[சம்பங்கி பதிவுகள்] சம்பங்கி + விரிச்சிப் பூ…

பெரும்பாலான இயற்கை விவசாயிகள், தங்கள் விளைநிலங்களையே ஆராய்ச்சிக் களங்கள் என மாற்றி, பல்வேறு சோதனை முயற்சிகளை மேற்கொண்டு.. தங்களுக்கான தொழில்நுட்பங்களையும், புதிய யுக்திகளையும் கண்டுபிடிப்பது வழக்கம். திருச்சி மாவட்டம், துறையூர் தாலுகா வெங்கடாசலபுரம் கிராமத்தைச் சேர்ந்த சுந்தர்ராஜ், அத்தகையோரில் ஒருவர்.

sambangi1

இவர், விரிச்சிப் பூ செடிகளுக்கிடையே, சோதனை முயற்சியாக சம்பங்கியை ஊடுபயிராக சாகுபடி செய்து, வெற்றிகரமாக மகசூல் எடுத்திருக்கிறார். சுந்தர்ராஜை சந்தித்தபோது.. மொத்தம் இரண்டரை ஏக்கர் நிலம் இருக்கு. செம்மண்ணும் மணலும் கலந்த பூமி. ஒன்றரை ஏக்கரில் சம்பங்கி, 40 சென்ட்டில் செண்டுமல்லி என்று சாகுபடி செய்கிறேன். மீதி இருக்கும் 60 சென்ட்டில்தான் விரிச்சியும் அதில் ஊடுபயிராக சம்பங்கியும் போட்டிருக்கிறேன்.

எனக்கு தெரிந்த வரைக்கும் விரிச்சியில், யாரும் சம்பங்கியை ஊடுபயிராக போட்டதில்லை. மூன்று வருடத்திற்கு முன் சோதனை முயற்சியாக… 20 சென்ட்டில் மட்டும் இரண்டையும் பயிர் செய்தேன். அதில் இரண்டரை வருடம் வரைக்கும் சம்பங்கியில் நல்ல மகசூல் கிடைத்தது. கிட்டத்தட்ட ஒரு லட்ச ரூபாய்க்கு மேல் சம்பங்கியிலேயே வருமானம். இப்போது விரிச்சியில் தினமும் பத்து கிலோ அளவிற்கு பூ கிடைக்கிறது. அது மூலமாக தினமும் 750 ரூபாய் வருமானம் கிடைக்கிறது. இந்த இரண்டு பயிரும் ஒன்றுக்கொன்று துணையாக அமைந்து நல்ல மகசூல் கிடைப்பதால்…. அடுத்த 40 சென்ட்டிலும்  இந்த இரண்டையுமே போட்டிருக்கிறேன்.

sambangi2

களைகளைக் கட்டுப்படுத்த பாலிதீன்!
சாகுபடி நிலத்தில்

  • 4 சால் உழவு ஓட்டி,
  • 40 சென்ட் நிலத்திற்கு 10 டன் மாட்டு எரு என்ற கணக்கில் போட்டு,
  • மீண்டும் 2 சால் உழவு ஓட்ட வேண்டும்.
  • இரண்டே முக்கால் அடி அகலம்,  முக்கால் அடி உயரம் என முக்கால் அடி இடைவெளியில், பார்களை அமைக்க வேண்டும்.
  • பாரின் மீது 3 அடி அகலம் கொண்ட பாலிதீன் விரிப்புகளை விரித்து… அதன் மேல் 20 அடி இடைவெளிக்கு ஒரு சுழலும் திறப்பான் உள்ளவாறு தெளிப்பு நிர்ப் பாசனம் அமைக்க வேண்டும்.
  • நடவு மற்றும் விதைப்பு செய்ய வேண்டிய இடங்களில் மட்டும் 3 இஞ்ச் குழாய் ஒன்றைப் பயன்படுத்தி பாலிதீன் விரிப்பில் துளை உருவாக்கிக் கொள்ள வேண்டும். இதனால், களைகள் வளர்வதேயில்லை.

Fresh-Sambangi-Lily-Flowers

விரிச்சி நடவுமுறை

பாரின் நடுவில் 8 அடி இடைவெளியில் விரிச்சி நாற்றுகளை நடவு செய்ய வேண்டும். பாரின் இரு ஓரங்களிலும் ஒன்றரையடி இடைவெளியில்  சம்பங்கிக் கிழங்கை நடவு செய்ய வேண்டும். மண்ணின் ஈரத்தன்மைக்கு ஏற்ப பாசனம் செய்தால் போதுமானது. விதைத்த 15-ம் நாளிலிருந்து மாதம் ஒரு முறை 200 லிட்டர் அமுதக்கரைசலை வடிகட்டி தெளிப்பு நீர் வழியாகத் தர வேண்டும்.

