கரும்பு சாகுபடி நிலம் தயார் செய்யும் முறைகள்

கரும்பு விளைவிக்கப்படும் நிலங்களில் தொடர்ந்து கரும்பு மட்டுமே சாகுபடி செய்யக் கூடாது என்று வேளாண்துறை தெரிவித்துள்ளது. ஒரு முறை கரும்பு சாகுபடி செய்தவுடன் அதை வெட்டி எடுத்த பிறகு ஒரு முறை கட்டை கரும்புக்குப் பின் அந்த நிலத்தில் மாற்றுப் பயிர் ஒன்றை சாகுபடி செய்ய வேண்டும். அதன் பின்னரே கரும்பை மீண்டும் பயிரிட வேண்டும் என்றும் தெரிவிக்கப்பட்டுள்ளது.

நெல், வாழை, மஞ்சள், நிலக்கடலை, சணப்பை, தக்கைப்பூண்டு போன்றவற்றை கரும்பு சாகுபடி செய்யும் நிலங்களில் சுழற்சி முறையில் பயிர்களை சாகுபடி செய்யலாம் என்றும் வேளாண் துறை யோசனை தெரிவித் துள்ளது.

நிலம் தயாரித்தல்

ஓராண்டுப் பயிரான கரும்பின் வேர்கள் நன்றாக வளர்ந்து நீர் மற்றும் ஊட்டச் சத்துகளை மண்ணில் இருந்து பெற வேண்டுமானால் வயலில் குறைந்தது 30 செ.மீ. ஆழம் வரை மண் மிருதுவாக இருக்க வேண்டும்.

டிராக்டர் மூலம் உழவு செய்வதாக இருந்தால், முதல் உழவை சட்டிக் கலப்பை அல்லது இறக்கை கலப்பை மூலமும் 2-வது மற்றும் 3-வது உழவை கொத்துக் கலப்பை மூலம் செய்ய வேண்டும்.

மேடு, பள்ளங்கள் அதிகம் இல்லாத நிலமாக இருந்தால், 3-வது உழவுக்குப் பின் சமன் செய்யும் கருவி கொண்டு நிலத்தை சமன் செய்து பின்னர் பார் பிடிக்கும் கலப்பை கொண்டு பார்களைப் பிடிக்கலாம்.

எருதுகளைக் கொண்டு உழவு செய்வதாக இருந்தால் முதல் உழவை இறக்கைக் கலப்பை மூலம் செய்யலாம். 2-வது மற்றும் 3-வது உழவுக்கு நாட்டுக் கலப்பையை உபயோகிக்கலாம்.

மண் நன்றாக மிருதுவாகும் வரை நாட்டுக் கலப்பையை கொண்டு உழ வேண்டும். பின்னர் பார் பிடிக்கும் கலப்பை மூலம் பார் பிடிக்கலாம்.

உரம் நிர்வாகம்

இயற்கை உரங்களான தொழுஉரத்தை ஹெக்டேருக்கு 25 டன்கள் வரை கடைசி உழவுக்கு முன் இட வேண்டும். இதனால், மண் வளம் மேம்படுவதுடன் மண் நலமும் பாதுகாக்கப்படுகிறது.

பசுந்தாள் உரப் பயிர்களான தக்கைப்பூண்டு அல்லது சணப்பை பயிரிடப்பட்டிருந்தால் இறக்கை கலப்பையை கொண்டு மடக்கி உழுது பின்னர் 2 வாரங்களுக்குப்பின் உழவு செய்து நிலத்தை தயார் செய்ய வேண்டும். மண் பரிசோதனை முடிவுக்கேற்ப அடி உரமாக ரசாயன உரங்கள் இட வேண்டும்.

பார் அமைத்தல்

சாகுபடி செய்யும் ரகம், நீர் பாய்ச்சுவதற்கு வசதி மற்றும் நிலத்தின் வளம் ஆகியவற்றுக்கு ஏற்ப தகுந்த இடைவெளியில் பார்களை அமைக்க வேண்டும். நல்ல வளமான மண்ணில் நன்கு தூர்விட்டு வளரும் ரகம் பயிரிடுவதாக இருந்தால் 90 செ.மீ. பாருக்கு பார் இடைவெளி இருக்க வேண்டும்.

நல்ல வளமான மண்ணில் குறைந்த தூர்விடும் ரகமாக இருந்தால் 75 செ.மீ. இடைவெளிவிடுதல் வேண்டும். இயந்திரங்கள் மூலம் நடவு, அறுவடை செய்ய 150 செ.மீ. அகலப் பார்கள் அமைக்க வேண்டும்.

கரும்புப் பயிர் நன்கு வேர் ஊன்றி வளரவும், கரும்பு வளர்ந்தப் பின்னர் சாயாமல் இருக்கவும், பார்களுக்கு இடையே 20 செ.மீ. முதல் 30 செ.மீ. வரை ஆழத்தில் சால் அமைக்க வேண்டும்.

