மழைக் கால பயிர் பாதுகாப்பு

தமிழகத்தில் பெரும்பாலும் அனைத்துப் பகுதிகளிலும் பரவலாக மழை பெய்துள்ளது. மகிழ்ச்சியான செய்தியே. என்றாலும் என்றாலும் மழைபெய்வதற்கு முன்னரே பயிரிட்ட பயிர்களைப் பாதுகாக்கவேண்டிய தருணம் இது. தேங்கிய நீரில் அழுகி வீணாகிவிடலாம். பூச்சிகளின் தாக்குதல்களுக்கு உள்ளாகலாம். சில சமயங்களில் நீரை வயலிலேயே தேக்கி வைத்தால் பாசனம் செய்வது எளிது. எனவே, மழைக் கால யோசனைகளை வழங்கி சில செய்திகள் வெளியாகி உள்ளன. அவற்றைக் கீழே கொடுத்துள்ளோம்.

பருத்தி

தற்போது தொடர்ந்து பெய்து வரும் பலத்த மழையால், அனைத்துப் பயிர்களின் வயல்களிலும் மழை நீர்த் தேங்கிக் காணப்படுகிறது. இதனால், பாக்டீரியம், பூஞ்சாணம் போன்றவற்றால் பயிர்களுக்கு நோய்த் தாக்குதல் ஏற்பட அதிக வாய்ப்புள்ளது.

குறிப்பாக, பருத்தியில் வெர்டிசீலியம் வாடல் நோய், வேர் அழுகல் நோய், ஆல்டர் நேரியா, இலைப்புள்ளி நோய், இலைக்கருகல் நோய், புகையிலைக் கீற்று வைரஸ் நோய் ஆகிய நோய்கள் தாக்கும் அபாயம் உள்ளது.

பருத்தி

பருத்தி

மேலும், செடிகளிலுள்ள சப்பைகள், காய்கள் அழுகி உதிர வாய்ப்புள்ளது. பருத்தி வயல்களில் தேங்கியுள்ள மழை நீரால், மெக்னீசியம் சத்துப் பற்றாக்குறை ஏற்பட்டு, பருத்தி இழையின் ஓரங்கள் சிவப்பு நிறமாக மாறி உதிர்ந்து விடுகின்றன. இதனால், விவசாயிகளுக்கு மகசூல் இழப்பு ஏற்பட அதிக வாய்ப்புள்ளது.

பருத்தியை மழை நீரிலிருந்து பாதுகாக்க, வயல்களில் தேங்கும் நீரை, ஐந்து பாத்திகளுக்கு இடையே பார் அமைத்து, வயலைச் சுற்றி வடிகால் வசதி செய்து தேங்கிய நீரை வெளியேற்ற வேண்டும்.

பருத்திச் செடிகளில் வேர் அழுகல் நோய் காணப்படும் போது, சூடோமோனாஸ் அல்லது டிரைகோடெர்மா விரிடி உள்ளிட்ட எதிர் உயிர்க் கொல்லிகளில் ஏதாவது ஒன்றை லிட்டருக்கு 2 கிராம் அல்லது கார்பன்டாசிம் அல்லது மேன்கோசெப் பூஞ்சாணக் கொல்லி மருந்துகளில் ஏதாவது ஒன்றை லிட்டருக்கு 2 கிராம் அல்லது காப்பர் ஆக்ஸிகுளோரைடை லிட்டருக்கு 2 கிராமுடன், பாக்டீரியா கொல்லியான ஸ்டிரெப்டோமைசின் சல்பேட்டை பத்து லிட்டர் தண்ணீருக்கு ஒரு கிராம் என்ற அளவில் கலந்து, செடிக்குச் செடி வேர் பகுதிகளில் ஊற்றுவதன் மூலம், வேர் அழுகல் நோயைக் கட்டுப்படுத்தலாம்.

பருத்தி இலைகளில் இலைப்புள்ளிகள் தென்படும் போது, காப்பர் ஆக்ஸிகுளோரைடு 30 கிராம், ஸ்டிரெப்டோமைசின் சல்பேட் ஒரு கிராம் ஆகியவற்றை 10 லிட்டர் தண்ணீரில் கலந்து, 10-15 நாள்கள் இடைவெளியில் இலையின் மீது தெளித்துக் கட்டுப்படுத்தலாம்.