வளர்ச்சி ஊக்கி மற்றும் பூச்சி தடுப்பு

30-ம் நாள் தலா ஒரு கிலோ அசோஸ்பைரில்லம், பாஸ்போ – பாக்டீரியா, சூடோமோனஸ் ஆகியவற்றை 50 லிட்டர் தண்ணீரில் கலந்துத் தெளிக்க வேண்டும்.

40 –ம் நாள் ஒரு கிலோ ட்ரைக்கோ டெர்மாவிரிடியை 50 கிலோ மாட்டு எருவில் கலந்து, செடிகளைச் சுற்றிலும் தூவ வேண்டும்.

50-ம் நாள் அரை லிட்டர் தேங்காய் பாலில் 3 லிட்டர் மோர், ஒரு கிலோ வெல்லம் கலந்து இரண்டு நாட்கள் வைத்திருந்து… அதோடு ஒரு கிலோ சூடோமோனஸ், 50 லிட்டர் தண்ணீர் கலந்து தெளிக்க வேண்டும். இதனால், செடியின் வளர்ச்சி வேகமெடுப்பதோடு, பூஞ்சணத் தாக்குதலும் கட்டுப்படும்.

65-ம் நாளில் இருந்து இரண்டரை லிட்டர் மூலிகைப் பூச்சிவிரட்டியை, 50 லிட்டர் தண்ணீரில் கலந்து மாதம் ஒரு முறை தெளித்து வர வேண்டும். சம்பங்கியில் 65-ம் நாளில் பூ பூக்கத் தொடங்கும்.

100 –ம் நாள், 200 கிலோ மண்புழு உரத்தை செடிகளின் தூரில் தூவ வேண்டும்.

120-ம் நாள் 100 கிலோ ஆமணக்குப் பிண்ணாக்கு, 30 கிலோ வேப்பம் பிண்ணாக்கு ஆகியவற்றைக் கலந்து தூவ வேண்டும்.

130-ம் நாளில் இருந்து மாதம் ஒரு முறை ஒரு லிட்டர் பஞ்சகவ்யாவை 50 லிட்டர் தண்ணீரில் கலந்து தெளித்து வர வேண்டும்.

ingredients PANCHAKAVYA

10 வருடம் வரை விரிச்சி!
ஆரம்பத்தில் ஒரு நாளைக்கு கால் கிலோ அளவிற்க்குத்தான் சம்பங்கி பூ கிடைக்கும். மகசூல் படிப்படியாக அதிகரித்து 90-ம் நாளுக்கு மேல் ஒரு நாளைக்கு ஒரு கிலோ வரைக்கும் பூ கிடைக்க ஆரம்பிக்கும். இரண்டரை வருடம் வரைக்கும் சம்பங்கியில் மகசூல் பார்க்கலாம்.

அதற்குப் பிறகு விரிச்சிச் செடிகள் நாலரையடி உயரத்திற்கு வளர்ந்து படர ஆரம்பிக்கும். அப்போது நிழல் கட்டிடுவதால் சம்பங்கியில் மகசூல் நின்றுவிடும். அப்போது சம்பங்கிச் செடியை அடிக்கிழங்கோடு பிடுங்கி, இலை, குச்சிகளை வெட்டிவிட்டு விதைக்கிழங்காக விற்றுவிடலாம். விரிச்சி மூலமாக 10 வருடம் வரைக்கும் வருமானம் கிடைக்கும் என்றார்.

தொடர்புக்கு
சுந்தர்ராஜ், செல்போன்: 98432-47106

http://www.agritech.tnau.ac.in/ta/success_stories/sucessstories_Hoticulturemainindex12_ta.html

மக்காச்சோளம் சாகுபடி – இயற்கை மற்றும் செயற்கை

மக்காச்சோளத்திற்கான தேவை அதிகரித்துள்ளது என்பதை ஏற்கனவே இங்கே வெளியிட்டு இருந்தோம். தேவையுடன் சேர்த்து இதற்கான செய்யும் பக்குவமும் குறைவே. இறைவை மற்றும மானாவாரி இரண்டுக்குமே ஏற்ற இந்தப் பயிருக்கு அதிக தண்ணீர் தேவையில்லை. குறுகிய காலத்தில் மகசூல். ஓரளவு கட்டுபடியாகக்கூடிய வேலை. வில்லங்கமில்லாத விற்பனை என்பதால் விவசாயிகளின் ஆர்வம் அதிகரித்துள்ளது.

