலாம். கற்றாழை, கருவேல மரம், கொடுக்காப்புளி மரம், அலரி ஆகியவற்றை வரிசைகளில் நெருக்கமாக நட்டு சிறந்த உயிர் வேலியாகப் பயன்படுத்தலாம்.

உயிர் வேலி

உயிர் வேலி

காற்றுத் தடுப்பு வேலிகளைப் பழத் தோட்டத்தைச் சுற்றிலும் பல வரிசைகளில் நடுவதன் மூலம் காற்று அதிகம் வீசும் தருணங்களில் தோட்டத்துக்குச் சிறந்த பாதுகாப்பாக அமையும்.

காற்றுத் தடுப்பு வேலிக்குத் தேர்வு செய்யப்படும் மரங்களை செங்குத்தாகவும், உயரமாகவும், விரைவாக வளரக் கூடியதும் கடின வறட்சியை எதிர்க்கவல்ல உறுதியான மரங்களை தேர்வு செய்ய வேண்டும். சவுக்கு, வெண்ணாங்கு, அசோக மரம், தையில மரம், சவுக்கு, வேம்பு ஆகிய மரங்களைக் காற்றுத் தடுப்பு வேலியாகப் பயன்படுத்தலாம்.

இவை மட்டுமல்லாது பழத் தோடங்களின் வடிவமைப்புகளில் செங்குத்து வரி நடவு அமைப்பு, ஒன்று விட்டு ஒன்றான வரி நடவு அமைப்பு, நடவு இடைவெளி ஆகியவற்றையும் உரிய பரிந்துரைகளுக்கேற்ப கையாள வேண்டும். மேலும், விவரங்களுக்கு அந்தந்தப் பகுதியில் உள்ள தோட்டக்கலைத் துறை அலுவலகங்களை நேரில் அணுகி தெரிந்து கொள்ளலாம்.

தினமணி செய்தி

காய்கறி பயிர்களுக்கான நாற்றங்காலை பராமரிப்பது எப்படி?

காய்கறி பயிர்களைப் பயிரிடும்போது நாற்றங்காலை முறையாக பராமரிப்பதன் மூலம் அவற்றை பூச்சி தாக்குதல்களில் இருந்து கட்டுப்படுத்த முடியும்.

விவசாயிகள் விளைவிக்கும் காய்கறிகள் பசுமையாகவும், தரமாகவும் இருக்க வேண்டும்.

இதற்கு ரசாயனத் தன்மையுள்ள உரங்களையும், பூச்சிக் கொல்லி மருந்துகளையும் முற்றிலுமாகத் தவிர்க்க வேண்டும்.

அதற்கு பதிலாக, அங்கக உரங்களையும், உயிரக பூச்சிக் கொல்லிகளையும், தாவர பூச்சிக் கொல்லிகளையும் பயன்படுத்தி காய்கறி பயிர்களை சாகுபடி செய்ய கற்றுக்கொள்வது விவசாயிகளுக்கு அவசியமானதாகும்.

“ஆடிப் பட்டம் தேடி விதை’ என்ற பழமொழிக்கு ஏற்ப விவசாயிகள் ஆடி மாதத்தில் காய்கறி விதைகளை விதைத்து வருகின்றனர்.

தற்போது நாற்றங்கால் நிலையில் உள்ள காய்கறி பயிர்களை பூச்சி மற்றும் நோய்களில் இருந்து காக்கும் முறைகள் பற்றியும், மகசூலை அதிகரிக்க வேர் வளர்ச்சியின் அவசியத்தையும் விவசாயிகள் அறிந்து வைத்திருப்பது நல்லது.

காய்கறி பயிர்களில் கத்தரி, மிளகாய், தக்காளி போன்றவற்றை நாற்று விட்டும், வெண்டை, அவரை மற்றும் கீரை வகைகளை விதை விதைத்தும் பயிர் செய்யப்படுகிறது.

கத்தரி, மிளகாய், தக்காளி போன்ற காய்கறி பயிர்களை சாதாரணமாக மண்ணில் நாற்றுவிட்டு நாற்றங்காலை பராமரிக்கலாம்.