மேலும், மழை நின்ற பிறகு, செடிகள், சப்பைகள் நன்கு செழிப்புடன் இருக்க, வளர்ச்சி ஊக்கி அல்லது டி.ஏ.பி. 2 சதக் கரைசலைத் தெளிக்க வேண்டும். பருத்தியில் இலைகள் சிவப்பாக தென்படும் போது, மெக்னீசியம் சல்பேட் 100 கிராம், ஜிங் சல்பேட் 50 கிராம், யூரியா 10 கிராம் ஆகியவற்றை 10 லிட்டர் தண்ணீரில் கலந்து தெளித்துக் கட்டுப்படுத்தலாம்.

இவ்வாறு செய்வதன் மூலம் மழையிலிருந்து பருத்தியைக் காப்பாற்றி அதிக மகசூலைப் பெறலாம். தற்போது சிறிய வெங்காயப் பயிரைக் குமிழ் அழுகல் நோய் அதிகமாகத் தாக்கியுள்ளது. இந்த நோயானது பூஞ்சை மூலம் பரவுகிறது. இந்தப் பூஞ்சையைக் கட்டுப்படுத்த, குளோரோதலோனில் பூஞ்சாணக் கொல்லியை லிட்டர் தண்ணீருக்கு 2 கிராம் என்ற அளவில் அல்லது மாங்கோசெம் பூஞ்சாணக் கொல்லியை 2.5 கிராம் என்ற அளவில் கலந்து, அதனுடன் ஒட்டும் திரவம் சேர்த்துத் தெளிக்க வேண்டும்.

மஞ்சள் பயிரில் இலைப்புள்ளி, இலைக்கருகல் நோய் காணப்படும் போது, புரபிகோனோசால் 20 மில்லி அல்லது சூடோமைல் 20 கிராம் அல்லது பெவிஸ்டின் 20 கிராம் அல்லது அலைட் 20 கிராம் இதில் ஏதாவது ஒன்றை 10 லிட்டர் தண்ணீரில் 5 மி.லி. ஒட்டும் திரவத்துடன் கலந்து தெளித்துக் கட்டுப்படுத்தலாம்.

மக்காச்சோளம், நெல், மஞ்சள், கரும்பு ஆகியவை பயிரிடப்பட்டுள்ள வயல்களில் தேங்கியுள்ள மழை நீரை, தகுந்த வடிகால் வசதி செய்து வெளியேற்றினால், பயிர்களைக் காப்பாற்றலாம்.

கூடுதல் விவரங்களுக்கு,

ஹேன்ஸ் ரோவர் வேளாண் அறிவியல் மையம், பெரம்பலூர். தொலைபேசி எண் 04328-293251, 293592

நெல்

தண்ணீர் தேங்கியுள்ள பகுதியில் வடிகால் வசதியை ஏற்படுத்த வேண்டும். மேலும், அதிக நாற்றுகள் உள்ள குத்துகளிலிருந்து சில நாற்றுகளை எடுத்து, நாற்றுகள் இல்லாத இடங்களில் நடவு செய்ய வேண்டும். அதே ரக நாற்றுகள் கிடைத்தால் போக்கிடங்களில் நடவு செய்யலாம்.

தண்ணீரில் மூழ்கியுள்ள நெல் பயிருக்கு உடனடியாக 200 லிட்டர் தண்ணீரில் 2 கிலோ யூரியாவும், ஒரு கிலோ ஜிங்க் சல்பேட்டும் கலந்து கைத் தெளிப்பான் மூலம் காலை அல்லது மாலை வேளையில் தெளிக்க வேண்டும்.

தண்ணீர் வடிந்து விட்ட நிலையில், ஊட்டச்சத்து பற்றாக்குறை ஏற்பட வாய்ப்புள்ள நெல் பயிருக்கு ஏக்கருக்கு 22 கிலோ யூரியா, 18 கிலோ ஜிப்சம், 4 கிலோ வேப்பம் புண்ணாக்கு ஆகியவற்றை கலந்து ஒரு நாள் வைத்திருந்து பிறகு 17 கிலோ பொட்டாஷ் கலந்து மேலுரமாக இட வேண்டும். இந்த உரங்களை இடும்போது வயலில் சீராக தண்ணீர் வைத்துக் கொண்டும், தண்ணீர் வெளியே விடாதவாறும் பராமரிக்க வேண்டும். சூல் கட்டும் மற்றும் பூக்கும் பருவத்தில் உள்ள பயிர்களுக்கு 2 கிலோ டி.ஏ.பி. உரத்தை 10 லிட்டர் தண்ணீரில் ஊற வைத்து மறுநாள் தெளிவான கரைசலை வடிகட்ட வேண்டும்.