வழக்கமான முறையில் விவசாயம் செய்து வருவோர் மத்தியில் சொட்டுநீர் பாசனத்தின் உதவி கொண்டு அதிக மகசூல் அடைந்திருக்கிறார் கோயமுத்தூர் மாவட்டம் ஜே.கிருஷ்ணாபுரத்தைச் சேர்ந்த விவசாயி ம. கோவிந்தராசன்.

அவரது சொல்படி

  • உற்பத்தி செலவு ரொம்ப கம்மி.
  • அதிக உரம் பூச்சி மருந்துக்கு வேலை இல்லை
  • ஓரளவு கட்டுபடியாகக்கூடிய விலையும் கிடைக்கும்

சமச்சீர் உரமேலாண்மை முறையில் இயற்கை ரசாயனம் கலந்து மூன்று ஏக்கரும் இயற்கை முறையில் ஒரு ஏக்கரும் சாகுபடி செய்திருந்த இவர் இயற்கை வழிப்படி கூடுதல் மகசூல் கிடைக்கும் என்கிறார்.

  • நுட்பம் : மக்காச்சோளம்
  • வயது : 110 நாள்
  • நிலம் : வடிகால் வசதி உள்ள அனைத்து நிலங்களும்
  • சாகுபடி காலம் : இறவையில் வருடம் முழுவதும்

உழவு
சாகுபடி நிலத்தை இரண்டு முறை உழவு செய்து 5 டிராக்டர் அளவு கோழி எருவைக் கொட்டி இறைத்து மீண்டும் ஒரு உழவு செய்து நிலத்தை ஆறப்போட வேண்டும். சொட்டுநீர் பாசணம் பயன்படுத்தும்போது பார் மற்றும் வரப்பு எடுக்கவேண்டியதில்லை. உழவு ஓட்டிய வயலில் அப்படியே நடவு செய்துவிடலாம். ஏக்கருக்கு 8 கிலோ விதைகள் தேவைப்படும். செடிக்கு செடி ஒரு அடியும், வரிசைக்கு வரிசை ஒரு அடியும் இடைவெளி விட்டு நடவு செய்யவேண்டும். ஒன்றரை அடி லேட்டரல் குழாய்களை ஒன்றரை அடி இடைவெளியில் தண்ணீர் சொட்டுவது போல் அமைக்கவேண்டும். வரிசைக்கு வரிசை 3 அடி இடைவெளியில் இந்தக் குழாய்களை அமைத்தால் போதும்.

பச்சை வர்ணத்தின் X குறிகள் – நாற்றுக்கள்
கருப்புவர்ணம் சொட்டு நீர் குழாய்கள்

பாசனத்துடன் பஞ்சகவ்யா
ஈரத்தைப் பொறுத்து வாரம் இருமுறை பாசனம் செய்யலாம். மொத்த சாகுபடி காலத்தில் அதிகபட்சம் 4 முறை பாசனம் செய்யலாம். விதைத்த 6ஆம் நாள் முளைவிடும் இதற்கு 15ஆம் நாளில் களைஎடுக்கவேண்டும். சொட்டு நீர்ப் பாசன முறையில் பயிருக்கு மட்டுமே பாசனம் நடைபெறுவதால் மற்ற இடங்களில் களை வரும் வாய்ப்பு குறைவு. 15ஆம் நாளில் வடிகட்டிய பஞ்சகவ்யா 200 லிட்டரை பாசன நீர் வழியாகக் கொடுக்கவேண்டும். ஏற்கனவே கொட்டிய கோழி எருவின் சத்துக்களை எடுத்து செடிகளுக்குக் கொடுப்பதுடன், பயிர் வளர்வதற்குத் தேவையான கூடுதல் தழைச்சத்தையும் பஞ்சகவ்யா கொடுக்கும். 40 நாளில் ஒரு ஆள் உயரத்திற்கு வளர்ந்து பூக்களோடு நிற்கும். அந்தத் தருணத்தில் மீண்டும் ஒரு முறை 200 லி்டடர் பஞ்சகவ்யாவைப் பாசன நீருடன் கொடுத்தால் பக்கவாட்டில் தோன்றும் கதிர்கள் விரைவான வளர்ச்சி அடைவதுடன் அடிச்சாம்பல் நோயும் தாக்காது

அறுவடை
60 மற்றும் 70ஆம் நாட்களில் கதிர்கள் ஒரே சீராக வளரத் தொடங்கும். 100ஆம் நாளில் கதிர்களை உரித்துப் பார்த்தால் சிவப்பு நிறத்தில் வரிசை கட்டிய தங்கப் பற்கள் பொன்று மணிகள் காணப்படும். அறுவடைக்கு 10 நாட்களுக்கு முன்பாகவே பாசனத்தை நிறுத்திவிடவேண்டும். 110ஆம் நாளில் தட்டைகள் காய்ந்து நிற்கும். ஆட்களை வி்டடு கதிர்களை மட்டும் ஒடித்து எடுக்கவேண்டும். அளத்து மேட்டில் குவித்து கதிரடிக்கும் எந்திரம் மூலமாக மணிகளைப் பிரித்துக் கொள்ளலாம்.