அவ்வாறு பராமரிக்கும்போது ஒரு சதுர மீட்டர் நாற்றங்கால் பரப்பளவுக்கு 10 கிலோ தொழு உரம், 50 கிராம் வேப்பம் புண்ணாக்கு, 5 கிராம் “அசோஸ்பைரில்லம்’, 5 கிராம் பாஸ்போ பாக்டீரியா மற்றும் வேம் என்று சொல்லக்கூடிய “மைக்கொரைசா’ என்ற பூஞ்சாணத்தையும் இட்டு நாற்றங்காலை பராமரிக்கலாம்.

இதனால், நாற்றங்காலில் உள் பயிரின் வேர் வளர்ச்சி நன்கு தூண்டுவதோடு மட்டுமன்றி வேரில் தோன்றக் கூடிய வேர் பூச்சிகள், வேர் அழுகல் நோய்களும் கட்டுப்படும்.

விதைத்த 20 நாள்களுக்குள் நாற்றங்காலில் ஒரு சதுர மீட்டர் பரப்பளவுக்கு ஒரு கிலோ டிரைக்கோடெர்மா என்ற நன்மை தரும் பூஞ்சாணத்தை 10 கிலோ நன்கு மக்கிய தொழு உரத்துடன் வேர்பகுதிகளில் இடுவதால் “பித்தியம்’ என்ற வேர் அழுகல் நோய் வராமல் தடுக்கப்படுகிறது.

நாற்றங்காலில் தண்ணீர் தேங்கி நிற்காமல் பார்த்துக் கொள்வது மிக அவசியமானது. தண்ணீரை பூ வாளி மூலம் நாற்றங்கால் மீது தெளிப்பது சிறந்தது.

நாற்றங்காலின் வளர்ச்சிக்கு ஒரு சதுர மீட்டர் பரப்பளவுக்கு சூப்பர் பாஸ்பேட் 100 கிராம் மற்றும் கார்போபியூரான் மூன்று சத குருனை மருந்தினை 10 கிராம் என்ற அளவில் இடுவதால் வேரில் நூற்புழுக்களின் தாக்குதலை தவிர்க்கலாம்.

குழித் தட்டு மற்றும் நிழல் வலை முறையில் வளர்க்கப்படும் நாற்றாங்கால்.

குழித் தட்டு மற்றும் நிழல் வலை முறையில் வளர்க்கப்படும் நாற்றாங்கால்.

குழித்தட்டு முறை:
நாற்றங்காலை குழித்தட்டு முறையிலும் உருவாக்கலாம். இந்த முறையில் அனைத்து நாற்றுக்களும் நோய் மற்றும் பூச்சிகளின் தாக்குதலில் இருந்து எதிர்ப்புத் தன்மையோடு காணப்படும்.

ஒரு குழித்தட்டில் 98 குழிகள் இருக்கும். இந்த குழித்தட்டானது பிளாஸ்டிக்கால் ஆனது. இதை எளிதில் மக்கச் செய்ய முடியும். மேலும் குழித்தட்டு நாற்றங்காலை ஒரு இடத்திலிருந்து மற்றொரு இடத்துக்கு எளிதாக எடுத்துச் செல்ல முடியும்.

குழித்தட்டு நாற்றங்காலை நிழல் வலைகளில் தேவையான வெப்பநிலைகளில் சீராக நீர் தெளிப்பு முறையின் மூலம் அதிக அளவில் ஆரோக்கியமாக உருவாக்கலாம்.

ஒவ்வொறு குழித்தட்டிலும் நன்கு சலித்த மண் இரண்டு பங்கு, கம்போஸ்ட் உரம் ஒரு பங்கு, தேங்காய் நார் கழிவு உரம் ஒரு பங்கு ஆகியவற்றை கலந்து இட வேண்டும்.

இவைகளுடன் ஒரு கிலோ டிரைக்கோடெர்மா என்ற உயிரக பூஞ்சாண மருந்தையும் சேர்க்க வேண்டும்.