அத்துடன், ஒரு கிலோ யூரியா, ஒரு கிலோ பொட்டாஷ் உரங்களை கலந்து 190 லிட்டர் தண்ணீர் சேர்த்து கைத்தெளிப்பான் மூலம் தெளிக்க வேண்டும். இதேபோல, ஊட்டச்சத்து மேலாண்மை மேற்கொண்டால் மழை நீரால் பாதிக்கப்பட்ட பயிர்களைக் காப்பாற்றலாம்

தினமணி தகவல்

Advertisements

மாசிப்பட்ட பருத்தி சாகுபடியாளர்களின் கவனத்திற்கு…

கோடைப்பட்டத்தில் பருத்தி சாகுபடி செய்ய இருக்கும் விவசாயிகள் அதிக மகசூல் பெற கீழ்க்காணும் தொழில் நுட்பங்களை கடைபிடிக்க கேட்டுக் கொள்ளப்படுகிறார்கள்.

  • சம வயதுள்ள ரகத்தை யாவரும் தேர்ந்தெடுத்து ஏக காலத்தில் (ஒரு வாரத்திற்குள்) விதைத்திட வேண்டும்.
  • இயன்றவரை பூச்சிநோய் தாங்கி வளரவல்ல எஸ்விபிஆர் 2 ரகத்தைத் தேர்ந்தெடுத்து பயிரிட வேண்டும்.
  • சாணிப்பால் கொண்டு விதைநேர்த்தி செய்து நிழலில் உலர்த்த வேண்டும்.
  • பின் விதைப்பதற்கு சற்று முன்பாக ஒரு கிலோ விதைக்கு பத்து கிராம் சூடோமோனாஸ் புளூரசன்ஸ் பயன் படுத்தி விதைநேர்த்தி செய்யவும்.
  • காற்றடிக்கும் திசைக்கு குறுக்காக பார்கள் / வரிசைகள் அமைத்து விதைத்தால் மருந்தடிக்கும் போது மருந்துக் கலவை வீணாகாமல் தடுக்க உதவும்.
  • வயலைச் சுற்றிலும் உள்ள செடிகள், களைகளை (பூச்சிகளுக்கு மாற்றுணவாகப் பயன்படும்) அகற்றி சுத்தமாக வைக்க வேண்டும்.
  • தொழு உரம் மற்றும் வேப்பம் பிண்ணாக்கு இடுவது பூச்சி மற்றும் நோய் (வேரழுகல், வாடல், நூற்புழு, தண்டுக்கூன்வண்டு, தரைக்கூன் வண்டு, வேர்ப்புழு) தாக்குதலை குறைக்கும்.
  • விதைத்த 30வது நாளில் சூடோமோனாஸ் புளூரசன்ஸ் (ஏக்கருக்கு ஒரு கிலோ) இடுவது வேரழுகல், வாடல் நோய் தாக்குதலைக் குறைக்கும்.
  • நட்ட 20 மற்றும் 30ம் நாள் வேப்பெண்ணெய் 1 சதம் கரைசல் தூரில் ஊற்றுதல் தண்டுக்கூன் வண்டு தாக்குதலைக் குறைக்கும்.
  • ஊடுபயிராக வாய்க்கால்கள் மற்றும் பாத்தி வரப்புகளின் ஓரங்களில் தட்டைப்பயிறு வளர்த்தால் பொறி வண்டுகள் பெருக்கத்திற்கு துணைபுரியும்.
  • மேலும் பூச்சியின் வருகையை கண்காணிக்க ஊடுபயிராக மக்காச் சோளம், உளுந்து மற்றும் சீனி அவரை (கொத்தவரை) ஓரப் பயிராக சோளம், ஆமணக்கு, சூரியகாந்தி பயிரிட வேண்டும். * இரட்டை வரிசையில் பருத்தியை பயிரிட்டு இடைவெளியில் ஒரு வரிசை உளுந்து அல்லது சீனி அவரை ஊடுபயிராக பயிரிடலாம்.
  • வயலைச் சுற்றி அரண் போன்று சோளம் நெருக்கமாக (உயரமாக வளரும் ரகம்) வளர்க்க வேண்டும். (தத்துப்பூச்சி, இலைப்பேன்கள், வெள்ளை ஈ, மாவுப்பூச்சி மற்றும் காய்ப்புழுவின் அந்துகள் வயலினுள் நுழைவதைத் தடுக்க).
  • சீனி அவரை ஊடுபயிராக பயிரிட்டால் தத்துப்பூச்சி மற்றும் காய்ப்புழு தாக்குதல் குறையும். மேலும் இந்த பயறுவகை ஊடுபயிர்கள் மூலம் வேர் முடிச்சுகளில் தழைச்சத்து உற்பத்தி செய்யப்பட்டு மண்ணின் வளம் மேம்படுகிறது.
  • வயலைச் சுற்றி ஆமணக்கு பயிரிட்டு புரடீனியாப் புழு முட்டைகளைச் சேகரித்து அழிக்கலாம். ஆமணக்கு புரடீனியா புழு தாய்ப்பூச்சிகளை முட்டையிட கவர்ந்திழுக்கும்.
  • வெண்டை, ஆமணக்கு மற்றும் சூரியகாந்தி பயிர்கள் முறையே புள்ளிக்காய்ப்புழு, புரடீனியா மற்றும் அமெரிக்கன் காய்ப்புழு தாக்குதலைக் கவர்ந்திழுக்கும். அப்பூச்சிகளை அங்கேயே கட்டுப்படுத்தி விடவேண்டும்.
  • ஊடுபயிராக வாய்க்கால்களில் மக்காச்சோளம் பயிரிட கிரைசோபா, குளவிகள் போன்ற நன்மை தரும் பூச்சிகளின் பெருக்கத்திற்கு துணை செய்யும்.
  • வாய்க்கால் வரப்புகளில் ஆங்காங்கே வெண்டை பயிரிட்டு சொத்தைக் காய்களைப் பறித்து அகற்ற வேண்டும்.