ஆழமான சாலில் கரும்பு நடவு செய்தால் நன்கு மண் அணைக்க ஏதுவாக இருப்பதுடன், அறுவடை செய்யும் வரை கரும்பு சாயாமல் நல்ல மகசூல் கொடுக்கும்.

கரும்பு பயிரிடப்படும் பட்டங்கள்

தமிழகத்தில் பொதுவாக டிசம்பர் முதல் மே மாதம் வரை 3 பட்டங்களில் கரும்பு சாகுபடி செய்யப்படுகிறது.

  • டிசம்பர், ஜனவரியில் முதல் பட்டமாகவும்,
  • பிப்ரவரி, மார்ச்சில் நடுப்பட்டமாகவும்,
  • ஏப்ரல், மே மாதத்தில் பின்பட்டமாகவும் பயிரிடப்படுகிறது.

சிறப்புப் பட்டமாக ஜூன், ஜூலையில் கோவை, திருச்சி, பெரம்பலூர், கரூர், சேலம், நாமக்கல் ஆகிய மாவட்டங்களில் கரும்பு நடவு செய்யப்படுகிறது.

இது குறித்து கூடுதல் விவரம் அறிய தொடர்பு கொள்ள வேண்டிய முகவரி:

இயக்குநர்,

கரும்பு இனப்பெருக்கு நிறுவனம், கோவை-641007.

தொலைபேசி எண்:0422-2472621.

தினமணி தகவல்

கரும்பு தோகையை உரமாக்குவது எப்படி?

கரும்பு தோகையை எரிக்காமல் அதை உரமாக்கி பயன்படுத்தும் முறை குறித்து வேளாண் துறையினர் யோசனை கூறியுள்ளனர்.

கரும்பு அறுவடைக்குப் பிறகு பெரும்பாலான விவசாயிகள் கரும்பு தோகையை வயலிலேயே எரித்து விடுகின்றனர். இதனால் ஒரு ஹெக்டேருக்கு 25 டன் இயற்கை எரு வீணாகிறது.

எருவின் மூலம் கிடைக்கக் கூடிய 100 கிலோ தழைச்சத்து (220 கிலோ யூரியாவுக்கு சமம்) 50 கிலோ மணிச்சத்து (315 கிலோ சூப்பர் பாஸ்பேட்டுக்கு சமம்), கந்தகச் சத்துகள் கிடைப்பதில்லை. மேலும் மறுதாம்பு கரும்பின் முளைப்புத்திறன் 30 சதவீதம் குறைகிறது. வளர்ச்சியும் தடைபடுகிறது.

மண்ணில் வாழும் நுண்ணுயிரிகள், மண்புழுக்கள் அழிக்கப்படுகின்றன. எரிப்பதால் ஏற்படும் புகையால் சுற்றுச்சூழலும் பாதிக்கப்படுகிறது.  எனவே கரும்புத் தோகையை எரிக்காமல் உரமாக்கி நிலத்தை வளப்படுத்தலாம்.

உரமாக்கும் முறை:

கரும்பு வயலின் ஒரு மூலையில் 9x5x1 மீட்டர் அளவில் குழி எடுக்க வேண்டும். அக்குழியில் 500 கிலோ கரும்பு தோகையினை போட வேண்டும். அதன் மேல் வயல் மண் (அ) கரும்பு ஆலைக்கழிவு (பிரஸ்மட்) 500 கிலோவை இட்டு, அதன் மேல் 10 கிலோ பாறை பாஸ்பேட், 10 கிலோ ஜிப்சம் மற்றும் 5 கிலோ யூரியா கலவையை தூவ வேண்டும். மேற்கூறிய அனைத்தும் நன்கு நனையும்படி நீர்த் தெளிக்க வேண்டும்.

இவ்வாறு உருவாக்கிய அடுக்கின் மேல் மாட்டுச்சாணம், மக்கிய எரு மற்றும் வயல் மண் கலந்த கரைசலை 500 லிட்டர் என்ற அளவில் தெளிக்கவும். இவ்வாறாக குழி நிரம்பும் வண்ணம் 10 முதல் 15 அடுக்குகள் இடுவதன் மூலம் 5 டன் கரும்பு தோகையை உரமாக்கலாம்.

இறுதியாக உரக்குழியை நில மட்டத்துக்கு மேல் அரை அடி உயரம் மேடாகும் வண்ணம் மண் கொண்டு மெழுகி மூடிவிட வேண்டும்.

