கோ-3 வரகு பயிரிடும் முறை – தவேபக

வரகு பயிர் இந்தியாவில் சுமார் 3000 வருடங்களாக பயிரிடப்பட்டு வருகிறது. குறு தானியப் பயிர்களிலேயே இது நீண்ட வயதுடையது (125-130 நாட்கள்). கடும் வறட்சியைத் தாங்கி வளரக்கூடியது. தமிழகத்தில் இப்பயிர் ஆழமற்ற மண் அமைப்புள்ள மாவட்டங்களான கடலூர், பெரம்பலூர், விருதுநகர், விழுப்புரம், மதுரை, புதுக்கோட்டை ஆகிய மாவட்டங்களில் மொத்தம் 5930 எக்டரில் பயிரிடப்பட்டு 8805 டன் தானிய உற்பத்தி பெறப்படுகிறது. சராசரியாக ஒரு எக்டருக்கு 1485 கிலோ தானியம் கிடைக்கிறது. விலை ரூ.15/ கிலோ.

கோ.3 என்ற வரகு ரகம் 120 நாட்களில் சராசரியாக எக்டருக்கு 1200 கிலோ தானிய விளைச்சல் தரவல்லது. ஏ.பி.கே.1 என்ற ரகம் 100-110 நாட்களில் 2000 கிலோ தானிய விளைச்சல் கொடுக்கிறது. தமிழகத்தில் அனைத்து மாவட்டங்களிலும் இந்த இரண்டு ரங்களும் பயிரிட ஏற்றவை. மானவாரியாக வரகு சாகுபடி செய்யப்படுவதால் தென்மேற்கு பருவமழை அதிகமாகப் பெறப்படும் மாவட்டங்கள் ஆடிப்பட்டத்திலும், வடகிழக்கு பருவமழை அதிகமாகப் பெய்யும் மாவட்டங்களில் புரட்டாசிப் பட்டத்திலும் விதைப்பு செய்வது நல்லது.

வரகு (படம் உதவி: தமிழ்விக்கிப்பீடியா)

வரகு (படம் உதவி: தமிழ்விக்கிப்பீடியா)

வரகு பொதுவாக தனிப்பயிராகவே பயிரிடப் படுகிறது. சில சமயங்களில் இத்துடன் ராகி (அ) பச்சைப்பயறு (அ) உளுந்து (அ) துவரை (அ) எள் (அ) மக்காச்சோளம் (அ) கடலை போன்ற பயிர்களுடன் 2:1 அல்லது 1:1 என்ற விகிதத்தில் ஊடுபயிராகவும் பயிரிடப்படுகிறது. வரகுப்பயிரை துவரை அல்லது அவரை போன்ற பயறுவகைப் பயிர்களுடன் 8X2 வரிசை என்ற விகிதத்தில் ஊடுபயிர் செய்வதால் மண்வளத்தைக் காப்பதுடன் அதிக லாபமும் பெறலாம். நிலத்தை நல்ல முறையில் உழுது தயார் செய்தால் சிறிய விதையாக இருக்கும் வரகு முளைத்து வெளிவர 5 நாட்கள் ஆகும். களைகளின் பாதிப்பும் குறையும். இரண்டு அல்லது மூன்று இடைஉழவு செய்வதால் களைகள் கட்டுப்படும்.

அசோஸ்பைரில்லம் 600 கிராம், 600 கிராம் பாஸ்போ பாக்டீரியா (அ) 600 கிராம் அசோபாஸ் நுண்ணுயிர் உரங்களை ஒரு எக்டருக்கான விதையுடன் கலந்து விதைநேர்த்தி செய்து பின் விதைப்பு செய்ய வேண்டும். ஒரு கிலோ விதையுடன் 2 கிராம் கார்பன்டசிம் (அ) திரம் கலக்க வேண்டும். ரசாயனப் பொருட்களைக்கொண்டு விதைநேர்த்தி செய்வதாக இருந்தால் முதலில் அவற்றுடன் கலந்து விதைநேர்த்தி செய்ய வேண்டும். பின் விதைப்பதற்கு 24 மணி நேரத்திற்கு முன்பாக நுண்ணுயிர் கலவையுடன் சேர்க்க வேண்டும்.

