வேளாண் காப்பீட்டுத் திட்டத்தில் டிச.15 -க்குள் சம்பா நெல்லுக்கு காப்பீடு செய்யலாம்

தேசிய வேளாண் பயிர் காப்பீட்டுத் திட்டத்தின் கீழ் விவசாயிகள் நிகழாண்டுக்கான சம்பா நெல் பயிருக்கு டிச. 15-ம் தேதிக்குள் காப்பீடு செய்யலாம். இதுகுறித்து  தேசிய வேளாண் காப்பீட்டு நிறுவன மண்டல மேலாளர் சி. அன்பரசு வெளியிட்ட செய்திக்குறிப்பு:

“”நிகழாண்டுக்கான காப்பீட்டுத் திட்டத்தில் சம்பா நெல் பயிருக்கு கடன் பெறாத விவசாயிகள் சேர கடைசி தேதி 15.12.2010. ஆகும். எனினும், வெள்ளம் வறட்சி என முன்கூட்டியே தெரிந்துகொண்டு முன்னதாகவே பிரிமியம் செலுத்தினால் அது நிராகரிக்கப்படும்.

எனவே, விவசாயிகள் காலம் தாழ்த்தாமல் இத்திட்டத்தில் சேர முன்வர வேண்டும். சம்பா நெல் பயிரில் ஓர் ஏக்கருக்கு சாதாரண பிரிமியத் தொகை 55 சதவிகிதம் மானியம் போக சிறு,குறு விவசாயிகளுக்கு ரூ.117. ஏனைய விவசாயிகளுக்கு ரூ.130. காப்பீட்டின் மதிப்பு ரூ.13,024.

எனவே, பயிர்க்கடன் பெறாத விவசாயிகள் தங்கள் விருப்பத்தின்பேரில் பின்வரும் கூடுதல் பிரிமியத் தொகையைச் செலுத்தினால் அதிக பலனைப் பெறலாம். அதில், ஓர் ஏக்கருக்கு கூடுதலாக

  • சிறு, குறு விவசாயிகள் செலுத்த வேண்டிய தொகை ரூ.456,
  • ஏனைய விவசாயிகள் செலுத்த வேண்டிய தொகை ரூ.507.
  • காப்பீட்டின் மதிப்பு ரூ.11,396.

ஆகவே, சாதாரண மற்றும் கூடுதல் மதிப்பு ஓர்  ஏக்கருக்கு ரூ.24,420.

இந்த இரண்டுக்கும் சேர்த்து சிறு,குறு விவசாயிகள் செலுத்த வேண்டிய பிரிமியம் ஓர் ஏக்கருக்கு ரூ.574.

ஏனைய விவசாயிகள் செலுத்த வேண்டிய பிரிமியம் ரூ. 637.

காப்பீட்டுத் தொகையைக் கடைசி தேதிக்கு முன்னதாகச் செலுத்த வேண்டும். வறட்சி, வெள்ளம் குறித்து முன்னதாகவே தெரிந்தால் குறிப்பிட்ட தேதியில் மாற்றம் செய்யப்படும். பயிர்களுக்கு மகசூல் அடிப்படையில் இழப்பீடு ஏதும் இருந்தால் திட்டங்களுக்கு உள்பட்ட இழப்பீட்டுத் தொகை விவசாயிகளின் வங்கிக்கணக்கில் வரவு வைக்கப்படும்.

மேலும், விவரங்களுக்கு,

தேசிய வேளாண் காப்பீட்டுக் கழகம்,(மத்திய அரசு நிறுவனம்),

மண்டல அலுவலகம்,

323 முதல் தளம், ஆந்திரா இன்சூரன்ஸ் கட்டடம்,

தம்புச்செட்டி தெரு,

சென்னை – 600 001

என்ற முகவரிக்கோ 044 – 43403400 என்ற தொலைபேசி எண்ணுக்கோ தொடர்புகொள்ளலாம்.”

Advertisements

காரீப் பருவத்தில் பயிர் செய்துள்ள விவசாயிகள் கவனத்துக்கு…

First Published : 26 Jun 2010 10:46:33 AM IST

சங்ககிரி, ஜூன் 25: காரீப் பருவத்தில் பயிர்களை சாகுபடி செய்யும் விவசாயிகள் வானிலை பயிர் காப்பீட்டுத் திட்டத்தில் உரிய தவணை செலுத்தி சேர சங்ககிரி வேளாண்மை உதவி இயக்குநர் ப.சௌந்திரராஜன் கேட்டுக் கொண்டுள்ளார்.