மூன்று மாதங்கள் கழித்து குழி முழுவதையும் நன்கு மக்குமாறு கலக்கிவிடவேண்டும். மக்கும் எரு நன்கு நனையுமாறு வாரம் ஒருமுறை நீர்த் தெளித்து பராமரித்தால் ஆறு மாதத்துக்குள் மக்கிய கரும்பு தோகை உரம் தயாராகிவிடும். இதை எல்லா பயிர்களுக்கும் பயன்படுத்தி நல்ல பயன் பெறலாம் என செய்யாறு வேளாண்மை உதவி இயக்குநர் ஏ.எம்.சாந்தி தெரிவுத்துள்ளார்.

தினமணி தகவல் – தே. சாலமன்

ஏ. எம். சாந்தி, வேளாண்மை உதவி இயக்குநர், செய்யார்

செம்மை கரும்பு சாகுபடி – குறைந்த செலவு – அதிக லாபம்

உலக அளவில் பிரேஸிலுக்கு அடுத்தபடியாக, கரும்பு உற்பத்தியில் இந்தியா 2-வது இடம் வகிக்கிறது. இந்தியாவில் 571 சர்க்கரை ஆலைகள் உள்ளன.

குறிப்பாக, தமிழகத்தில் ஹெக்டேருக்கு சராசரியாக 106 டன் கரும்பு உற்பத்தி செய்யப்படுகிறது. இந்தியாவின் மொத்த சர்க்கரை உற்பத்தியில் தமிழகத்தின் பங்களிப்பு 10 சதவீதம்.

கடந்த 10 ஆண்டுகளில் கரும்பு விவசாயம் பெரும் ஏற்ற இறக்கங்களைச் சந்தித்து வருகிறது. தமிழகத்திலும் கரும்பு உற்பத்தி ஆண்டுக்கு ஆண்டு ஏற்ற இறக்கங்களைக் கொண்டதாக மாறிவிட்டது.

எனவே, கரும்பு உற்பத்தியை பெருக்குவதில், சாகுபடி செலவைக் குறைப்பதில், அதிக கவனம் செலுத்த வேண்டிய கட்டாயம் ஏற்பட்டு இருக்கிறது.  எனவே செம்மை நெல் சாகுபடியைப் போல், செம்மைக் கரும்பு சாகுபடி முறை, விவசாயிகளுக்கு வேளாண் விஞ்ஞானிகளால் பரிந்துரைக்கப் படுகிறது.

கரும்பு சாகுபடியில் புதிய அணுகுமுறையான, செம்மைக் கரும்பு சாகுபடி மூலம்  நீர் சேமிப்பு, விளைச்சல் அதிகரிப்பு அம்சங்கள் அதிகரிக்கிறது. குறைந்த விதை நாற்றைப் பயன்படுத்தி, குறைந்த தண்ணீரில், சரியான ஊட்டச்சத்து அளித்து, சரியான பயிர் பராமரிப்பையும் பயன்படுத்தி, அதிக மகசூல் பெறமுடியும் என்கிறார்கள் வேளாண் விஞ்ஞானிகள்.

கரும்பு விதைக் கரணைகள் மூலம் புதிய கரும்பை உற்பத்தி செய்வதற்குப் பதில், கரும்பில் உள்ள விதைப் பருக்கள் சீவல்களைக் கொண்டு பாலித்தீன் பைகள் அல்லது பிளாஸ்டிக் டிரேக்களில் நாற்றங்கால் தயாரித்து, பின்னர் வயலில் நடவு செய்யும் முறை அறிமுகப்படுத்தப்படுகிறது.

7 முதல் 9 மாதங்கள் முதிர்ந்த கரும்பில் இருந்து விதைப் பருக்களின் சீவல்கள் வெட்டுக் கருவிகள் மூலம் வெட்டி எடுக்கப்படுகிறது. இதற்கான  இயந்திரங்கள் பயன்பாட்டுக்கு வந்துவிட்டன. விதை நேர்த்தியும் செய்யப்பட வேண்டும். 25 முதல் 35 நாள்கள் ஆன நாற்றுகள் வயல்களில் நடப்படும்.   நடவு செய்யும்போது வரிசைக்கு 5 அடி இடைவெளியும், நாற்றுக்கு நாற்று 2 அடி இடைவெளியும் விட்டு நடவு செய்யப்பட வேண்டும். இதன்மூலம் ஊடுபயிர் செய்தல், இயந்திரம் மூலம்  களையெடுத்தல், அறுவடை போன்ற பணிகளும் எளிதாகிறது.

ஊடுபயிராக 3 மாதங்கள் வரை தட்டைப் பயறு, கொண்டைக் கடலை, உருளைக் கிழங்கு, கோதுமை, தர்பூசணி, போன்றவற்றைப் பயிரிடலாம். ஊடுபயிர்கள் கரும்பு வளர்ச்சிக்கும் உதவுகின்றன. விதைக் கரணைகள் மூலம் புதிய கரும்பை உற்பத்தி செய்ய, ஏக்கருக்கு 4 டன்கள் வரை கரும்பு தேவைப்படுகிறது. ஆனால் செம்மைக் கரும்பு சாகுபடியில் 500 கிலோ (5 ஆயிரம் விதைச் சீவல்கள்) போதும்.