விதைக்கும் முறை:

பொதுவாக கைத்தெளிப்பு முறையில் விதைக்கப்படுகிறது. எக்டருக்கு 15 கிலோ விதை தேவைப்படும். ஆனால் பயிரின் வளர்ச்சி ஒரே சீராக இருக்காது. விதைப்பான் கொண்டு வரிசை விதைப்பு செய்தால் அதிக பரப்பளவில் மண் ஈரம் காயும் முன்பே விதைக்கலாம். இம்முறையில் 10 கிலோ விதை போதுமானது. விதையை விதைக்கும்போது 2.5 செ.மீ. ஆழத்தில் விதைக்க வேண்டும். வரிசைக்கு வரிசை 22.5செ.மீ. இடைவெளியும், செடிக்குச்செடி 10 செ.மீ. இடைவெளியும் இருக்க வேண்டும். ஒரு எக்டருக்கு 12.5 டன் மக்கிய தொழு உரம் கடைசி உழவின்போது பரப்பி பின் உழவேண்டும். இந்த தொழு உரத்துடன் 10 பொட்டலம் அசோஸ்பைரில்லம், 10 பொட்டலம் பாஸ்போ பாக்டீரியா உரங்களைச் சேர்த்து இடலாம்.

மண் பரிசோதனை முறைக்கு ஏற்ப உரம் இடவேண்டும். அல்லது எக்டருக்கு 44:22 கிலோ தழை, மணி சத்துக்களை இடவேண்டும். விதைக்கும் போதே அடியுரமாக மணிச்சத்து உரத்தை இடவேண்டும். தழைச்சத்தை பாதி அளவு இட்டு மீதமுள்ளதை மேலுரமாக விதைத்த 35-40வது நாளில் முதல் களைக்குப் பின்னர் இடலாம். வரிசை விதைப்பு செய்திருந்தால் 2- 3முறை இடை உழவு செய்து, பின் ஒரு முறை கைக்களை எடுக்க வேண்டும். கைத்தெளிப்பு முறையில் விதைத்திருந்தால் இடைஉழவு செய்ய இயலாது. எனவே பயிர் விதைத்த 15ம் நாள் மற்றும் 40ம் நாள் கைக்களை எடுக்க வேண்டும். களை எடுத்தவுடன் 22.5செ.மீ. து 10 ச.மீ. இடைவெளிவிட்டு பயிர்களைக் கலைத்துவிட வேண்டும். கலைத்த பயிர்களைக் கொண்டு பயிர் இல்லாத இடத்தில் இடைநடவு செய்யலாம்.

தேவையான அளவு மண்ணில் ஈரப்பதம் இல்லை என்றாலோ (அ) நல்ல பரவலாக தேவையான அளவு மழைப்பொழிவு இல்லை என்றாலோ பண்ணைக் குட்டைகளில் சேமிக்கப்பட்ட மழைநீரைப் பயன்படுத்தி தெளிப்பான் கொண்டு தெளித்து காப்பாற்றலாம். தக்க பயிர் பாதுகாப்பு நடவடிக்கை எடுத்து மணிக்கரிப்பூட்டை நோய், குருத்து ஈ தாக்குதல் ஆகியவற்றைக் கட்டுப்படுத்த வேண்டும். கதிர்கள் நன்கு காய்ந்து முடித்தவுடன் அறுவடை களத்தில் காயவைத்து அடித்து தானியங்களைப் பிரித்தெடுக்க வேண்டும். நன்கு சுத்தம் செய்து சேமித்து வைக்க வேண்டும். வரகிலிருந்து சாதம், இட்லி, தோசை, உப்புமா, கூழ், பச்சடி போன்ற சத்துமிக்க உணவுப் பண்டங்கள் தயாரிக்கலாம்.