அங்கக உரங்களில் தேங்காய் நார் கழிவு உரம் காய்கறி நாற்றங்கால் பராமரிப்புக்கு மிகவும் முக்கியமானது. ஏனெனில், மற்ற அங்கக உரங்களை ஒப்பிடும்போது தேங்காய் நார் கழிவு உரத்தில் அதிக அளவில் கரிம சத்து உள்ளது. தேங்காய் நார் கழிவு உரம் கிடைக்காத தருணத்தில் மண்புழு உரம் அல்லது தொழு உரம் அல்லது சர்க்கரை ஆலை கழிவு உரம் போன்றவற்றை பயன்படுத்தலாம் என்றார் அவர்.

தினமணி தகவல் – புதுச்சேரி காமராஜர் வேளாண்மை அறிவியல் நிலைய பூச்சியியல் வல்லுநர் நி.விஜயகுமார்

வேளாண் அரங்கம் மார்க்கெட்டில்

 

விவசாயிகள் வாழ்வை வளமாக்கும் செம்மை கரும்பு சாகுபடி

கரும்பு விளைச்சலை அதிகரிக்கவும், விவசாயிகளுக்கு நல்ல லாபம் கிடைக்கவும் செம்மை கரும்பு சாகுபடி முறை அறிமுகம் செய்யப்பட்டுள்ளது.

செம்மை கரும்பு சாகுபடியானது கரும்பு சாகுபடியில் புதிய அணுகுமுறை மற்றும் நீர்சேமிப்பு வழிகளில் புதிய முயற்சியாகும். இதில் விளைச்சலை அதிகப்படுத்தும் உத்தியோடு தண்ணீர் சேமிப்பு குறித்தும் முக்கியத்துவம் தரப்பட்டுள்ளது. இதனால் உற்பத்தி அதிகரிப்பதோடு நீர் நிலை ஆதாரங்கள் மற்றும் சுற்றுச்சூழல் மேம்பாட்டுக்கும் உறுதுணையாய் இவை இருக்கும்.

செம்மை கரும்பு சாகுபடியானது குறைந்த அளவு விதை நாற்றுகள் மற்றும் குறைந்த அளவு தண்ணீரை உபயோகிப்பது, சரியான அளவு ஊட்டச்சத்து, பயிர் பராமரிப்பின் மூலம் அதிக மகசூல் பெற வழிவகை செய்யும் ஒரு முறையாகும்.

முக்கிய கோட்பாடுகள்:

  • ஒரு விதைப்பரு சீவல்களில் இருந்து நாற்றங்கால் அமைத்தல்,
  • இளம் (25-35 நாள்கள் வயதான) நாற்றுக்களை நடவு செய்தல்,
  • வரிசைக்கு வரிசை 5 அடி இடைவெளியும், நாற்றுக்கு நாற்று 2 அடி இடைவெளியும் பராமரித்தல்,
  • சொட்டுநீர்ப்பாசனத்தின் கீழ் உரமிடுதல்,
  • இயற்கை சார்ந்த உரங்கள், பயிர்பாதுகாப்பு, மற்றும் பராமரிப்பு முறைகளுக்கு முக்கியத்துவம் அளித்தல்,
  • ஊடு பயிரிட்டு மண் வளம் மற்றும் மகசூல் அதிகரிக்க வழி செய்தல்.

சாகுபடியின் பயன்கள்:

  • தண்ணீர் உபயோகிப்பு திறன் கூடுகிறது,
  • சரியான அளவு உரங்களை உபயோகிப்பதின் மூலம் பயிர்களுக்கு ஊட்டச்சத்து பராமரிப்பு அமைக்கிறது,
  • காற்று மற்றும் சூரிய ஒளி அதிகளவு பயிர்களுக்கு கிடைக்கிறது,
  • அதனால் கரும்பில் சர்க்கரை கட்டுமானம் அதிகரிக்கிறது,
  • மொத்த சாகுபடி செலவு குறைகிறது,
  • ஊடுபயிர் மூலம் இரட்டை வருவாயுடன் மகசூலும் அதிகரிக்கிறது

விதை நேர்த்தி – நாற்று தயார் செய்ய கடைப்பிடிக்க வேண்டியவை:

6 மாத வயதுள்ள உயர் விளைச்சல் தரும் ரகங்களில் இருந்து மொட்டுக்களை சேகரிக்க வேண்டும், விதை மொட்டுக்களின் முளைப்புத் திறனை தூண்டும் வகையில் 1 கிலோ யூரியா 50 கிராம் கார்பென்டாசிம் 200 மி.லி மாலத்தியான் 100 லி. நீரில் கலக்க வேண்டும். அதில் 5000 மொட்டுக்களை நன்கு நனையும்படி 15 நிமிடம் ஊறவைத்து பின் நிழலில் உலர வைக்க வேண்டும்.