காரீப் பருவத்தில் சாகுபடியாகும் கார் நெல், சம்பா நெல், பயறு வகைகள், எண்ணெய் வித்துக்கள், பருத்தி, தோட்டக்கலைப் பயிர்கள் ஆகிய பயிர்களை சாகுபடி செய்யும் விவசாயிகள் வானிலை பயிர் காப்பீட்டுத் திட்டத்தில் சேர அக்ரிகல்ச்சர் இன்சூரன்ஸ் கம்பெனி ஆப் இந்தியா நிறுவனம் நிர்ணயித்துள்ள இறுதி தேதிக்குள் விருப்பமுள்ள கடன்பெறா விவசாயிகள் உரிய தவணை செலுத்தி சேர வேண்டும்.

வானிலை பயிர் காப்பீட்டுத் திட்டம் என்பது பயிர் சாகுபடி பருவத்தில் காலத்தில் வானிலையில் ஏற்படும் மாற்றங்களான குறைந்த வெப்பநிலை, அதிகபட்ச வெப்பநிலை, ஈரப்பதம், காற்றின் வேகம், குறைந்த மழை, கூடுதல் மழை, மழையின்மை ஆகிய காரணங்களால் பயிர்களுக்கு ஏற்படும் பாதிப்புகளுக்கு உரிய நிவாரணமாக அறிவியல் பூர்வமாக கணக்கிட்டு விவசாயிகளுக்கு காப்பீட்டுத் தொகை வழங்கும் திட்டமாகும்.

இத்திட்டத்தின் கீழ் நடப்பாண்டில் காரீப் பருவத்தில் பயிரிடப்படும் உளுந்து, பாசிப்பயறு, துவரை போன்ற பயறுவகைகள், நிலக்கடலை, எள், சூரியகாந்தி, மக்காச்சோளம், கம்பு, ராகி, சோளம், மரவள்ளி, காய்கறிப் பயிர்கள், மஞ்சள் ஆகிய பயிர்களுக்கு ஜூலை 5ம் தேதியும், பருத்தி, வாழை ஆகிய பயிர்களுக்கு ஜூலை 31ம் தேதியும், சம்பா நெல்லுக்கு ஜூலை 10ம் தேதியும் தவணை செலுத்த இறுதி நாளாக அறிவிக்கப்பட்டுள்ளது.

திட்டத்தில் சேரும் விவசாயிகள் உளுந்து, பாசிப்பயறு, துவரை போன்ற பயறுவகைகள் மற்றும் ராகி, சோளம் ஆகிய பயிர்களுக்கு ஒரு ஏக்கருக்கு ரூ.138ம்,  கம்பு பயிருக்கு ரூ.193ம், சம்பா நெல்லுக்கு ரூ.221ம், எள் சூரியகாந்தி பயிர்களுக்கு ரூ.232ம், மக்காச்சோளத்திற்கு ரூ.276ம், நிலக்கடலைக்கு ரூ.386ம், மானாவாரிப் பருத்திக்கு ரூ.529ம், இறவை பருத்திக்கு ரூ.827ம், மரவள்ளிக்கு ரூ.794ம், காய்கறிப் பயிர்களுக்கு  ரூ.927ம், மஞ்சளுக்கு ரூ.993, வாழைக்கு ரூ.2647ம் தவணையாக செலுத்த வேண்டும். கடன்பெறும் விவசாயிகள் இத்திட்டத்தில் கட்டாய அடிப்படையிலும், கடன் பெறா விவசாயிகள் தங்கள் விருப்பத்திற்கு ஏற்பவும் சேர முடியும்.

ஒவ்வொரு விவசாயியும் அவரது பெயரிலேயே சேமிப்பு வங்கி கணக்கு வைத்திருப்பது அவசியம்.  தங்கள் ஊருக்கு அருகில் உள்ள கூட்டுறவு வங்கி, வர்த்தக வங்கி ஆகியவற்றை அணுகி இத்திட்டத்திற்கான முன்மொழிவு படிவத்தை பூர்த்தி செய்து தவணை தொகையை செலுத்தலாம்.

காரீப் பருவ பயிர்கள் சாகுபடி செய்துள்ள விவசாயிகளில் விருப்பமுள்ளவர்கள் உரிய காலத்திற்குள் இத்திட்டத்தில் சேர்ந்து பயிர் காப்பீடு செய்து பயனடையலாம் என வேளாண் உதவி இயக்குநர் தெரிவித்துள்ளார்.