தேவையான அளவுக்கு மட்டும் ஈரப்பதம் இருக்கும் வகையில் நீர்ப்பாசனம், இயற்கை உரங்களைப் பயன்படுத்துதல், பராமரிப்புக்கு போதிய முக்கியத்துவம் அளித்தல், பயிருக்கு  நல்ல காற்றோட்டம், சூரிய வெளிச்சம் ஆகியவற்றை அதிகரித்தல் மூலம் சாகுபடி காலத்தையும், செலவை குறைக்கவும், மகசூலை அதிகரிக்க முடியும் என்கிறார்கள்  வேளாண் விஞ்ஞானிகள்.

இதுகுறித்து நெல்லிக்குப்பம் சர்க்கரை ஆலை அதிகாரி ஒருவர் கூறுகையில், செம்மைக் கரும்பு சாகுபடி மூலம், சாகுபடிச் செலவைக் குறைக்க முடியும். ஒரே மாதிரியான, தரமான கரும்பு நாற்றுகளை விவசாயிகளுக்கு வழங்க முடியும்.

இதனால் உற்பத்தி அதிகரிக்கும். நாற்று தயாரிக்க விவசாயிகளுக்குப் பயிற்சி அளித்து வருகிறோம். 4 இடங்களில் விளக்கப் பண்ணைகளும் அமைத்து இருக்கிறோம். கரும்பு நாற்றுகளை பிளாஸ்டிக் டிரேக்களில் வளர்க்கிறோம் என்றார்.

இதுகுறித்து நெல்லிக்குப்பம் அருகே எய்தனூரைச் சேர்ந்த விவசாயி நிரஞ்சன் கூறுகையில், செம்மை கரும்பு சாகுபடி குறித்து ஆந்திர மாநிலத்திலும், தஞ்சை மாவட்டம் காட்டுத் தோட்டத்திலும் பயிற்சி பெற்றேன். நான், எய்தனூரில் 12 ஏக்கரில் செம்மைக் கரும்பு சாகுபடி முறையில் கரும்பு உற்பத்தி செய்ய திட்டமிட்டு இருக்கிறேன்.

செம்மைக் கரும்பு சாகுபடி மூலம் சாகுபடிச் செலவு குறைவு, ஊடுபயிர் செய்யலாம். தண்ணீர் செலவு குறைவு. மகசூல் அதிகரிக்கிறது போன்ற விவரங்களை ஆந்திர மாநில விவசாயிகள் மூலம் நேரடியாகத் தெரிந்து கொண்டேன். இந்தியா முழுவதும் செம்மைக் கரும்பு சாகுபடி முறை அறிமுகப்படுத்தப்பட்டு வருகிறது என்றார்.

தகவல் – தினமணி கடலூர்.

புதிய கரும்பு ரகம் த.வே.ப.க. கரும்பு எஸ்.ஐ.7

இது மற்றுமொரு வேளாண் பல்கலைக் கழகத்தின் சமீபத்திய வெளியீடு.

இதன் வயது 11 மாதங்கள்.

பருவம்-முன்பட்டம்.

மகசூல் நடவு பயிர் மறுதாம்பு பயிர்
(டன்/எக்டர்)
கரும்பு 154 14.6
சர்க்கரை 20.5 19.4
அதிக பட்ச மகசூல் 168 டன்/ எக்டர்

சிறப்பியல்புகள்:

  • அதிக கரும்பு மகசூல், சர்க்கரை சத்து, சிறந்த மறுதாம்புத்திறன்;
  • எளிதாக தோகை உரியும்;
  • சுணையற்றது;
  • பூக்காத தன்மை, வறட்சி, அதிக நீர் தேக்கத்தினை தாங்கும், செவ்வழுகல் நோய்க்கு மிக எதிர்ப்புத்திறன்.

பயிரிட உகந்த மாவட்டங்கள்: தமிழகத்தில் கரும்பு சாகுபடி செய்யம் அனைத்துப்பகுதிகளுக்கும் ஏற்றது.

மேலும் விபரங்களுக்கு, விதை, நாற்றுகள் ஆகியவற்றிற்கு தொடர்பு கொள்ள வேண்டிய முகவரி:

இயக்குனர், ஆராய்ச்சி, தமிழ்நாடு வேளாண்மைப் பல்கலைக்கழகம், கோயம்புத்தூர்-641 003.

தினமலர் தகவல் – த.வே.ப.க

கரும்பு – நிழல்வலைக் கூடத்தில் நாற்றங்கால் அமைக்க யோசனை

சாதாரணமாக கரும்பு நடவின் போது 2 அல்லது 3 பரு உள்ள விதைக் கரணைகள் உபயோகிக்கப்படுகிறது. ஆனால், நவீன செம்மை சாகுபடி தொழில்நுட்பத்தில், ஒரு  பரு கரணைகளை பயன்படுத்தி நிழல்வலைக் கூட நாற்றங்கால் அமைக்கப்படுகிறது.