ரசாயனமுறை தவிர்த்து உயிரியல் முறையிலும் விதை நேர்த்தி செய்யலாம், இதற்கு டிரைக்கோ டெர்மா விரிடி 2 கிராம் ஒரு லிட்டர் தண்ணீரில் கலந்து பின்விதை மொட்டுக்களை 15 நிமிடம் ஊற வைத்து பின் நிழலில் 15 நிமிடம் உலர வைக்கலாம்.

விதை நேர்த்தி செய்ய விதை மொட்டுக்களை கோணிப்பையில் இறுக கட்டி நிழலில் அடுக்கி வைக்க வேண்டும். இவற்றை காற்று புகா வண்ணம் நன்கு மூடி இருக்குமாறு பார்க்க வேண்டும். நன்கு மூடிய கோணிப்பைகளின் மீது பாரம் ஏற்றி 5 நாள்கள் அப்படியே இருத்தல் வேண்டும். இடையில் தண்ணீர் தெளிக்கத் தேவையில்லை.

முதலில் குழி தட்டுக்களின் பாதியளவில் கோகோபீட் கொண்டு நிரப்ப வேண்டும். பின் விதை மொட்டுக்களை மேல் நோக்கி இருக்குமாறு சற்று சாய்வாக அடுக்கி மீதி குழிகளை கோகோ பீட் கொண்டு நிரப்ப வேண்டும்.

குழி தட்டுக்களை வரிசையாக தண்ணீர் தெளிக்க வசதியாக வைக்க வேண்டும். தினசரி தண்ணீர் தெளிப்பது அவசியம். 1 ஏக்கருக்கு 300 சதுர அடி தேவை நிழல்வலை அல்லது மர நிழலிலோ நாற்றுக்கள் வைக்க வேண்டும்.

நடவு செய்தல் மற்றும் இதர பராமரிப்புகள்:

நாற்றுக்களை 5-2 அடி இடைவெளியில் நடவு செய்ய வேண்டும். நட்ட 10, 20-வது நாள் சிறிதளவில் மேலும் இட்டு மண் அணைக்க வேண்டும். (யூரியா அல்லது அம்மோனியம் சல்பேட்) பிறகு களை எடுத்தல், மண் அணைத்தல், உரம், தண்ணீர் நிர்வாகம் போன்ற பராமரிப்பு வேலைகளையும் முறையாக செய்ய வேண்டும். 15-க்கு மேற்பட்ட தூர்கள் 2 மாதத்துக்குள் உருவாகும்.

2 அல்லது 3 தூர்கள் வந்தவுடன் முதலில் வந்த தாய்ச்செடியை வெட்டி நீக்க வேண்டும். அவ்வாறு நீக்கினால் அதிக பக்க தூர்கள் வெளிவரும் மற்றும் அனைத்து பயிர்களும் ஓரே சமயத்தில் கரும்பாக மாறும்.

செம்மை கரும்பு சாகுபடியில் அதிக இடைவெளியில் இருப்பதால் ஊடு பயிராக காய்கறிகள், பயறுவகைகள், வெள்ளரி, தர்பூசணி, பசுந்தாள் உர பயிர்களை பயிர் செய்ய முடிகிறது. மேலும் ஊடுபயிர் செய்வதால் அதிக லாபம், களை கட்டுப்பாடு, மண் வளம் பெருக்க முடியும்.

மண் அணைத்தல், சோகை உரித்தல்:

நடவு செய்த 45- வது நாள் மற்றும் 90-வது நாள் மண் அணைப்பு செய்ய வேண்டும், ஒளிச்சேர்க்கைக்கு மேற்புறமுள்ள 8-10 இலைகளே தேவைப்படுகின்றன. எனவே கீழ்புறமுள்ள காய்ந்த மற்றும் சில காயாத இலைகளை 5 மற்றும் 7-வது மாதத்தில் உரித்து பார் இடைவெளியில் இட வேண்டும்.