தினமலர் தகவல் – ந.முருகேசன், பேராசிரியர் மற்றும் தலைவர், பருத்தி ஆராய்ச்சி நிலையம், ஸ்ரீவில்லிபுத்தூர்-626 125.

பி.டி.​ பருத்தியில் அதிக மகசூல் பெற ஆலோசனை

களைக் கொல்லிகள் என்பவை,​​ களைச் செடிகளை கட்டுப்படுத்துவதற்கு ​ பயன்படுத்தப்படும் ஒரு வேதியியல் பொருளாகும்.​ இதை

  • முளைப்பதற்கு முன்பு,
  • களைச்செடி வளர்ந்த பின்பு

என இரண்டு வகைகளாகப் பிரிக்கலாம்.​ முளைக்கும் முன்பு ​ செயல்படும் களைக் கொல்லிகள் களை விதை முளைக்கும் போதே,​​ அதன் முளை ​ வேர்கள் வழியே உள்சென்று அவற்றை அழிக்கின்றன.​ இவ் வகை களைக் கொல்லிகளைப் பயன்படுத்தும் போது,

  • மண்ணில் போதுமான ஈரப்பதம் அவசியம்.
  • இந்தக் களைக் கொல்லிகள் குருணையாக இருந்தால்,​​ அதைச் சீராகப் பரப்புவதற்கு மணலுடன் கலந்து சீராக தூவ வேண்டும்.​ தூவப்பட்ட இடங்களை நீரில் மிதக்காமல் தவிர்க்க வேண்டும்.

களைச் செடிகள் முளைத்து வளர்ந்த பின்பு தெளிக்கப்படும் களைக் கொல்லிகள் ​ இலைகள் மூலம் உறிஞ்சப்பட்டு,​​ மற்ற பாகங்களுக்கு ஊடுருவிச் சென்று,​​ களைகளை ​ கொல்கின்றன.​ இந்தச் செடிகள் முளைப்பதற்கு முன்பு தெளிப்பதாக இருந்தால்,​​ ​ ஹெக்டேருக்கு

  • 3.50 லிட்டர் பென்டமெத்தலின் ​(ஸ்டாம்பு)​ அல்லது
  • அளாக்குளோர் 2.50 லிட்டர் அல்லது
  • டையூரான் 1.25 லிட்டர்

உள்ளிட்டவற்றில் ஏதாவது ஒன்றை ​ 200 லிட்டர் தண்ணீரில் கலந்து பருத்தி விதைத்த மூன்றிலிருந்து,​​ ஐந்து நாள்களுக்குள் ​ கைத் தெளிப்பான் மூலம் தெளித்தல் அவசியம்.

