சூரிய சக்தி விளக்கு – ஆயுத பூஜை & கரண்ட் கட் சிறப்புப் பதிவு

நெடுநாள் நினைத்துக்கொண்டு இருந்தாலும் தமிழ்பயணியார் மற்றும் திரு ஐயப்பன் அவர்களின் மாரல் சப்போர்டுடன் இந்த சோலார் விளக்கு வைபவம் நேற்று இனிதே நடந்தது.

தேவையான பொருட்கள்

எண்	கருவி	எண்ணம்	விலை
1	12 V 7 AH பாட்டரி	1	800
2	12 V 30 W சோலார் செல்	1	2150
3	சார்ஜர் – இன்வர்டர்	1	1550
4	ஒயர்- இரட்டை வடம்	12 மீட்டர்	96
5	ஒயரை இன்வர்டருடன் இணைக்கும் பின்	2	4
6	CFL விளக்கு	1	30
	ஆக மொத்தம்		4630

2 மற்றும் 3ஆம் பொருட்கள் ebay மூலமாக சந்தித்த விற்பனையாளர் மூலம் கிடைத்தது.

செய்முறை

சோலார் பேனல்

இன்றைக்கு இருட்டிக்கொண்டு வருகிறது. இருக்கும் வெளிச்சத்திற்கு ஏன் மொட்டை மாடிக்குப் போவானேன். வராண்டாவிலேயே பேனல் வைக்கப்படுகிறது. அந்த பேனலை தெற்கு வடக்காக 15 டிகிரி சாய்வில் வைக்கச் சொல்கிறார்கள். அதாவது காலை முதல் மாலை வரை நிழல் வராமல் வெளிச்சம் படுவதற்காக.

---

Spec

ஸ்பெக் வேண்டுவோருக்காக

---

முணையம்

ஒயர் சீவப்பட்டு பேனலின் முணையத்துடன் முறுக்கப்பட்டுள்ளது

---

இன்வர்டர் சார்ஜர்

இது நமது சார்ஜர் மற்றும் இன்வர்டர் பொட்டி. இந்த வேலைக்கு ரெடிமேட் சர்க்யூட்கள் கிடைக்கின்றன. அவற்றை வாங்கி இணைத்தால் இன்னும் விலை குறையும். ஆனால் அதற்குத் தகுந்த கூடு (cabinet) தேடிப்பிடிக்க வேண்டும். இந்தப் பெட்டியில் 4 LED விளக்குகள் பொறுத்தப்பட்டுள்ளன. இரவு விளக்காகப் பயன்படுத்திக் கொள்ளலாம். CFL விளக்குப் பொறுத்த ஒரு holder பொறுத்தப்பட்டுள்ளது. இதற்குள் ஏற்கனவே நாம் வாங்கிய பாட்டரி பொறுத்தப்பட்டுள்ளது.

---

இன்வர்டர் சைடு

இதில் இடது புறத்தின் மேலே சோலார் பாட்டரி இணைக்க பின்கள் கொடுக்கப்பட்டுள்ளன. கீழே 3 பிளக்குகளில் லோடு இணைத்துக்கொள்ளலாம். அதாவது CFL விளக்கு – மொபைல் சார்ஜர் – DCயில் இயங்கும் ஃபேன்

---

சோலார் இணைப்பு

முணையத்திலிருந்து வரும் ஒயர் செருகப்படுகிறது. +ve -ve சரியாகப் பார்த்து இணைக்கவேண்டும்.

---

சார்ஜ் ஆகிறது

பாட்டரியை இணைத்த அடுத்த நொடி வெளிப்புர சார்ஜர் விளக்கு ஒளிர்கிறது.

---

LED விளக்குகள்

இந்த LED விளக்குகள் நிறைய நேரம் எரிய பயன்படுத்திக்கொள்ளலாம்

---

CFL இணைக்கப்படுகிறது

தலையில் உள்ள holderல் CFL இணைக்கிறோம்.