சோகை உரிப்பு பயன்கள்:

சுத்தமான பயிர் பராமரிப்பு, பயிர்களுக்குகிடையே காற்றோட்டம் அதிகரிப்பு, பூச்சி தாக்குதல் குறைவு, மற்ற பயிர் பராமரிப்பு பணிகள் எளிதாகின்றன.

சொட்டுநீர் உரப்பாசனம்:

செம்மை கரும்பு சாகுபடியின் மகசூல் அதிகரிக்க சொட்டுநீர் உரப்பாசனம் சாலச்சிறந்தது. மண்ணின் தன்மைக்கேற்ப நாள்தோறும் அல்லது அதிகபட்சமாக 3 நாள்களுக்கு ஒருமுறை சொட்டு நீர்பாசனம் அளிக்கலாம். 10 நாள்களுக்கு ஒருமுறை உரப்பாசனம் செய்ய வேண்டும். இவ்வகையில் 45 சதவீதம் பாசன நீரை (1200 மி.மீ) சேமிக்க இயலும்.

மேலே குறிப்பிட்டுள்ள அனைத்து தொழில்நுட்பங்களையும் முறையாகக் கடைப்பிடித்தால் ஒரு மொட்டில் இருந்து குறைந்தது 30 கிலோ கரும்பு கிடைக்கும் வாய்ப்புள்ளது. ஒரு ஏக்கருக்கு 5000 மொட்டுக்கள் என கணக்கிடும்போது 150 டன் மகசூல் பெற முடியும்.

மேலும் விவரங்களுக்கு திரூர் வேளாண் அறிவியல் நிலையத்தை அணுகலாம்.

தினமணி தகவல் –  திரூர் வேளாண்மை அறிவியல் நிலையத் தலைவர் மு.தேவநாதன், பேராசிரியை ம.நிர்மலாதேவி

வேளாண் அரங்கம் மார்க்கெட்டில்

 

தர்ப்பூசணி சாகுபடியில் அதிக லாபம் பெற…

வெப்பமண்டலம் மற்றும் மிதவெப்ப மண்டலப் பகுதிகளில் தர்ப்பூசணி பயிரிடப்படுகிறது. இப்பயிரில் உள்ள பல ரகங்கள் பல்வேறு தட்பவெப்ப நிலைகளிலும், மண் வகைகளிலும் குறைந்த செலவில் சாகுபடி செய்து அதிக லாபத்தை தரக்கூடியதாகும்.

விவசாயிகள் நெல் தரிசு நிலத்தில் தர்ப்பூசணி சாகுபடி செய்து அதிக வருவாயைப் பெறலாம்.

தர்ப்பூசணி டிசம்பர் முதல் செப்டம்பர் மாதம் வரை உள்ள நெல் தரிசு நிலத்தில் விவசாயிகள் சாகுபடி செய்யலாம்.

  • அர்கா மானிக்,
  • அர்கா ஜோதி,
  • டி.கே.எம். 1,
  • சுகர்பேபி,
  • அசாகியமாடோ,
  • சார்லஸ்டன் கிரே,
  • அம்ரூத்,
  • பூசா பேடானா மற்றும்
  • விதை உற்பத்தி நிறுவனங்களால் வெளியிடப்படும் ரகங்கள் மற்றும்
  • வீரிய ஒட்டு

ரகங்களை விவசாயிகள் சாகுபடி செய்யலாம்.

விதையும், விதை நேர்த்தியும்:

3 முதல் 4 கிலோ வரை நல்ல தரமான விதைகளாக தேர்வு செய்து பயன்படுத்த வேண்டும். விதைகளையும், இளம் செடிகளையும் நோய் மற்றும் பூச்சிகள் தாக்கமலிருக்க ஒரு ஹெக்டேருக்கு விதையுடன் 4 கிராம் டிரைகோடர்மா விரிடி அல்லது 10 கிராம் சூடோமோனாஸ் புளோரசன்ஸ் என்ற பூஞ்சாணக் கொல்லி அல்லது 2 கிராம் கார்பண்டாசிம் அல்லது திரம் என்ற பூஞ்சாண மருந்தில் ஏதேனும் ஒன்றை கலந்து விதை நேர்த்தி செய்யலாம்.