பாசனம் தரும் பாடம்
ஒரு ஏக்கருக்கு சொட்டு நீர் பாசனத்தில் ஒரு முறை பாசனம் செய்ய 20ஆயிரம் லிட்டர் தேவைப்படும். மொத்த சாகுபடி காலமான 110 நாட்களுக்கும் கணக்கிட்டால் 8 லட்சம் லிட்டர். ஆனால் வாய்க்கால் பாசனத்தில் 18 லட்சம் லிட்டர் வரை நீர் கொடுக்கப்படுகிறது. எனவே நீர்ப் பற்றாக்குறை உள்ள விவசாயிகளுக்கு சொட்டுநீர் பாசனம் ஒரு வரப்பிரசாதமே. அறுவடை முடிந்த சோளத்தட்டைகளை வெட்டி எடுத்து மாட்டுத் தீவனத்துக்காகச் சேமித்துக் கொள்ளலாம்.

வயலுக்கு வந்து எடைபோட்டு வாங்கிச் செல்லும் விவசாயிகள் இருந்தாலும் ஒழுங்குமுறை விற்பனைக் கூடங்களுக்கு எடுத்துச் சொல்கிறார் கோவிந்தராஜன். கட்டுப்படியான விலை கிடைக்கி வரைக்கும் அங்கேயே இருப்பு வைத்துக்கொள்ளலாம். அதோட மதிப்புக்கு ஏத்த மாதிரி அதிக பட்சம் ஒரு லட்சம் ரூபாய் வரைக்கும் பொருளீட்டுக் கடன் கொடுப்பார்கள். அதை வாங்கி அடுத்த சாகுபடிக்குப் பயன்படுத்திக்கலாம்.

ஒரு குவிண்டால் மக்காச்சோளம் 900 முதல் 1000 வரை விற்பனையாகிறது. அது கட்டுபடி ஆகிற விலைதான்.

அவர் மூன்று ஏக்கரில் சமச்சீர் உர மேலாண்மைப் படி சாகுபடி செய்த முறை
உழவு செய்து பார் கலப்பை மூலம் பாத்தி அமைத்து விதைகளை நடவு செய்யவேண்டும். பாத்தியில் உள்ள பாரின் அளவு ஒன்றே கால் அடி இருக்கவேண்டும். ஏக்கருக்கு 7 கிலோ விதைகள் தேவைப்படும்.

பாரின் இரு சரிவிலும் ஒரு அடி இடைவெளியில் விதையை ஊன்ற வேண்டும். பின்னர் பார் வரப்பு முழுவதும் நனையும்படி தண்ணீர்ப் பாசனம் செய்யவேண்டும். பிறகு வாரம் ஒரு தண்ணீர் கொடுத்தால் போதும். 15ஆம் நாளில் களை எடுத்து 50 கிலோ தழைச்சத்து உரமான யூரியாவை ஏகமாக வயல் முழுவதும் இறைத்துவிட வேண்டும். இந்த யூரியா கோழி எருவில் உள்ள சத்துக்களை விரைவாக செடிகளுக்கு எடுத்துக் கொடுக்க உதவும். 40ஆம் நாளில் 50 கிலோ யூரியாவைக் கொடுக்கவேண்டும்.

ரசாயண முறையில் ஏக்கருக்கு செலவு 19,000
மகசூல் 30 குவிண்டால்
இயற்கை முறையில் ஏக்கருக்கு 14,000
மககூல் 40 குவிண்டால்

வாய்க்கால் பாசனத்தைவிட சொட்டு நீர் பாசனத்தில் வேலையும் குறைவு. ஆக குறைந்த செலவு மற்றும் உழைப்பில் பலமான வருமானம் என்பது கோவிந்தராஜனின் அனுபவம்.

பார்க்க –
சுட்டி 1

சுட்டி 2

கல்பாக்கத்தில் ஒரு ஒருங்கிணைந்த விவசாயம்

கல்பாக்கத்தில் இருந்து 11 கி.மீ. தொலைவில் கரியச்சேரி. அவ்விடத்தைச் சேர்ந்த பொறியாளர் பாலாஜி கல்பாக்கம் அணுமின் நிலையத்தில் பணி புரிகிறார். மனைவி திருமதி சபீதா ராணி தாவரவியல் பட்டம் பெற்றவர். 2000ம் வருடங்களில் அலுவலகப் பணி காரணமாக கிட்டத்திட்ட விவசாயம் கைவிடப்பட்டது.