---

UPS ON – CFL ஒளிர்கிறது

50 வாட் அளவுள்ள இந்த கருவியின் மூலமாக 3 CFL விளக்குகளை 2 மணிநேரம் எரிக்கலாம். அல்லது 1 CFLஐ 5 மணிநேரம் வரையில் இயக்கலாம். CFLன் பவர் கூடக் கூட அது ஒளிரும் நேரம் குறையும்

Advertisements

தீவனத்தை நறுக்கும் கருவி

பண்ணைகளில் அதிக எண்ணிக்கையில் கறவை மாடுகளைப் பராமரிக்கும் போது அதிகப்படியான ஆள்களும், அதிக நேரமும் தேவைப்படுகிறது. வேலையாள்களின் தேவையைக் குறைக்கவும், நேரத்தை மிச்சப்படுத்தவும், சுகாதாரமான முறையில் பால் உற்பத்தி செய்வதற்கும் இயந்திரங்களைப் பயன்படுத்துவது அவசியமாகிறது.

தீவன நறுக்கி:

தீவனங்களை வெட்டுவதற்காக பயன்படுத்தப்படும் இயந்திரம்.

கால்நடைகளுக்கு பசுந் தீவனம் மற்றும் உலர் தீவனங்களை அப்படியே தீவனத் தொட்டியில் போடுவதை விட சிறு சிறு துண்டுகளாக நறுக்கிப் போடுவதன் மூலம் கால்நடைகளின் தீவனம் உள்கொள்ளும் அளவு கூடுவதோடு, சேதாரத்தை 20 முதல் 30 சதம் வரை குறைக்க முடியும். கால்நடைகள் இலை, தண்டு என்று பாகுபாடு இன்றி அனைத்துப் பாகங்களையும் உள்கொள்வதுடன் தீவனத்தின் செரிமானத் தன்மையும் கூடுகிறது. மேலும், கால்நடைகளுக்குக் கிடைக்கும் நிகர எரிசக்தியின் அளவும் அதிகரிக்கிறது.

இந்தக் கருவி மின் மோட்டார் இணைப்புடனும் கிடைக்கிறது. மின் இணைப்பு இல்லாத இடங்களில் பயன்படுத்தும்படி, கையால் இயங்கும் வகையிலும் கிடைக்கிறது. தவிர, டீசல் என்ஜின், டிராக்டர் வண்டியுடன் இணைந்து செயல்படும் இயந்திர மாதிரிகளும் உள்ளன. இதில், கைகளால் இயக்கும் இயந்திரம் மூலம் மணிக்கு 50 முதல் 70 கிலோ தீவனங்களை நறுக்க முடியும்.

ஒரு குதிரைத் திறன் (ஹெச்பி) சக்தியுடைய மின் மோட்டாருடன் இணைந்த இயந்திரம் மூலம் மணிக்கு 200 முதல் 250 கிலோவும், 1.5 ஹெச்பி திறன் மோட்டாருடன் கூடிய இயந்திரம் மூலம் மணிக்கு 300 முதல் 350 கிலோவும், 2 ஹெச்பி திறன் மோட்டாருடன் கூடிய இயந்திரம் மூலம் மணிக்கு 500 முதல் 600 கிலோ வரையும் தீவனங்களை நறுக்க முடியும்.

இவற்றின் மூலம் வேலையாள்களின் தேவை, நேரத்தையும் குறைத்து, செலவினங்களையும் கட்டுப்படுத்தலாம்

தினமணி தகவல்
நாமக்கல் கால்நடை மருத்துவக் கல்லூரி விரிவாக்கத் துறை பேராசிரியர்கள் நா. நர்மதா, வே.உமா, மொ. சக்திவேல்

வேளாண் அரங்கம் மார்க்கெட்டில்

• கறவை எந்திரம்
• தீவனம் மற்றும் கருவிகள்
• கால்நடை வளர்ப்பு
• நாமக்கல் கால்நடை மருத்துவக் கல்லூரி

பால் கறவை இயந்திரம்

பண்ணைகளில் அதிக எண்ணிக்கையில் கறவை மாடுகளைப் பராமரிக்கும் போது அதிகப்படியான ஆள்களும், அதிக நேரமும் தேவைப்படுகிறது. வேலையாள்களின் தேவையைக் குறைக்கவும், நேரத்தை மிச்சப்படுத்தவும், சுகாதாரமான முறையில் பால் உற்பத்தி செய்வதற்கும் இயந்திரங்களைப் பயன்படுத்துவது அவசியமாகிறது.