நிலம் தயார் செய்தல்:

நெல் தரிசு நிலத்தில் தர்ப்பூசணி சாகுபடி செய்ய உழவில்லா குழி நடவு முறையைப் பின்பற்றலாம். இம்முறையில் நெல் தரிசு நிலத்தில் உள்ள நெல் பயிர் அடித்தாழ் மற்றும் உளுந்துப் பயிரின் அடிச்சக்கையை நன்று சேர்த்து சுத்தம் செய்ய வேண்டும்.

இவைகளை தர்ப்பூசணிக்கு மண் போர்வையாக அல்லது மண்புழு உரம் அல்லது மட்கு தயார் செய்ய பயன்படுத்தலாம். இவ்வாறு சுத்தம் செய்யப்பட்ட நிலத்தில் 15×15 மீட்டர் இடைவெளியில் 50x50x50 செ.மீ. குழிகளை அமைக்க வேண்டும்.

இக்குழியில் உள்ள மண்ணை நன்கு கடப்பாரை மற்றும் மண்வெட்டி போன்ற கருவிகளால் கொத்தி, விதை நடவுக்கு ஏற்ற வகையில் தயார் செய்ய வேண்டும்.

இங்ஙனம் தயார் செய்யப்பட்ட குழிகளில் அடிஉரம் இட்டு குழிக்கு 5 விதைகள் வீதம் நடவு செய்ய வேண்டும். ஒவ்வொரு குழிக்கும் நட்டவுடனும், நட்ட மூன்று நாள் இடைவெளியில் மூன்று நீர்ப்பாசனம் முழுமையாக தர வேண்டும்.

உர நிர்வாகம்:

ஹெக்டேருக்கு 25 டன் தொழு உரத்துடன் 30:65:85 கிலோ தழை, மணி மற்றும் சாம்பல் சத்துகளை இட வேண்டும்.

இதில் பாதியளவு தழை, முழு அளவு மணி மற்றும் சாம்பல் சத்துகளை உழவில்லா சாகுபடி முறையில் குழியமைக்கும் போதும், மீதமுள்ள தழைச்சத்தை இரண்டு பகுதியாக நட்ட 30 மற்றும் 60 நாள்களில் இட வேண்டும்.

தொழு உரத்துக்கு பதிலாக 25 டன் மக்கிய அல்லது சாண எரிவாயுக்கு பயன்படுத்திய கரும்பு ஆலைக்கழிவு அல்லது 2.5 டன் மண்புழு உரம் அல்லது 12.5 டின் செரிவூட்டப்பட்ட தாவரமட்கு அல்லது 2.5 டன் செரிவூட்டப்பட்ட தென்னை நார்க்கழிவு மட்குகளை பயன்படுத்தலாம்.

இத்துடன் ஹெக்டேருக்கு 2 கிலோ அசோஸ்பைரில்லம் மற்றும் பாஸ்போ பாக்டீரியாவை கலந்து பயன்படுத்த வேண்டும்.

நீர்ப்பாசனம்:

தர்ப்பூசணி சாகுபடிக்கு தகுந்த நீர்ப்பாசன முறையை பயன்படுத்துவது மிகவும் முக்கியம். ஏனெனில் அப்பருவத்தில் பாசன நீரின் அளவு மிகக்குறைவு. ஆழ்துளை கிணற்றுப் பாசன வசதியுள்ளவர்கள் நல்ல முறையில் தர்ப்பூசணி சாகுபடி செய்ய முடியும்.

இவர்கள் பாத்தி பாசனம் அல்லது சொட்டு நீர்ப் பாசனம் அல்லது தெளிநீர்ப் பாசனம் என வசதிக்கேற்ப பயன்படுத்தலாம். கிணற்றுப் பாசன வசதியில்லாதவர்கள் அருகிலிருந்து வடிகால் வாய்க்காலில் இருக்கும் தண்ணீரை குடிநீர் பாசன முறையில் பயன்படுத்தலாம்.