தினமலர் தகவல்: முனைவர் சுப்பிரமணியன், அ.நிர்மல்குமார், வெ.வீரபத்திரன், சிறுதானியத்துறை, த.வே.ப.கழகம், கோயம்புத்தூர்-641 003. 0422-245 0507
டாக்டர் கு.சௌந்தரபாண்டியன்

வேளாண் அரங்கத்தில்

 

Advertisements

கேழ்வரகு (ராகி) சாகுபடி செய்தால் என்ன?

கேழ்வரகை எந்த பருவத்திலும் பயிரிடலாம். எல்லா வகை நிலங்களிலும் பயிரிடலாம். மண்ணின் கார, அமிலத் தன்மை 6.5 முதல் 7.5 கொண்ட நிலங்கள் சிறந்தவை.

உழவு:
நிலத்தை சட்டிக் கலப்பை கொண்டு ஆழமாக உழவு செய்யவேண்டும். இப்படி உழுவதால் மண் அரிப்பு தடுக்கப்பட்டு மழைநீர் சேமிக்கப்படுவதுடன், களைகளையும் ஓரளவு கட்டுப்படுத்தலாம்.

நடவு:
வறட்சியை தாங்கி வளர விதைகளை விதை நேர்த்தி செய்ய வேண்டும். இவ்வாறு செய்வதன் மூலம் விண்ணிலுள்ள தழைச்சத்தைக் கிரகித்து பயிர்களுக்கு அளிக்கலாம்.

நாற்றுவிட்டு நடவு செய்தல் நல்லது. நேரடியாக விதைப்பதால் 3 வாரங்களில் குருத்து ஈ தாக்குதல் இருக்கும். இதை எளிதில் கட்டுப்படுத்த முடியாது. நாற்று விட்டு நடவு செய்யும்போது இதன் தாக்குதல் குறையும். மேலும் 10 நாள்களுக்கு முன்பே அறுவடைக்கு வந்துவிடும்.

வெளிறிய தோற்றம் கொண்ட மற்றும் அடிச்சாம்பல்நோய் தாக்கிய நாற்றுக்களை அகற்றிவிட வேண்டும்.

ஒரு குத்தில் வாளிப்பான ஒரு நாற்றை மட்டும் நட வேண்டும். 10 சதுர மீட்டருக்கு 150 செடிகள் என்ற எண்ணிக்கையில் பராமரிக்க வேண்டும்.

ஒரு ஹெக்டேருக்கு தேவையான நாற்றுகளை உற்பத்தி செய்ய 7.5 சென்ட் தண்ணீர் தேங்காத நிலத்தை தயார் செய்ய வேண்டும்.

நட்ட 15 மற்றும் 30 நாளில் தழைச்சத்து உரத்தை மேலுரமாக இடவேண்டும். விதைத்தவுடன் ஒரு முறையும், 4-ம் நாளும், 10-ம் நாளும் நிலம் மற்றும் காலநிலைக்கு தகுந்தவாறு நீர்ப்பாய்ச்ச வேண்டும்.

அறுவடை:
தானியம் காய்ந்து கடினத் தோற்றம் பெற்றவுடன் கதிர்களை மட்டும் அறுவடை செய்ய வேண்டும். தானியங்களை விசை கதிரடிகளை கொண்டோ, கல் உருளைகளை பயன்படுத்தியோ, மாடுகளை பிணைக் கட்டியோ பிரித்தெடுக்கலாம்.

ஒரு மாதத்துக்கு முன்பே கோடை மழை தொடங்கி விட்டதால் கேழ்வரகு பயிரிட இது ஏற்ற தருணம். அனைவரும் நெல் பயிரிடும் போது நாம் கேழ்வரகை பயிரிட்டால் நல்ல விலை கிடைக்கும்
– ஒய்.முகமது முபாரக், வேளாண் உதவி இயக்குநர், நெமிலி.

தினமணி தகவல் – வேளாண் துறை, அரக்கோணம்