பத்து கறவை மாடுகளுக்கு மேல் வைத்திருப்பவர்களுக்கு பால் கறவை இயந்திரத்தைப் பயன்படுத்துவது இலாபகரமாக இருக்கும். இந்தக் கறவை இயந்திரம் மூன்று பேர் செய்யக்கூடிய வேலையைச் சுலபமாக செய்து முடித்துவிடும். மேலும், இந்த இயந்திரம் மூலம் சுகாதாரமான முறையில் பால் உற்பத்தி செய்ய முடிவதுடன், கையால் கறப்பதைவிட 50 சதம் குறைந்த நேரத்தில் முழுமையாகப் பாலைக் கறந்து விடலாம். இதனால், கறவை மாடுகளின் எண்ணிக்கைகளை அதிகப்படுத்தி குறைந்த பராமரிப்புச் செலவில் அதிகப் பால் உற்பத்தி செய்ய முடிகிறது. குறிப்பிட்ட நேரத்தில் சீரான முறையில் பால் கறப்பதால் கறவை மாடுகளுக்கு மடிநோய் வராமலும் தடுக்க முடியும்.

இயங்கும் முறை
மாட்டின் மடியில் சேர்ந்திருக்கும் பாலை காம்பில் பொருத்தும் குழாய்கள் மூலம் உறிஞ்சுவதால் பால் கறக்கப்படுகிறது. காம்புக்கு விட்டு விட்டு அழுத்த நிலை கொடுக்கப்படுகிறது.

இடையிடையே பால் உறிஞ்சும் செயலும் நடைபெறுகிறது. அழுத்தும் நிலை, உறிஞ்சும் நிலை என்று மாறி மாறி ஏற்படுவதால் பால் கறக்கும் செயலானது இயற்கையில் கன்று பாலைக் குடிப்பது போன்ற உணர்ச்சியைத் தாய்ப் பசுவிற்கு அளிக்கிறது. பால் வரும் குழாய் கண்ணாடி ஆனதால் பால் வருவதைக் கவனித்து, பால் வராத சமயத்தில் இயந்திரத்தை நிறுத்த முடிகிறது.

பால் கறப்பதற்கு முன்பு கைகளைக் கிருமி நாசினி கொண்டு சுத்தமாகக் கழுவ வேண்டும். மடியைச் கிருமி நாசினி கொண்ட தண்ணீரால் கழுவி, பின்பு உலர்ந்த சுத்தமான துணியால் துடைக்க வேண்டும். பால் கறவை இயந்திரத்தை உபயோகிக்கும் முன்பு சிறிதளவு பாலை, கறுப்புத் துணி கொண்டு மூடிய சிறிய கிண்ணத்தில் கறந்து பார்ப்பதன் மூலம் பாலின் தரத்தை நிர்ணயம் செய்ய முடியும்.

உறிஞ்சும் குழாயைப் பசுவின் காம்பில் வைத்து கறவை இயந்திரத்தை இயக்க வேண்டும். பால் கறந்த பின் காம்புகளைக் கிருமி நாசினி கொண்டு சுத்தம் செய்வதால் மடி வீக்க நோய் வருவதிலிருந்து பாதுகாக்கலாம்.

தினமணி தகவல்
நாமக்கல் கால்நடை மருத்துவக் கல்லூரி விரிவாக்கத் துறை பேராசிரியர்கள் நா. நர்மதா, வே.உமா, மொ. சக்திவேல்