கரணைகள் தெரிவுசெய்யப்பட்டு தேங்காய் நார்க் கழிவு உதவியோடு இதற்கென உள்ள பிளாஸ்டிக் ட்ரேயில் வளர்க்கப்படுகின்றன. இவ்வாறு நாற்றங்கால் அமைப்பதன் மூலம் அதிக அளவு முளைப்புத் திறனை குறைந்த நாள்களிலேயே அடைய முடியும்.

சாதாரண முறையில் நிலத்தில் வளர்க்கப்படும் கரும்பு கரணைகளில் 2 மாதத்தில் ஏற்படும் வளர்ச்சி இம் முறையில் ஒரு மாதத்தில் பெறப்படுகிறது.

நாற்றுகள் நடவு செய்தல்:

நாற்றுகளை 25 முதல் 30 நாள்களுக்குள் நடவேண்டும்.  பார்கள் 4 அடி இடைவெளியில் அமைக்கப்பட வேண்டும். ஒரு ஏக்கர் நடவு செய்ய 5,450 நாற்றுகள் தேவைப்படும். 5 அடி இடைவெளி பார் என்றால் 4,350 நாற்றுகள் என கணக்கிட்டு நடவு செய்யவேண்டும். நாற்று நடவுக்கு ஒரு நாள் முன்பு நாற்றுகளுக்கு தண்ணீர் விடுவதை நிறுத்த வேண்டும். நாற்று நடும்போது இயற்கை உரம் அல்லது டிஏபி இடவேண்டும்.

உரம் இடுதல்:

ஒவ்வொரு நிலத்திலும் அந்த மண்ணிலுள்ள சத்துகளின் அளவை மண்ணாய்வு செய்து அதற்கேற்றவாறு உரம் இடவேண்டும். அல்லது ஒரு ஏக்கருக்கு 110 கிலோ தழைச்சத்து, 25 கிலோ மணிச்சத்து, 45 கிலோ சாம்பல் சத்து இட வேண்டும் என அவர் தெரிவித்துள்ளார்.

தினமணி தகவல்: திரு வ.மோகன்ராஜ், ஆலை ஆட்சியர், சுப்பிரமணிய சிவா கூட்டுறவு சர்க்கரை ஆலை, பாப்பிரெட்டிப்பட்டி

கரும்பு சாகுபடியில் வறட்சி நிர்வாகம்

கரும்பு

கரும்பு

தண்ணீர் பற்றாக்குறையை சமாளிக்க முதலில் மண்ணிலிருந்து நீர் ஆவியாகி விரயமாவதை தடுக்க வேண்டும். இதற்கு கரும்பு சோகைகளை பயன்படுத்தலாம். கரும்பு சோகை ஒரு எக்டரிலிருந்து 10 டன் வரை கிடைக்கும். இதை மக்கவைத்து இயற்கை உரமாக பயன்படுத்தலாம். அல்லது அப்படியே கரும்பு நட்ட பார்கள் மேல் சீராக பரப்பி வைக்கலாம். இதனால் நீர் ஆவியாகி விரயமாவது தடுக்கப்படும். மேலும் கரும்பு சோகைகளை பார்களின் மேல் பரப்புவதால் களைகள் வளர்வதும் கட்டுப் படுத்தப்படும். மேலும் கரும்பு சோகை மக்கி எருவாகவும் மாறி மண் வளத்தை பெருக்கும். கரும்பிற்கு பார் கட்டும்பொழுது சோகைகளையும் சேர்த்து அணைத்துக்கொடுப்பதால் வளரும் கரும்பிற்கு ஒரு அங்கக உரமாக பயன்படும். கரும்பு சோகைகளை இரு பார்களுக்கு இடையிலேயும் பரப்பலாம். இந்த முறையில் முலை வரும் கரும்பை மூடி சேதப் படுத்தாமல் கவனமாக செய்ய வேண்டும்.