தெளித்தப்பின்பு தெளிப்பானை நன்றாகக் கழுவ வேண்டும்.​ தண்ணீரை மட்டும் ​ நிரப்பி ஒரு டேங்க் தரிசாக உள்ள நிலங்களில் அடிப்பதால் தெளிப்பான் உள்பகுதியில் உள்ள களைக் கொல்லி நஞ்சை சுத்தமாக நீக்கலாம்.​ இல்லையெனில்,​​ பிறகு மருந்து கலந்து அடிக்கும்போது,​​ களைக் கொல்லியின் மீதமுள்ள நஞ்சினால் பயிர்க் கருகுவதைத் தவிர்க்கலாம்.

களைச் செடி வளர்ந்த பிறகு தெளிப்பான் இருந்தால்,​​ பாராக்குவாட் அல்லது ​ டைக்குவாட் என்னும் களைக் கொல்லியைப் பயன்படுத்தி,​​ களைகளை ​ கட்டுப்படுத்தலாம்.​ ​

குறிப்பாக,​​ களைக் கொல்லிகளைப் பயன்படுத்தும் போது,​​ பருத்தியில் ஊடு பயிராக பயறு ​ வகைகள் இருந்தால்,​​ பென்டமெத்தலின் ஸ்டாம்பு உபயோகிப்பதை ​ தவிர்ப்பதோடு,​​ களைகளை அழிக்க களை எடுக்கும் கருவியை பயன்படுத்த வேண்டும்.​ ​ இவ்வாறு செய்தால் பி.டி.​ பருத்தியில் அதிக மகசூல் பெறலாம்.

தினமணி தகவல் – திரு. இரா. மாரிமுத்து, திட்ட ஒருங்கிணைப்பாளர், ஹேன்ஸ் ரோவர் வேளாண் அறிவியல் மையம், வாலிகண்டபுரம், பெரம்பலூர்

பருத்தியில் ஒருங்கிணைந்த பயிர் பாதுகாப்பு

பருத்தியில் ஒருங்கிணைந்த பயிர் பாதுகாப்புமுறை என்பது

  • உழவியல் முறைகள்,
  • கைவினை முறைகள்,
  • உயிரியல் முறைகள்

ஆகிய மூன்று முறைகளும் அடங்கியதாகும்.