வேளாண் அரங்கம் மார்க்கெட்டில்

• கறவை எந்திரம்
• கால்நடை வளர்ப்பு
• நாமக்கல் கால்நடை மருத்துவக் கல்லூரி

முட்டை பொரிக்கும் கருவி

அடைகாத்தல்:
வெப்பநிலை, ஈரப்பதம், வாயுச்சூழ்நிலை மற்றும் முட்டைகளைத் திருப்பிவிடுதல் போன்ற இயற்கைக் காரணிகள் ஒரு வெற்றிகரமான குஞ்சுபொரிப்ப தற்கு அவசியம். அடைக்காப்பானின் உள்வெப்பநிலையானது அதைத் தயாரிப்பவர் கூறும் அளவு வைத்துக் கொள்ளலாம். பொதுவாக மிதமான வெப்பநிலையே விரும்பப்படுகிறது. இது பொதுவாக 99.5 – 100.5 டிகிரி பாரன்ஹீட் (37.2 டிகிரி செ – 37.8 டிகிரி செ) வரை. குறைந்த வெப்பநிலை கரு வளர்ச்சியைக் குறைக்கும். (சாதகமற்ற) அசாதாரண அதாவது அதிக வெப்பநிலை நிலவும்போது வளர்ச்சியைப் பாதித்து கோழிகளில் இறப்பு வீதத்தை அதிகப்படுத்துகிறது.
கருமுட்டைகள் அகலமான பக்கம் மேல்நோக்கியவாறு வைத்தல் வேண்டும். நவீன அடைகாப்பான்களில் முட்டைகள் தன்னிச்சையாகவே ஒரு நாளைக்கு 8 அல்லது அதற்கு மேற்பட்ட முறைகள் திருப்பிக்கொள்ளுமாறு வடிவமைக்கப்பட்டுள்ளது.

5 அல்லது 7வது நாளிலிருந்து ஒளியில் கரு வளர்நிலை காண வேண்டும். அப்போது கருவுறாத முட்டைகளையும், 18வது நாளில் சிதைந்த அல்லது இறந்த முட்டைகளையும் நீக்கிவிடலாம். ஆட்கூலியைக் குறைக்க பெரும்பாலும் 17 அல்லது 18ம் நாளில்தான் ஒளியில் கருவளர்நிலை காணப்படுகிறது. ஒளியை உட்செலுத்தும்போது அது முட்டையினுள் ஒளி ஊடுருவிச் செல்ல இயலாமல் இருட்டாக இருந்தால் கரு நன்றாக வளர்ந்துள்ளது என்றும் சிறிதளவு ஒளி கசியக்கூடியதாக இருந்தால் கரு இறந்துவிட்டது என்றும் ஒளி எளிதில் ஊடுருவக்கூடியதாக இருந்தால் அது கருவுறாத முட்டை என்றும் அறிந்துகொள்ளலாம். கரு வளர்ந்துள்ள முட்டைகளை மட்டுமே பொரிப்பகத்திற்கு மாற்றம் செய்ய வேண்டும். கோழியின் வம்சாவளியைப் பாதுகாக்க ஒரு கோழியின் முட்டைகளை ஆண் பெண் தனித்தனிப் பிரிவுகளாகப் பிரித்து அடுக்கி வைக்க வேண்டும்.

அடைகாப்பான் மற்றும் குஞ்சு பொரிப்பகத்தை முற்றிலும் முட்டையை அதில் வைப்பதற்கு முன்னரே ஒரு முறை சோதனை செய்து, ஏதேனும் குறையிருந்தால் சரிசெய்ய வேண்டும். நன்கு கழுவி, கிருமிநாசினி கொண்டு சுத்தப்படுத்தி வைக்க வேண்டும். இது நோய் பரவலின் தன்மையைக் குறைக்கும்.

தினமலர் தகவல்
தொடர்புக்கு: ஆர்.ஜி.ரீஹானா, அக்ரி கிளினிக், 268/77, பழைய ஹவுசிங் யூனிட், தாராபுரம்-638 657.
-ஆர்.ஜி.ரீஹானா,
தாராபுரம், 89037 57427.

தொகுப்பு: கால்நடை வளர்ப்பு

நீடித்த நிலைத்த கரும்பு சாகுபடியில் தாய்க்கரும்பு பயிரை அறுக்கும் கருவி

கரும்பில் அதிக மகசூல் எடுப்பதற்கான தொழில்நுட்பம் “நீடித்த நிலைத்த கரும்பு சாகுபடி’ தொழில்நுட்பமாகும். இதற்கு 500லிருந்து 650 கிலோ விதைக்கரும்பு போதுமானதாகும். பருக்களுடன் சிறிது கரும்புத் தண்டும் பெயர்த்து எடுத்து பிளாஸ்டிக் குழித்தட்டில் மக்கிய தென்னை நார்க்கழிவு அல்லது மண்புழு எரு இட்டு பருவை குழியில் நட்டு வைத்து இத்தட்டுக்களை பசுமைக்குடிலில் வைத்து நாற்று உற்பத்தி செய்து தரமான நாற்றுக்களை வளர்க்க வேண்டும். ஒரு மாத வயதுடைய நாற்றுக்களை / வயலில் 5 அடிக்கு 2 அடி இடைவெளியில் நட்டு சாகுபடி செய்ய வேண்டும். இதற்கு ஏக்கருக்கு 4450 நாற்றுக்கள் வேண்டும். நாற்று முளைக்காத போக்கிடம் நடுவதற்கு அந்த மாதிரி சூழல் வராது. வந்தால் மொத்தமாக 4600 நாற்றுக்கள் போதுமான தேவையாகும்.