சுனாமியின் கோரதாண்டவத்திற்கு இவரகள் கிராமம் ஆளாக, படிப்புச் சான்றிதழ் கூட மிச்சமின்றி அனைத்தையும் இழந்திருக்கின்றனர்.  மிச்சம் திரு பாலாஜியின் அலுவலகப் பணி மற்றும் சுனாமியால் பாதிக்கப்பட்டவர்கள் என்ற சான்றிதழ்.

இயற்கையால் பாதிக்கப்பட்ட இந்தத் தம்பதியினர் இயற்கையை நம்பியதுதான் இவ்விடத்தின் திருப்பம். நீர் வடியாத இவர்கள் நிலத்தைச் சுற்றி பொக்லைன் கொண்டு தோண்டி ஆழமான வடிகால்களை அமைத்துள்ளனர்.
தற்பொழுது 4 மாடுகள், 3 கன்றுகள், 11 ஆடுகள், 40 கோழிகள் (கிரிராஜா, நாட்டுக்கோழி, வனராஜா), 5 வான்கோழிகள், 6 கின்னிக் கோழிகள், 14 காடை , 3 மணிலா வாத்துக்கள்,  8 நாட்டு வாத்துக்கள்,  16 காதல் பறவைகள், 6 ஆப்பிரிக்கன் கிளி, 10 காக்டைல் என்றும் சிறு கிளிகள் என்று அவர்கள் வாழ்விடத்தை இயற்கை கலை கட்டியிருக்கிறது.

கிராமியப் பொருளாதாரம் மேம்பட வேண்டும் என்று தங்காளால் ஆன பங்களிப்பைச் செய்யும் இவர்கள் “நமது விவசாயிகள் ஒவ்வொருவரும் தினசரி வருமானம், வார வருமானம், வருட வருமானம் என்று தங்கள் நிலங்களில் இருந்து எடுத்தால்தான் தற்சார்புடன் வாழ இயலும்” என்று கூறுகின்றனர்.

இதற்கான முறைகள்

  • பால், முட்டை, கீரை – இவைகளிலிருந்து தின வருமானம்
  • கொடி வகை (பீர்க்கன், பாகல், புடல்) – மூன்று நாட்களுக்கு ஒரு முறை
  • தென்னை, கறிவேப்பிலை – இரு மாதங்களுக்கு ஒரு முறை
  • பப்பாளி, சப்போட்டா, நெல்லி, எலுமிச்சை – கூடிய காலஇடைவெளி
  • மா, பலா போன்றவை – வருட வருமானம்
  • பயன்தரு மரங்கள் – பல ஆண்டுகளுக்கு ஒரு முறை பெருத்த வருமானம்.

சொல்வதுடன் மட்டுமல்லாமல் செயல் படுத்தியும் உள்ளனர்.

பள்ளிகளில் செயல்முறை விளக்கங்கள், சிறுவர் சிறுமியர்களுக்கு சிறு பயிற்சிகள் என்று சமூக சிந்தனையுடன் செயல்படும் இவர்கள் தங்கள் ஊர் பள்ளியை சுற்றுச்சூழல் நட்புப் (eco friendly) பள்ளியாக மாற்றியருக்கின்றனர். எடுத்த சில பல முயற்சிகள் தோல்வியில் முடிந்தாலும், இயற்கைவிவசாயத்தை விடாமல் தொடர்ந்திருக்கின்றனர்.

இவர்கள் தோட்டத்தில் விளையும் பச்சைப் பயிறு, காய்கறிகள், அரிசி, இலைகளை கல்பாக்கத்திலேயே விற்றுவிடுகின்றனர். இவர்களிடம் அசோலா குழி ஒன்று உள்ளது. கால்நடைகளுக்குத் தீவனமாக அதை அளிக்கின்றனர். நெல் சாகுபடிக்கும் பயன்படுத்துகின்றனர். இவர்கள் வளர்க்கும் ஆடு, மாடு, கோழிகள் இந்த அசோலாவை விரும்பி உண்கின்றனர்.

இவர்கள் பயிர் பாதுகாப்பிற்கு இஞ்சி – பூண்டு கசாயம், பஞ்ச கவ்யா போன்றவைகளைத் தாங்களே தயாரித்துப் பயன்படுத்துகின்றனர். அவை தவிர அசிட்டோபாக்ட்டர் (கறுப்பு யூரியா), பாஸ்போ பாக்டீரியா, பொட்டாஷ், மொபலைசர், சூடோமொனாஸ், டிரைக்கோடெர்மா விரிடி, பி.டி, கிரப்நில் போன்ற உயிரியல் இடுபொருட்களைப் பயன்படுத்துகின்றனர்.