தண்ணீர் பற்றாக்குறையை சமாளிக்க பயிர் வளர்ச்சி ஊக்கிகளில் கரணை நேர்த்தி செய்யலாம். அதாவது கரணைகளை நடவு செய்வதற்கு முன்னால் எத்ரல் வளர்ச்சி ஊக்கி 200 பிபிஎம் என்றால் பார்ட்ஸ் பெர் மில்லியன் அதாவது பத்து லட்சத்தில் ஒரு பங்கு என்று அர்த்தம். 200 பிபிஎம் எத்ரல் தயாரிக்க, 200 மில்லி மருந்தை 400 லிட்டர் தண்ணீரில் கலந்து கரணைகளை ஒரு மணி நேரம் ஊறவைத்து நடவுசெய்யலாம். இதனால் நல்ல முளைப்பு திறனும் வறட்சியைத் தாங்கும் தன்மையும் உண்டாகும். மேலும் எத்ரல் கரணை நேர்த்தி செய்வதால் அதிக தூர்கள் விட்டு மகசூல் அதிகரிக்கும். வறட்சி தாங்கும் தன்மையை அதிகரிக்க நீர்த்த சுண்ணாம்பு நீரையும் பயன்படுத்தலாம். இதற்கு 80 கிலோ நீர்த்த சுண்ணாம்பை 400 லிட்டர் தண்ணீரில் கலந்து கரணைகளை ஊறவைத்து நடலாம். இதனால் வறட்சி தாங்கும் தன்மை அதிகரிக்கும்.

கரணைகளை நடும்பொழுது 30 செ.மீ. ஆழக்கால் அமைத்து நடவு செய்வதன் மூலம் வறட்சி தாங்கும் தன்மையை அதிகரிக்கலாம். ஆழக்கால் நடவு முறையில் கரணைகளின் வேர்கள் நன்கு ஊடுருவி பாய்ந்து நிலத்தடி நீரை உறிஞ்சுவதால் வறட்சியை சமாளிக்கும் திறன் பெறும். மேலும் கரும்பு வளர்ந்த பின் காற்றில் சாய்வதையும் வெகுவாக குறைக்க இயலும். ஆழக்கால் நடவு முறையில் தற்போது சில மாற்றங்கள் செய்யப்பட்டு குழி நடவு முறை பரிசீலிக்கப்பட்டு வருகிறது.

தண்ணீர் பற்றாக்குறையின் போது பயிர்கள் பூமியிலிருந்து ஊட்டச்சத்துக்களை உறிஞ்ச இயலாத சூழ்நிலை ஏற்படும். இதை தவிர்க்க யூரியா 2.5 சத கரைசலை கோடையில் இலை வழியாக தெளிக்கலாம். இத்துடன் பொட்டாஷ் 2.5 சத கரைசலையும் சேர்த்து தெளிப்பதால் வறட்சியை தாங்கி வளரும். இதற்கு 12.5 கிலோ யூரியா மற்றும் 12.5 கிலோ பொட்டாஷை 500 லிட்டர் தண்ணீரில் கலந்து ஒரு எக்டர் கரும்புக்கு இலை வழியாக தெளிக்கலாம்.

இந்த முறையினை ஒரு மாத இடைவெளியில் கோடை காலங்களில் செய்வதால் பயிர் பட்டுப்போகாமல் ஊக்கமுடன் வளர உதவும். பொட்டாஷ் இலை வழியாக கொடுப்பதால், நீர் இலை துளிகள் வழியே நீராவி போக்காக வெளியேறி விரயமாவதை குறைக்க உதவும். இத்துடன் கோடை காலங்களில் ஒரு பார் விட்டு நீர் பாய்ச்சுவதால் ஒரு முறை நீர் பாசனத்திற்கு தேவையான தண்ணீரை பாதியாக குறைக்க முடியும். அடுத்த முறை தண்ணீர் பாய்ச்சும்போது ஏற்கனவே விட்டுப்போன பார்களுக்கு நீர் பாய்ச்ச வேண்டும்.

சமீப காலமாக நீர் மேலாண்மையில் ஏற்பட்டுள்ள முன்னேற்றத்தின்படி சொட்டுநீர் பாசனம் ஆகியவற்றையும் பின்பற்றலாம். சொட்டுநீர் பாசனத்தால் கரும்பிற்கு தேவையான தண்ணீரின் அளவை பாதியாக குறைக்க இயலும் என்று கண்டறியப் பட்டுள்ளது. இதனால் தண்ணீரை சிக்கனமாக பயன் படுத்துவது அல்லாமல் விளைச்சலும் எந்த விதத்திலும் பாதிக்கப்படாது. சொட்டு நீர்பாசனம் செய்யும் பொழுது கரும்பிற்கு தேவையான உரச் சத்துக்களையும் பாசன நீர் வழியே கொடுக்க இயலும். இந்த முறைதான் பெர்டிகேஷன் என்று அழைக்கப்படுகிறது.