கரும்பு நாற்றை வரிசையில் 2அடி இடைவெளி விட்டு நடும்போதே தாய்ப்பயிரோடு பக்கத்தூரும் இரண்டு அல்லது ஒன்று குறுகிய நீளத்தில் வளர்ந்திருக்கும். வயலில் நட்ட ஒரு மாதத்திற்குப் பிறகு தாய்ப்பயிரை பூமிமட்டத்திலிருந்து இரண்டு அங்குலம் விட்டு அறுத்துவிட வேண்டும். இதனால் மேலும் அதிக தூர்கள் வளரும். இது பக்கத்தூரையும் புழு குருத்தையும் சேதப்படுத்துவதால் நமக்கு கரும்பின் எண்ணிக்கை குறையும். ஆனால் தாய்ப்பயிரை அறுத்துவிடுவதால் மேற்கண்ட செயல்பாடு நடக்காது. இளங்குருத்துப் புழுவால் இயற்கையாக நடப்பது, அறுத்துவிடுவதால் செயற்கையாக இங்கு செய்கிறோம். இயற்கையாக புழுவால் நடப்பது பக்கத்தூரையும் தாக்கி அழிக்கும். அதனால் அது நமக்கு நல்லதில்லை.

Image taken from http://www.science.howstuffworks.com

சில ரக இளங்கரும்புப் பயிரின் தண்டில் முசுமுசு என்று முள்ளு மாதிரி சொணை இருக்கும். அது ஆட்களைக் கொண்டு அறுத்துவிடும்போது கையில் குத்தும். வேலையாட்கள் கீழே குனிந்துதான் அரிவாள் கொண்டு அறுத்துவிட வேண்டும். இந்த இடையூறுகளினால் வேலை ஆட்களின் வேலை பாதிக்கும். இதைக்கருத்தில் கொண்டு சுலபமாக வேலை நடக்கவும், வேலைஆட்களின் கைகளில் எந்தவித பாதிப்பும் இல்லாமல் செய்யவும் ஒரு கருவி உருவாக்கப்பட்டது. படத்தில் உள்ளவாறு இருக்கும் கருவியைக் கொண்டு இளங்கரும்புப் பயிரின் தாய்ப்பயிரை ஆட்களின் உதவியால் அறுத்துவிடலாம். இக்கருவியை உபயோகிக்கும்போது கீழே குனியவும், தண்டை பிடிக்கவும் வேண்டாம். எந்தப்பயிரை அறுத்துவிட வேண்டுமோ அந்தப் பயிரை கருவியால் நின்றுகொண்டே அறுத்துவிட்டு நடந்துசெல்லலாம். நாமே காலை வேளை இரண்டு நாட்களில் ஒரு ஏக்கர் பயிரை அறுத்துவிட்டு வேலையை முடிக்கலாம். அறுத்த பயிரை மாட்டிற்கு தீனமாகக் கொடுக்கலாம். இளம் பயிராக இருப்பதால் மாடும் நன்கு சாப்பிடும்.

அதற்குப்பிறகு சொட்டு நீர்ப் பாசனத்தோடு உரக் கலவையையும் பயிருக்கடியில் கொடுக்கும் போது பயிர் சத்தையும் நீரையும் எடுத்துக் கொண்டு அதிக எண்ணிக்கையில் பக்கத்தூரை வளரச் செய்யும். பக்கத் தூர்களின் வயதும் ஏறத்தாழ ஒரே சீராக இருக்கும். அதனால் ஒவ்வொரு தூரும் கரும்பாய் மாறும். கரும்பின் உயரமும் தடிமனும் அதிகரிப்பதால் ஒரு கரும்பின் எடையானது அதிகரிக்கும். இப்படி ஒவ்வொரு கரும்பின் எடை கூடுவதால் ஒரு குத்தின் எடை அதிகரிக்கும். இதனால் வயலின் இருக்கிற ஒட்டுமொத்த கரும்பின் மகசூல் அதிகரிக்கும்.