மீன் வளர்ப்பிலும் கால் வைத்துள்ளனர். இவர்களது கிணற்றில் வலை இறக்கி (மிதவை போல) 50 விரால் குஞ்சு விட உள்ளனர். வீட்டிற்கு முன் உள்ள குட்டையில் 200 கட்லாவும் 200 காமன் கார்ப்பும் உள்ளன. இவைகளுக்கு பச்சரிசித் தவிடு, புண்ணாக்கு போன்றவை கொடுத்து வளர்த்து வருகின்றனர்.

கால்நடை வளர்ப்பிற்கும், மீன் வளர்ப்பிற்கும் காட்டுப்பாக்கம் வேளாண் அறிவியல் மையத்திலிருந்து (KVK) ஆலோசனை மையத்திலிருந்து ஆலோசனை பெறுகின்றனர்.

இவர்கள் செய்த வேர்க்கடலை சாகுபடியில் செலவு போக ஏக்கருக்கு 12000 கிடைத்துள்ளது; ஏக்கருக்கு 25 மூட்டைகள் (75 கிலோ) கிடைத்துள்ளன. ஸ்வீட் கார்ன்-ஐக் கூட இவர்கள் விடவில்லை. இது தவிற இயந்திர நடவில் பொன்னி, ADT 43, ADT 37 (குண்டு அரிசி), சீரகச் சம்பா, சிவப்புக் கார், அன்னம் (புதிய ரகம்) போன்றவற்றையும் சாகுபடி செய்கின்றனர்.

சாண எரிவாயு வைத்துள்ளனர். ஸ்லரியை பஞ்ச கவ்யா தயாரிக்கவும் உரமாகவும் பயன்படுத்துகின்றனர்.

வயல் வரப்போரங்களில் வெட்டிவேர், லெமன் கிராஸ், கோ4, அவுரி, சணப்பு, க்ளைரிசீடியா என்ற பெரும்பாலும் கால்நடைகளுக்கு உதவும் தீவன வகைகளைச் சாகுபடி செய்துள்ளனர்.

தங்களைப் பார்த்து மற்றவர்களும் இயற்கை விவசாயத்திற்கு வரவேண்டும் என்று நினைக்கும் இவர்களின் செயலில் லாப நோக்கும் இல்லை. வியாபார உத்தியும் இல்லை. நூறு சதவீத சேவை மட்டுமே.
திரு. டி. பாலாஜி 94453 97577
(தமிழக விவசாயி உலகம்)

பாரம்பரிய விதை நேர்த்தி (பொது)

பயிர்களின் முனைப்புத்திறன் மற்றும் நோய் தாக்குதலில் இருந்து பாதுகாக்கவும்,​​ அதிகளவு மகசூல் பெறவும் விதை நேர்த்தி முறையை வேளாண்துறை மற்றும் ஆராய்ச்சி நிலையங்களின் பரிந்துரையின்படி தமிழக விவசாயிகள் மேற்கொண்டு வருகின்றனர்.

குறிப்பாக வேதியியல் மற்றும் செயற்கை வேளாண் பூஞ்ஞாணக் கொல்லிகள்,​​ பூச்சிக்கொல்லிகள் கொண்டு விதை நேர்த்தி செய்யும் போது பயிர்கள் பூச்சி மற்றும் நோய் தாக்குதலில் இருந்து பாதுகாக்கப்பட்டாலும் நமது உணவும்,​​ நிலமும் விஷத்தன்மை மற்றும் மாசு அடைவது தவிர்க்க முடியாததாகிவிடுகிறது.​ இத்தகைய சூழலில் விவசாயிகள் சுற்றுச்சூழலை பாதுகாக்கவும்,​​ அதிக லாபம் மற்றும் மகசூல் பெறவும் இயற்கை விதை நேர்த்தி செய்வது மிகவும் பயனுள்ளதாக அமையும்.