இதனால் ஒரு எக்டருக்கு 175 முதல் 200 டன் வரை கரும்பு விளைச்சல் அதிகரிக்கும். இது சாதாரண முறையில் கிடைக்கக்கூடிய விளைச்சலை விட 70லிருந்து 90 டன்கள் அதிகமாகும். சுமார் 25 லிருந்து 50 விழுக்காடு பாசன நீரை சேமிக்கலாம். இதன் மூலம் கரும்பு பயிரிடும் நிலப்பரப்பை அதிகரிக்கலாம். சொட்டுநீர் மற்றும் பெர்டிகேஷன் முறையில் நீர்பாசனம், உரச்செலவு மற்றும் களை நிர்வாகத்திற்கு தேவையான செலவினங்களை பாதி குறைக்க இயலும். இந்த முறையில் சாதாரண முறையில் கரும்பு சாகுபடியில் கிடைக்கும், எக்டருக்கு ரூ.58,000 லாபத்தைவிட சொட்டுநீர் பாசனம் மற்றும் பெர்டிகேஷன் மூலம் எக்டருக்கு ரூ.75,000 வரை நிகர லாபம் பெறலாம். இத்துடன் வறட்சியை சமாளிக்க தாங்கி வளரும் சிறந்த ரகங்களை தேர்வு செய்ய வேண்டும். இத்துடன் சிபாரிசு செய்யப்படும் வறட்சி நிர்வாக முறைகளை கடைபிடித்தால் விளைச்சல் பாதிக்காமல் அதிக வருவாயை பெறலாம்.

டாக்டர் கொ.பாலகிருஷ்ணன், பேராசிரியர் தமிழ்நாடு வேளாண்மை பல்கலைக்கழகம்
மண்டல வேளாண்மை ஆராய்ச்சி நிலையம், அருப்புக்கோட்டை.

தினமலர் செய்தி

கரும்பில் அதிக மகசூல் பெற எளிய தொழில்நுட்பம்: விவசாயத்துறை யோசனை

கரும்பு

கரும்பு

First Published : 25 Jun 2010 11:54:12 AM IST
Last Updated : 25 Jun 2010 05:33:43 PM IST

தேனி, ஜூன் 24: கரும்பு சாகுபடியில் எளிய தொழில்நுட்பங்களைப் பயன்படுத்தி அதிக  மகசூல் பெறலாம் என ஆண்டிபட்டி வேளாண்மை உதவி இயக்குநர் பெ. கோவிந்தராஜன் விவசாயிகளுக்கு ஆலோசனை வழங்கி உள்ளார்.

இதுகுறித்து, அவர் கூறியதாவது:

கரும்பு பயிரின் மகசூல் திறனை நிர்ணயிக்கும் முக்கியக் காரணி மண்வளம். இயற்கை வேளாண்மை முறைகளான பயிற்சுழற்சி, பசுந்தாள் உரமிடுதல், இயற்கை எருக்கள், பயிர் உழவு முறை, இயற்கை முறையில் களை மற்றும் பூச்சிகளைக் கட்டுப்படுத்துதல்  ஆகியவை மண் வளமாக மாற உதவுகின்றன.

விவசாயத்திற்கு பயிர் வளர்ச்சிக்குத் தேவையான சத்துகள் மற்றும் நச்சுத்தன்மை இல்லாதிருக்கும் மண் வளம் அமைந்திருக்க வேண்டும். கரும்பு எல்லாவகை மண்களிலும் பயிரிடப்பட்டாலும், நல்ல வடிகால் வசதியுள்ள மண் சாகுபடிக்கு ஏற்றது.

கரும்பு வளர்ச்சிக்கு 6.5 முதல் 7.5 சதவீதம் வரை உள்ள கார அமில நிலை மிகவும் உகந்தது. ஒன்றரை அடி ஆழம் வரை மண் இறுக்கம் இல்லாமல் மிருதுவாக இருக்க வேண்டும். கரிமச் சத்து, ஊட்டச் சத்துகள் போதிய அளவில் இருக்க வேண்டும்.

தொழு உரம், கம்போஸ்டு எரு, பசுந்தாள் உரம், கரும்பாலை ஆலைக் கழிவு, கரும்புத் தோகை ஆகியவற்றை இட்டு மண்ணின் இயல்பு குணங்களை சீர்படுத்தலாம்.

கரும்பு பயிரிடப்படும் நிலம் களர் நிலமாக இருப்பின், இரும்புச் சத்து பற்றாக்குறை ஏற்பட்டு மகசூல் குறைந்து காணப்படும். இலைகள் மஞ்சள் நிறத்தில் வெளுத்து, பயிர் வளர்ச்சி பாதிக்கப்படும். அமிலகார நிலை (பி.எச்.,) 9-க்கு மேல் இருந்தால், எல்லா கரும்புகளும் காய்ந்துவிடும். களர் நிலத்தில் 0.1 யூனிட் பி.எச்., குறைப்பதற்கு ஏக்கருக்கு 400 கிலோ ஜிப்சம் இட வேண்டும். தொழு எரு, கம்போஸ்டு அல்லது கரும்பு ஆலை அழுக்கு 10 முதல் 15 டன்கள் இட வேண்டும்.