தினமலர் தகவல்: முனைவர் கு.கதிரேசன், இயக்குனர் (திட்டமிடல் மற்றும் கண்காணிப்பு), டி.என்.ஏ.யு.,கோவை. 0422-661 1310.
-கே.சத்தியபிரபா, உடுமலை.

வேளாண் அரங்கம் மார்க்கெட்டில் TNAU: http://www.market.grassfield.org/Tamil%20Nadu%20Agricultural%20University/vendorDetail/65.html

சென்னை அக்ரி எக்ஸ்போ

கடந்த மூன்று நாட்களாக சென்னை வள்ளுவர் கோட்டத்தில் அக்ரி எக்ஸ்போ என்கிற பெயரில் விவசாய கண்காட்சி நடந்து வருகிறது. திருச்சி மற்றும் திண்டுக்கல் கண்காட்சிகளைத் தவறவிட்டதால் இதனைத் தவற விடுதல் ஆகாது என்று கடைசி நாளான இன்று சென்று வந்தேன்

ஏற்கனவே சொட்டு நீர் பாசனத்திற்கு 100% மானியம் என்று தமிழக அரசு அறவித்துள்ள நிலையில் இந்த கண்காட்சி முக்கியமாகப்பட்டது. விபரங்கள் அறிய வியாபாரிகள் உதவுவார்கள் அல்லவா.

துரதிர்ஷடவசமாக எதிர்பார்த்த அளவிற்கு விவசாய கடைகள் ஒதுக்கப்பட இல்லை. பெரும்பாலும் ஆரோக்கியம் என்ற தலைப்பின் கீழ் சர்க்கரை நோய்க்கான மருந்து, உணவுப்பொருட்கள் நிறைந்திருந்தன.

விவசாய அரங்குகளைப் பொருத்தமட்டில் டிராக்டர்கள், கை மற்றும் விசைத் தெளிப்பான்கள், பவர் டில்லர்கள், களை கருவிகள், நடவுஎந்திரம் மற்றும் அதற்கான தட்டுக்கள், மண்புழு மற்றும் உயிர் உரங்கள் அரங்குகளை ஆக்கிரமித்திருந்தன. சிறப்பான செய்திகள் ஏதும்சிக்கவில்லை. சில படங்கள் மட்டும் உங்கள் பார்வைக்கு.

வாழைநார் திரிக்கும் கருவி

சைக்கிளில் உள்ள சக்கரத்தினைப் பயன்படுத்தி கயிறு திரிக்கும் சாதனத்தை உருவாக்கியுள்ளார் விவசாயி. இதன்மூலம் அவருக்கு சராசரியாக 15,000 மீட்டர் அளவிற்கு கயிறு உற்பத்தி செய்ய முடிந்துள்ளது. 40 கூலியாட்கள் மூலம் இரண்டு தொழில்நுட்ப கூடங்களை அமைத்தார். இன்று அவர் தமிழ்நாடு மட்டுமின்றி, கர்நாடகா, ஆந்திரா போன்ற மாநிலங்களுக்கு அவர் தயாரிக்கும் கைவினைப் பொருட்களை (வாழைநார் பைகள், கயிறு) எடுத்துச்சென்று வியாபாரம் செய்கிறார். மத்திய அரசு விவசாயியைக் கவுரவித்து 2 லட்சம் ரூபாய் நிதி வழங்கியுள்ளது என்று கூறும் விவசாயியின் தொடர்பு முகவரி:

பி.எம்.முருகேசன், மேலக்கால் கிராமம், திருமங்கலம், மதுரை. 93605 97884.

உழவர்கள் தாங்கள் கண்டுபிடிக்கும் புதிய முயற்சிகளில் ஏற்படும் சந்தேகங்கள் மற்றும் உதவிகளுக்கு உங்கள் மாவட்டத்திலுள்ள வேளாண் அறிவியல் மையத்தை தொடர்பு கொள்ளலாம். (தகவல்: உழவரின் வளரும் வேளாண்மை, 13-15, டிசம்பர் 2010)

தினமலர் செய்தி