இயற்கை விதை நேர்த்தி முறை:​

விவசாயிகள் தங்களின் விதைகளை இயற்கை முறையில் தயார் செய்யப்படும் ஆட்டூட்டக்கரைசல் ​(ஆட்டுப்புழுக்கை,​​ ஆட்டு சிறுநீர்,​​ ஆட்டுப்பால்,​​ ஆட்டுத்தயிர்,​​ வாழைப்பழம்,​​ இளநீர்,​​ கடலைப் பிண்ணாக்கு,​​ கரும்புச்சாறு மற்றும் கள் ஆகியவற்றை கொண்டு தயார் செய்யப்படும் கலவை)​ அல்லது பஞ்சகவ்யா கலவையை ​(சாணம்,​​ மாட்டு சிறுநீர்,​​ பால்,​​ தயிர்,​​ நாட்டுச்சர்க்கரை,​​ வாழைப்பழம்,​​ கரும்புச்சாறு,​​ கள்,​​ ஈஸ்ட் மற்றும் கடலைப் பிண்ணாக்கு)​ 300 மில்லி கிராம் என்ற அளவில் 10 லிட்டர் நீரில் கலந்து விதை நேர்த்திக்கு பயன்படுத்தலாம்.

இயற்கை விதை நேர்த்தி முறையில் விதைகளை ஆட்டூட்டக் கரைசலுடன் ஊற வைத்து ​ பதப்படுத்தும் விவசாயி.

இயற்கை விதை நேர்த்தி முறையில் விதைகளை ஆட்டூட்டக் கரைசலுடன் ஊற வைத்து பதப்படுத்தும் விவசாயி.

நெல் மற்றும் கடினமான தோலுடைய விதைகளை 24 மணி நேரம் ஊற வைத்து விதைக்கலாம்.​

இவ்வாறு விதை நேர்த்தி செய்தபின் விதைகளை நிழலில் நன்றாக உலர்த்திய பின்பே விதைக்க வேண்டும்.​ இவ்வாறு இயற்கை முறையில் விதை நேர்த்தி செய்வதால் நாற்றுகள் நன்றாக வாளிப்பாக வளரும்.​ அதிக எண்ணிக்கையில் வேர் பிடிப்பு காணப்படும்.​ பயிர்கள் நன்றாக வறட்சியைத் தாங்கி வளரும் தன்மை பெறும்,​​ பூச்சிகள்,​​ நோய் தாக்குதல்கள் இருக்காது.

அடுத்த பருவத்திற்கு தேவையான விதைகளை பஞ்சகவ்யா அல்லது ஆட்டூட்டக் கரைசலில் நனைத்து நிழலில் காய வைத்து விவசாயிகள் எளிதாக சேமிக்கலாம்.​ இதன் வாயிலாக விதைகளை பூச்சிகளும்,​​ நோயும் தாக்காது.​ முனைப்புத் திறனும் அடுத்த பருவத்திலும் குறையாமல் பாதுகாக்கப்படும்.

பிற பயன்கள்:​​

நெல்,​​ தக்காளி நாற்றுகளை,​​ வாழைக் கன்றுகளை பஞ்சகவ்யா மற்றும் ஆட்டூட்டக் கரைசலில் நனைத்து நடவு செய்யும் போது பூஞ்சானம்,​​ வைரஸ் மற்றும் வேர் புழுக்களின் தாக்குதல் கட்டுப்படுத்தப்படும்.​ குறைந்த செலவில் விவசாயிகள் தங்களிடம் உள்ள இயற்கை வேளாண் பொருள்களை கொண்டு செய்வதால் சுற்றுச்சூழல் மாசுபடுவது தடுக்கப்படும்.​

மேலும் விவசாயிகள் அதிக மகசூல் மற்றும் லாபம் பெற முடியும்.​ எனவே தமிழக விவசாயிகள் இயற்கை விதை நேர்த்தி வாயிலாக அதிக லாபம் பெறலாம் என அண்ணாமலைப் பல்கலைக்கழக வேளாண் விரிவாக்கத்துறை விரிவுரையாளர் தி.ராஜ்பிரவின் தெரிவித்துள்ளார்.

தகவல் – தினமணி

சாம்பார் வெள்ளரி சாகுபடி

ரசாயன உரம் மற்றும் பூச்சிக் கொல்லிகள் இல்லாமல் சாம்பார் வெள்ளரி சாகுபடி செய்யமுடியும் என்கிறார் நாகப்பட்டிணம், கிராமத்திமேடு விவசாயி ஆறுமுகம்.

வெள்ளரி சாகுபடிக்கு தைப்பட்டம் சிறந்தது. நல்ல வடிகால் வசதியோடு இருக்கிற எந்த வரை நிலமும் இதற்கு ஓக்கே. அதிகமான மணல் மற்றும் உப்புத்தன்மை இருக்கிற மண் வகை தவிர்க்கவேண்டியது.  (கரும்பில் ஊடுபயிறாக சாம்பார் வெள்ளரியைப் பயிரிடுவது பற்றி இன்னொரு கட்டுரை வந்திருக்கிறது. அதில் செம்மண் பூமியில் சாம்பார் வெள்ளரி நன்றாக வளரும் என்று தேனி மாவட்டம், குண்டல்நாயக்கன்பட்டி விவசாயி முத்தையா கூறுகிறார்).