கரும்பு பயிரின் வளர்ச்சிக்கு 16 ஊட்டச் சத்துக்கள் தேவைப்படுகின்றன. இவற்றில் ஒன்றில் பற்றாக்குறை ஏற்பட்டாலும், பயிர் வளர்ச்சி பாதிக்கப்படும். கடந்த பல ஆண்டுகளாக தழை, மணி, சாம்பல் சத்து உரங்களாகவே இடுவதாலும், தொழு உரம், கம்போஸ்டு, பசுந்தாள் உரங்கள் இடாததாலும் நிலத்தின் உற்பத்தி திறன் வெகுவாகக்  குறைந்துவிட்டது. அங்ஙக உரங்கள் இடுவதால் மகசூல் அதிகரிப்பதுடன், நுண்ணுயிர் பெருக்கம் ஏற்பட்டு மண்ணிலுள்ள சத்துகளை பயிர்கள் எடுத்துக்கொள்வதற்கு எளிதாகிறது.

கரும்பு நடவுசெய்த 20 முதல் 30 நாள்களுக்கு பார்களுக்கு இடைப்பட்ட பகுதியில், வரிசையாக தக்கைப்பூண்டு அல்லது சணப்பை ஊடுபயிராக நடவு செய்யலாம். இவற்றை பூ பிடிக்கும் பருவத்தில் பிடுங்கி பாரின் இருபுறமும் அமுக்கி மண் அணைக்கலாம். இதனால் களைகள் கட்டுப்படுத்தப்படுவதுடன் தழைச்சத்து மற்றும் நுண்ணுயிர்கள் மண்ணில் அதிகரிக்கும்.

நடவுசெய்த மூன்றரை மாதம் முதல் 10 மாதம் வரை 2 அல்லது 3 முறை தோகைகளை உரித்து பார்களின் இடைப்பட்ட பகுதிகளில் பரப்பலாம். தோகை பரப்புவதால் வறட்சி தாங்கும் தன்மை ஏற்படுகிறது. களைகள் கட்டுபடுத்தப்படுகின்றன. தோகை எரிக்கப்படும் போது, மண்ணில் பயன் தரும் நுண்ணுயிர்கள், மண் புழுக்கள் மடிந்து விடுகின்றன. இதனால் மறுதாம்பு பயிர்கள் மகசூல் வெகுவாக பாதிக்கப்படும்.

கரும்புத் தோகையைப் பயன்படுத்தி, மண்புழு உரம் தயாரித்து மண்ணின் கரிம மக்கை மேம்படுத்தலாம். பயிர் சாகுபடிக்கு முன், மண் பரிசோதனை செய்து மண்ணில் உள்ள சத்துக்களின் அளவுகளை அறிந்து உரம் இட வேண்டும்.

சொட்டுநீர் உரப் பாசனம் மூலம் தேவையான நேரத்தில் தேவையான அளவு தண்ணீர் மற்றும் உரங்களை பயிர்களுக்கு அளிக்க முடிகிறது. மேலும் சொட்டுநீர் பாசன முறையில் களைகள் முளைப்பது குறைவு. எனவே கரும்பு சாகுபடிக்கு சொட்டுநீர் பாசன முறையை பயன்படுத்தி அதிக மகசூல் பெறலாம்.

கரும்பு பயிருக்கு நுண்ணுயிர் உரங்கள் இடுவதால், வேர்களை சுற்றி மண்ணில் தங்கி வளர்ந்து காற்றிலுள்ள தழைச் சத்தை கிரகித்து பயிருக்கு அளிக்கும். நுண்ணுயிர் உரங்களான அசோஸ் பைரில்லம், பாஸ்போ பாக்டீரியா ஆகியவறை, ஏக்கருக்கு 4 கிலோ அளவில் ஒரு கிலோ கம்போஸ்டு அல்லது தொழு உரத்துடன் கலந்து பாஸ்பேட் உரத்தை இட்ட பிறகு, நடவுகால்களில் கரும்பு நடுவதற்கு முன் இட வேண்டும்.

துத்தநாகச் சத்து, இரும்புச் சத்து பற்றாக்குறையினால் பயிர்களின் இலை மஞ்சளாகி வெளுத்து காணப்படும். இதற்கு ஹெக்டேருக்கு 2 கிலோ பெரஸ்சல்பேட், ஒரு கிலோ துத்தநாக சல்பேட், 2 கிலோ யூரியா ஆகியவற்றை 200 லிட்டர் தண்ணீரில் கரைத்து கைத்தெளிப்பான் மூலம் கரும்புப் பயிர் நன்கு நனையும்படி தெளிக்க வேண்டும்.

இத்தகைய எளிய தொழில்நுட்ப முறைகளைக் கடைபிடித்து, அதிகமான உரம், பூச்சி, களை, பூசானக்கொல்லி மருந்துகளை தவிர்த்து, மண் வளத்தை பெருக்கி கரும்பு மகசூலை அதிகரிக்கலாம் என வேளாண்மை உதவி இயக்குநர் பெ.கோவிந்தராஜன் தெரிவித்துள்ளார்.