வளர்ச்சி ஊக்கிகள்:

எத்தரல் என்னும் பயிர் வளர்ச்சி ஊக்கியை 250 பி.பி.எம். (2.5 மி.லி எத்தரல் மற்றும் 10 லிட்டர் தண்ணீர்) கரைசலாக தயார் செய்து, விதை முளைத்து செடியில் 2 இலை மற்றும் நான்கு இலை உற்பத்தியாகும் சமயத்திலும், அடுத்து 15 நாள் இடைவெளியில் 2 முறை தெளிப்பதால் பெண் பூக்களின் உற்பத்தியை அதிகரித்து மகசூலை அதிகரிக்கலாம்.

புகைமூட்டம் போடுதல்:

எத்தரல் கரைசல் தெளிக்க இயலாதவர்கள், நட்ட 15 நாள்களிலிருந்து, 15 நாள்களுக்கு ஒருமுறை வயலில் ஒரு ஓரமாக காற்றடிக்கும் திசையில் புகைமூட்டம் போட்டால், அதிக பெண் பூக்கள் உற்பத்தியாவது அறியப்பட்டுள்ளது.

இது ரசாயன முறை சாகுபடியில் தெளிக்கும் எத்திலீன் என்ற வினையூக்கி தெளிப்பதற்கு சமமானது.

களை நிர்வாகம்:

செடி வளர்ந்து படரும் இடங்களில் உள்ள களைச் செடிகளை அவ்வப்போது நீக்கிவிட வேண்டும்.

பயிர் பாதுகாப்பு:

இலை வண்டு மற்றும் புழுக்களை கட்டுப்படுத்த மாலத்தியான் 50 இசி 1 மிலி அல்லது மிதைல் டெமடான் 25 இசி 1 மிலி தெளிக்கவும், சாம்பல் நோயை கட்டுப்படுத்த 1 மிலி டினோகாப் அல்லது கார்பண்டாசிம் 0.5 கிராம் லிட்டர் என்ற அளவில் நட்ட 10 நாள்கள் இடைவெளியில் இரண்டு முறை தெளிக்கவும்.

அறுவடை: பூ மகரந்த சேர்க்கையடைந்ததிலிருந்து 40 நாள்களில் பழங்களை அறுவடை செய்யலாம். நன்குப் பழுத்த பழங்களை மட்டுமே அறுவை செய்ய வேண்டும்.

பழக்காம்பு காய்தல், பழத்தைத் தட்டினால் ஏற்படும் சப்தம் மற்றும் பழம் மண்ணில் படும் இடங்கள் பச்சை நிறத்திலிருந்து வெள்ளை அல்லது வெளிர் மஞ்சள் நிறமாக மாறுதல் போன்றவற்றை கணித்து பழமுதிர்ச்சியை அறிந்து அறுவடை செய்யலாம்.

தமிழக விவசாயிகள் நெல் பயிரிடாத காலங்களில் நெல் தரிசு நிலத்தில் தர்ப்பூசணி சாகுபடி செய்து ஹெக்டேருக்கு 50 முதல் 60 டன்கள் வரை மகசூல் பெற்று அதிக லாபம் பெறலாம் என்கிறார் பேராசிரியர் கே.மணிவண்ணன்.

தர்ப்பூசணி டிசம்பர் முதல் செப்டம்பர் மாதம் வரை உள்ள நெல் தரிசு நிலத்தில் விவசாயிகள் சாகுபடி செய்யலாம்.

  • அர்கா மானிக்,
  • அர்கா ஜோதி,
  • டி.கே.எம். 1,
  • சுகர்பேபி,
  • அசாகியமாடோ,
  • சார்லஸ்டன் கிரே,
  • அம்ரூத்,
  • பூசா பேடானா மற்றும் விதை உற்பத்தி நிறுவனங்களால் வெளியிடப்படும் ரகங்கள் மற்றும் வீரிய ஒட்டு ரகங்களை

விவசாயிகள் சாகுபடி செய்யலாம்.

தினமணி செய்தி: பேராசிரியர் முனைவர் கே.மணிவண்ணன், வேளாண்புல தோட்டக்கலைத் துறைத் தலைவர், அண்ணாமலைப் பல்கலைக்கழகம். சிதம்பரம்.

வேளாண் அரங்கம் மார்க்கெட்டில் அண்ணாமலைப் பல்கலைக் கழகம்