பருத்தி பாதுகாப்பில் உயிரியல் முறைகள்
1. டிரைக்கோடெர்மா விரிடி என்ற விதைநேர்த்தி பூஞ்சாணத்தை ஒரு கிலோ விதைக்கு 4 கிராம் வீதம் கலந்து விதைப்பதால் விதையுடன் பரவும் நோய்களைத் தடுக்கலாம். இதனால் ஏக்கருக்கு ரூ.3/- மட்டுமே செலவாகும்.
2. டிரைக்கோகிரம்மா ஒட்டுண்ணி விடுதல்: ஒரு ஏக்கருக்கு ஒரு தடவை 4,000 வீதம் 6 தடவைகள் மொத்தம் 24,000 எண்கள் விடப்பட வேண்டும். இதை பருத்தி விதைத்த 40ம் நாளிலிருந்து ஆரம்பித்து 15 நாள் இடைவெளியில் மொத்தம் 6 தடவைகள் விடப்பட வேண்டும். இவை காய்ப்புழுக்கள் முட்டைகளின்மீது தன் முட்டைகளை இட்டு காய்ப்புழுக்கள் தோன்றாமல் தடுக்கின்றது.
3. கிரைசோபா, பொரிவண்டு, செலானஸ் குளவி ஆகியவை காய்ப்புழுக்களின் அந்துப்பூச்சிகள், முட்டைகள், புழுக்கள் ஆகியவற்றினைப் பெருமளவில் தாக்கி அழிக்கின்றன. எனவே நன்மை செய்யும் இப்பூச்சிகளை அதிகப்படுத்த பருத்தியில் ஊடுபயிராக மக்காச்சோளம், தட்டைப்பயறு போன்றவைகளை சாகுபடி செய்ய வேண்டும்.
4. ரெடுவட் நாவாய்ப்பூச்சி ஏக்கருக்கு 2000 பூச்சிகள் வெளியிடுவதால் அனைத்துவகை புழுக்களையும் கட்டுப்படுத்தலாம்.
5. பல்வேறு வகையான சிலந்திகள் காய்ப்புழுக்களையும், அதன் அந்துப் பூச்சிகளையும் பெருமளவு உணவாக்கிக் கொள்கின்றன. மேலும் பல்வேறுவகையான குளவிகள் காய்ப்புழுக்களையும் அந்துப் பூச்சிகளையும் உணவாகக் கொள்கின்றது. சிலவகை குளவிகள் தன் இனத்தைப் பெருக்குவதற்காக காய்ப்புழுக்களின் முட்டைகளின் மேல் தன் முட்டைகளை இட்டு காய்ப்புழுக்கள் தோன்றாமல் தடுக்கின்றன. எனவே இப்படிப்பட்ட நன்மை தரும் பூச்சிகளை அழிக்காமல் இருக்க பூச்சிக்கொல்லி உபயோகத்தினை தவிர்த்திட வேண்டும்.
6. என்.பி. வைரஸ் தெளித்தல்: காய்ப் புழுக்களைத் தடுக்க ஒரு ஏக்கருக்கு 200 வைரஸ் தாக்கிய புழுக்களின் திரவம் தேவைப்படும். இத்துடன் 200 மில்லி டீப்பாலை 200 லிட்டர் நீரில் கலந்து கைத்தெளிப்பானால் மாலை வேளையில் தெளிக்க வேண்டும். முதல் மற்றும் 2ம் நிலை புழுக்களைப் பார்த்த நாளிலிருந்து 15 நாள் இடைவெளியில் 3 தடவைகள் தெளிக்க வேண்டும். இதனால் காய்ப்புழுக்களின் தாக்குதல் இந்தப் பருவத்திலும், அடுத்த பருவத்திலும் வெகுவாகக் குறையும். ஒவ்வொரு புழுவிற்கும் தனித்தனி வைரஸ் உண்டு.
7. பாசில்லஸ் துரின்ஜின்சிஸ் (ஆ.கூ) எனும் பாக்டீரியா காய்ப்புழுக்களை நோயுறச் செய்து அழிக்கும். இதனையும் பருத்தியில் தெளிக்கலாம். 1 ஏக்கருக்கு 400 கிராம் பாக்டீரியா தேவைப்படும்.
8. ‘கூ’ வடிவ குச்சிகளை நட்டு வைத்தல்: வெளியிலிருந்து வந்து பெருமளவு சேதம் விளைவிக்கும் எலிகளைக் கட்டுப்படுத்த பருத்தி வயலில் 4,5 இடங்களில் சுமார் 5 அடி கூ வடிவ குச்சிகளை நட்டு வைக்க வேண்டும். எலிகளை விரும்பி உண்ணும் ஆந்தை போன்ற பறவைகள் இதன்மேல் உட்கார்ந்து எலிகளை சுலபமாக பிடித்து உண்ண இக்குச்சிகள் உதவிபுரியும். ஒரு ஆந்தை ஒரு இரவில் குறைந்தது 5-6 எலிகளை உண்ணும்.

உயிரியல் முறையினால் நன்மைகள்:
1. ரசாயன மருந்துகளை விட சிக்கனமானது.
2. ஒரு தடவை பயன்படுத்தினால் பயிர் அறுவடைக்காலம் வரை நிலைத்து நிற்கும்.
3. மண்ணில் வாழும் நுண்ணுயிர்களுக்குத் தீங்கு விளைவிப்பதில்லை.
4. சுற்றுப்புற சூழ்நிலையோ அல்லது மனிதர்கள், கால்நடைகள் பயன்படுத்தும் நீர் நிலைகளைப் பாழாக்குவதில்லை. வேறு எந்தக் கெடுதலும் ஏற்படுத்தாது.
5. பயிரைத் தாக்கும் பூச்சிகளில் எதிர்ப்புசக்தி உருவாவதில்லை.
மேற்கண்ட முறைகள் அனைத்தையும் ஒருங்கிணைத்து செயல்படுத்தி அதற்கு மேலும் பூச்சிகளின் சேதம் பொருளாதார சேத நிலையினை எட்டினால் மட்டுமே ரசாயன பூச்சிக்கொல்லி மருந்துகளை தெளிக்க வேண்டும். இதனால் பருத்தி சாகுபடி செலவினம் மிகவும் குறைவாகி கூடுதல் லாபம் உறுதியாகக் கிடைக்கும்.

தினமலர் செய்தி  -பா.வன்னியராஜன், எம்.எஸ்சி(விவ), வேளாண்மை உதவி இயக்குனர், உழவர் பயிற்சி நிலையம், பரமக்குடி.