நடவிற்கு முன் நிலத்தை குறுக்கு நெடுக்காக நான்கு முதல் ஐந்து உழவு செய்ய வேண்டும். பின்பு எட்டுக்கு எட்டு அடி இடைவெளி கொடுத்து நீளம் அகலம் ஆழம் அனைத்தும் ஒரு அடி இருக்கும் வகையில் குழி எடுக்கவேண்டும். ஏக்கருக்கு 550 முதல் 600 குழிகள் விழலாம். ஒவ்வொரு குழிக்கும் அரைக்கூடை எருவைப் போட்டு மேல்மண் சொண்டு மூடி விடவேண்டும்.

ஒரு ஏக்கர் நிலத்துக்கு 250கிராம் வெள்ளரி விதைகள் தேவைப்படும். வடித்த கஞ்சியில் 100 கிராம் அசோஸ்பைரில்லம், 100 கிராம் டிரைக்கோடர்மா விரிடி ஆகியவற்றைச் சேர்த்து நன்கு கலக்க வேண்டும். விதைகளை இந்தக் கரைசலில் விதை நேர்த்தி செய்யவேண்டும். பிறகு அரை மணிநேரம் நிழலில் உலர்த்தி குழிக்கு ஏழு விதைகள் வீதம் நடவு செய்யவும். எலி தொந்தரவு மற்றும் செடி அழுகல் தாண்டி சராசரியாக குழிக்கு 5 செடிகள் நன்கு முளைத்து வளரும்.

நடவு செய்த மூன்றாம் நாளில் முளைப்பு எடுத்துவிடும். பத்து நாட்கள் வரை காலை நேரத்தில் தினம் ஒரு முறை தண்ணீர் தெளிக்கவேண்டும். 15ம் நாளில் இருந்து 20ஆம் நாளில் கொடியை ஒதுக்கிவிட்டு மீதி இருக்கும் இடத்தை மண்வெட்டியால் கொத்தி களைகளை நீக்க வேண்டும். பின் கொடியைச் சுற்றி அரை அடி ஆழத்திற்கு குழி எடுத்து அரை அன்னக்கூடை வீதம் எரு வைத்து மண்ணை இட்டு குழியை மூடிவிட வேண்டும். மண்ணின் நீர் பிடிப்புத் தன்மைக்கு ஏற்ப நான்கு முதல் ஏழு நாட்களுக்கு ஒரு தடவை தண்ணீர் பாய்ச்ச வேண்டும். கூடவே ஏக்கருக்கு 10லிட்டர் ஜீவாமிர்தக் கரைசலை தண்ணீரோடு கலந்துவிடவேண்டும். 30ஆம் நாளில் இரந்து தொடர்ந்து பத்து நாட்கள் இடைவெளியில் பத்து லிட்டர் டேங்குக்கு அரை லிட்டர் பஞ்ச கவ்யாவைக் கலந்து தெளித்தால் செடிகளில் வளர்ச்சி சிறப்பாக இருக்கும்.

20ஆம் நாளில் இருந்து செடியில் பச்சைப் புழுவின் தாக்குதல் அதிகமாக இருக்கும். இதற்கு ஒரு வாரம் பூண்டுக் கரைசல், அடுத்தவாரம் மூலிகைப் பூச்சிவிரட்டி என்று மாற்றி மாற்றி தெளித்து வரவேண்டும். பத்து லிட்டர் டேங்குக்கு அரை லிட்டர் வீதம் கலந்து தெளிக்க வேண்டும்.

35 ஆம் நாளில் இருந்து காய் பறிப்புக்கு வரும். தொடர்ந்து 60 நாட்களுக்கு பறிக்கலாம். ஆரம்பத்தில் தினசரி பறிக்கவேண்டும். தினமும் மூன்று முதல் நான்கு கூடை வெள்ளரிப் பிஞ்சுகள் கிடைக்கும். கூடைக்கு 20 முதல் 25 கிலோ அளவிற்கு வெள்ளரி இருக்கும்.

தகவல் – பசுமை விகடன்

தொடர்பு –
ஆறுமுகம், நாகப்பட்டிணம் – 99653 22418
முத்தையா, தேனி. 99527 71134

நல்லாத்தான் இருக்கும்! ஆனால் இதற்கு உழைப்பு மிக அதிகமாக இருக்கிறது. கண்டிப்பாக ஆறுமுகத்தைப் பாராட்டித்தான் ஆகனும்